દેશ / લિવ ઈન રિલેશનશીપને લગ્ન તરીકે માન્યતા ન આપી શકાય, તલાકની માગ પણ ન થઈ શકે- HC

• હાઈકોર્ટે એક દંપતિની અરજી પર કરી સુનાવણી
• લિવ-ઈન રિલેશનશિપને કાયદાકીય માન્યતા નથી મળી-કોર્ટ
• કહ્યું લગ્ન વિના છૂટાછેડાની પણ માંગણી ન કરી શકાય

કેરળ હાઈકોર્ટે લિવ-ઈન રિલેશનશિપને લઈને કહ્યું કે લિવ-ઈન રિલેશનશિપને લગ્નનાં રૂપમાં માન્યતા ન આપી શકાય. કોર્ટે કહ્યું કે જ્યારે 2 વ્યક્તિ માત્ર એક કરારનાં આધાર પર સાથે રહેવાનો નિર્ણય કરે છે તો તે કોઈ લગ્નનાં અધિનિયમનાં દાયરામાં ન આવે . લિવ ઈન રિલેશનશિપનો અર્થ લગ્ન થયા હોવાનો નથી થતો તેથી તેમાં છૂટાછેડાની પણ માંગ ન કરી શકાય.

લિવ-ઈન રિલેશનશિપને લગ્ન ન કહી શકાય- કોર્ટ
જસ્ટિસ એ.મહોમ્મદ મુસ્તાક અને સોફી થોમસની ખંડપીઠે લિવ-ઈન રિલેશનશિપ વિશે ટિપ્પણી ત્યારે કરી જ્યારે લિવ-ઈનમાં રહેતા એક કપલે છૂટાછેડાની અરજી ફેમિલી કોર્ટમાં કરી હતી. કોર્ટે કહ્યું કે વિવાહ એ સામાજિક સંસ્થા છે જેને કાયદા દ્વારા માન્યતા પ્રાપ્ત થયેલી છે અને એ સમાજમાં સામાજિક અને નૈતિક આદર્શોને દર્શાવે છે. હાઈકોર્ટે કહ્યું કે છૂટાછેડાએ કાયદાકીય લગ્નને અલગ કરવા માટે છે. લિવ-ઈન રિલેશનશિપમાં આ પ્રકારની માન્યતા ન આપી શકાય.

આ દંપતિનો એક સંતાન પણ છે
હાઈકોર્ટની આ બેંચે લિવ-ઈન રિલેશનશિપમાં રહેનારાં અલગ-અલગ ધર્મોનાં કપલની અરજી પર સુનાવણી કરી હતી. અરજદારોમાં એક હિંદૂ અને એક ઈસાઈ છે જેમણે 2006માં એક રજિસ્ટર્ડ માધ્યમથી પતિ અને પત્નીનાં રૂપમાં એકસાથે રહેવાનો નિર્ણય કર્યો હતો. આ દંપતિનું એક સંતાન પણ છે. પરંતુ હવે તેમને અલગ થવું છે.

અરજદારનાં વકીલની દલીલ
અરજદારોનાં વકીલે એ તર્ક આપ્યો હતો કે જ્યારે બંને પક્ષોએ ઘોષણાનાં માધ્યમથી પોતાના સંબંધને વિવાહનાં રૂપે સ્વીકાર કરી લીધું છે તો કોર્ટ એ નક્કી નથી કરી શકતી કે શું તેઓ કાયદાકીય રીતે પરણિત છે કે નહીં.