આફતનો 'વરસાદ' / અમરેલીમાં અવકાશી વીજળી કાળ બનીને ત્રાટકતા મજૂરનું મોત, 2 દાઝ્યા, તો જસદણ યાર્ડમાં કપાસ-મગફળીનો જથ્થો પલળ્યો

• અમરેલીના ધારી પંથકમાં આકાશી વીજળીનો કહેર
• એક ખેતમજૂરનું ઘટનાસ્થળે મૃત્યુ, અન્ય 2ને ઈજા
• જસદણ માર્કેટ યાર્ડમાં કપાસ-મગફળી પલળી

રાજ્યમાં હવામાન વિભાગની આગાહીને લઇને છેલ્લા બે દિવસથી વાતાવરણમાં પલટો આવ્યો છે. ત્યારે આજે અમુક શહેરોમાં છૂટોછવાયો કમોસમી વરસાદ ત્રાટક્યો હતો. જેને લઇને ખેતરોમાં પાક નુકસાની પણ ભીતિ સેવાઇ રહી છે. આવી સ્થિતિ વચ્ચે આજે અમરેલીના ધારી પંથકમાં આકાશી વીજળીનો કહેર જોવા મળ્યો હતો, જેમાં એક ખેતમજૂરનું મોત નિપજતા હાહાકાર મચી ગયો છે.

ITI ની પાછળ ખેતરમાં અવકાશી વીજળી ત્રાટકી
અમરેલીના ધારી પંથકમાં વરસાદી વાતાવરણ વચ્ચે જુદા જુદા 2 સ્થળોએ વીજળી પડવાની ઘટના સામે આવી હતી. હરીપરા નજીક આવેલ ITI ની પાછળ ખેતરમાં અવકાશી વીજળી ત્રાટકી હતી. ખેડૂતો અને ખેતમજૂર પર આકાશી વીજળી પડતાં ભાગદોડ મચી જવા પામી હતી. જેમાં એક ખેતમજૂરનું ઘટનાસ્થળે કમકમાટીભર્યું મૃત્યુ નીપજ્યું હતું. જ્યારે  અન્ય 2 વ્યક્તિને ગંભીર ઇજા પહોંચતા તાત્કાલિક સારવાર અર્થે ખસેડવામાં આવ્યા હતા.  વધુમાં ધારીના ખીચા ગામે મકાન પર વીજળી પડી હતી. જેને લઇને મકાનના વીજ ઉપકરણો બળીને ખાક થઈ ગયા હતા. 

સાવરકુંડલા પંથકમાં ધોધમાર વરસાદ પડ્યો 
આજે અમરેલીમાં વરસાદી વાતાવરણ સર્જાયું હતું. જેમા સાવરકુંડલા પંથકમાં ધોધમાર વરસાદ પડ્યો હતો. શહેરમાં અડધો કલાકથી વધુ સમય સુધી વરસાદ શરૂ રહેતા નીચાણવાળા વિસ્તારોમાં પાણી ભરાયા હતા. ઉપરાંત ગાજવીજ સાથે સાવરકુંડલાના વિસ્તારોમાં વરસાદ પડતાં પાક નુકસાનીના ડરને લઇને ખેડૂતોમાં ચિંતા જન્મી હતી. ઉપરાંત બનાસકાંઠાના દાંતામાં વરસાદ ખાબક્યો હતો.ઉકળાટ બાદ અચાનક  વાતાવરણ પલટાયું હતુ અને કમોસમી વરસાદ તુંટી પડ્યો હતો.
 
જસદણમાં માર્કેટ યાર્ડની ગંભીર બેદરકારી સામે આવી 
તો વરસાદી વાતાવરણમાં જસદણમાં માર્કેટ યાર્ડની ગંભીર બેદરકારી સામે આવી હતી. વરસાદી જાપટુ વરસતા માર્કેટ યાર્ડમાં મગફળી બોરી અને કપાસની ગાંસડી પલળી ગઇ હતી. હવામાન વિભાગ દ્વારા વરસાદની આગાહી કરવામાં આવી હતી છતાં મગફળી અને કપાસનો જથ્થો બહાર પડ્યો હતો. આ દરમિયાન ભારે વરસાદ આવતા સેંકડો બોરી અને ગાંસડી પલળી ગઇ હતી.જેને લઇને ખેડૂતોને નુકસાન વેઠવાનો વારો આવ્યો હતો.