- પૂર્વ મંત્રી કુંવરજી બાવળિયાની ઓડિયો ક્લિપ થઈ વાયરલ
- તાલુકા પંચાયતના સભ્યને ધમકી આપતી ઓડિયો ક્લિપ વાયરલ
- જાહેરમાં ચર્ચા કરવા માટે કુંવરજી બાવળિયાને ફેંક્યો હતો પડકાર
ચૂંટણીને લઇને ચાલી રહેલા રાજકારણ વચ્ચે પૂર્વ મંત્રી કુંવરજી બાવળિયાની ઓડિયો ક્લિપ વાયરલ થતા રાજકીય ગરમાવો આવ્યો છે. કુંવરજી બાવળિયા અને તાલુકા પંચાયતના મહિલા સભ્યના પતિની એક ઓડિયો ક્લિપ વાયરલ થઇ છે. જેમાં ગટરની નબળી કામગીરી મુદ્દે સભ્યે આક્ષેપ કર્યો હતો જે અંગેની વાતચીતમાં આરટીઆઇ કરવાની વાત આવતા પૂર્વ મંત્રી કુંવરજીબાવળિયા લાલઘૂમ થયા હતા.
"પૈસા માગી અને RTI કરાવશો તો માર ખાવાનો વારો આવશે"
ઓડિયો ક્લિપની વાતચીત મુજબ મહિલા સભ્યના પતિએ ગટરની નબળી કામગીરી મુદ્દે આક્ષેપ કર્યો હતો. જે મામલે કુંવરજી બાવળિયાએ જાહેરમાં ચર્ચા કરવા માટે જણાવ્યુ. લાગતા વળગતા અધિકારીઓને હાજર રાખીને ત્રણ ચાર દિવસમાં હું આવુ એટલે જાહેરમાં જ તમામને ખુલ્લા પાડવા જણાવી રહ્યા હતા. વાતચીત દરમિયાન મહિલા સભ્યના પતિ જ્યારે કુંવરજી બાવળિયાને કાકા કહે છે ત્યારે પણ તેઓ આકરા થઇને જણાવે છે કે હું કાકો નથી તારો.ત્યારબાદ વાતચીત દરમિયાન મહિલા સભ્યના પતિએ RTI કરવાની વાત કરી તો કુંવરજી બાવળિયા ગુસ્સે થઇ ગયા અને કહ્યું કે એક તો પૈસા માગો છો અને RTI પણ કરાવશો તો માર ખાવાનો વારો આવશે.
વીટીવી ઑડિયો ક્લિપની પુષ્ટિ કરતુ નથી
પૂર્વ મંત્રી કુંવરજી બાવળિયાની કથિત ઓડિયો ક્લીપ વાયરલ થતા સમગ્ર સૌરાષ્ટ્રમાં ચર્ચા જગાવી છે.. ભવાનજીભાઇ સરવૈયા સાથે કુંવરજીબાવળિયા વાત કરી રહ્યા હોય તેવો ઓડિયો ક્લિપ વાયરલ થયો છે. પૈસા માગવા અને આરટીઆઇ કરવી આ બાબતે કુંવરજીબાવળિયા ધમકી આપી રહ્યા હોય તેવી ઓડિયો ક્લિપ વાયરલ થઇ છે જેની વીટીવી પુષ્ટિ કરતુ નથી.
