Kutch news : કચ્છમાં છેલ્લા 5 દિવસમાં 140થી વધુ ડ્રગ્સના પેકેટ મળી આવતાં એજન્સીઓ એલર્ટ પર છે, આમ દરિયા કિનારેથી ચરસ અને નશીલા પદાર્થો બિન વારસી હાલતમાં મળી આવવાનો સિલસિલો યથાવત છે
Share
કચ્છ બની રહ્યું છે ડ્રગ્સનો સિલ્કરૂટ?
છેલ્લા 5 દિવસમાં 140 પેકેટ ડ્રગ્સ જપ્ત
ડ્રગ્સ કોણ મગાવી રહ્યું છે તે અંગે પોલીસ અજાણ
Kutch news : પશ્ચિમ કચ્છમાં 70ના દાયકામાં પાકિસ્તાન રૂટથી થઇ રહેલી દાણચોરીનો રૂટ હવે ડ્રગ્સ માટે ફરી શરૂ થયો હોય તેવુ લાગી રહ્યું છે. કારણ કે કચ્છના દરિયાકિનારે ડ્રગ્સના પેકેટ મળવાનો સિલસિલો રોકાવાનું નામ લઇ રહ્યો નથી. કચ્છમાં છેલ્લા 5 દિવસમાં 140થી વધુ ડ્રગ્સના પેકેટ મળી આવતાં એજન્સીઓ એલર્ટ પર છે.
ડ્રગ્સ મળવાનો સિલસિલો
કચ્છનો દરિયો જાણે ડ્રગ્સનો દરિયો બન્યો હોય તે રીતે સતત નશીલા પદાર્થો મળી રહ્યા છે. કચ્છમાં 8 ઓગસ્ટે પણ મુન્દ્રા પોર્ટ પરથી DRIએ કન્ટેનરમાં લાકડાની આડમાં ડ્રગ્સની હેરાફેરીનો પર્દાફાશ કરીને 10.50 કરોડનું 1.4 કિલો કોકેઈન ઝડપી પાડ્યું હતું. તો અગાઉ પણ અનેક વખત ચરસના પેકેટ BSFના સર્ચ ઓપરેશન દરમિયાન મળી આવ્યા હતા. 14 ઓગસ્ટે જખૌ દરિયા કિનારાથી 11 કિમી દૂર કુંડી બેટ ઉપરથી "ડાર્ક સુપ્રીમો બ્લેક કોફી"નું લખાણ લખેલા ચરસના 10 પેકેટ મળી આવ્યા હતા. અગાઉ 13 ઓગસ્ટે ખિદરત બેટ પાસેથી પીળા રંગની પ્લાસ્ટિકની બેગમાં પેક કરાયેલા કુલ 10 ચરસના પેકેટ મળી આવ્યા હતા.
ડ્રગ્સ હેરાફેરીના મોટા મગરો પોલીસ પહોંચથી દૂર?
આ તમામ પેકેટ ઉપર 'ઉડતા ગરુડ'નું ચિત્ર જોવા મળ્યું હતું. આમ કચ્છના દરિયા કિનારેથી ચરસ અને નશીલા પદાર્થો બિન વારસી હાલતમાં મળી આવવાનો સિલસિલો યથાવત છે. કચ્છના પશ્ચિમ કિનારા પર છાશવારે તણાઇને આવતા ડ્રગ્સના પેકેટ કચ્છમાં રિસિવ કોણ કરે છે અને ક્યાં જાય છે તેને લઇને એજન્સીઓને ખાસ મોટી સફળતા મળી નથી. ડ્રગ્સની હેરાફેરી કરનાર મિડલ મેન વિશે કોઇ માહિતી બહાર આવી રહી નથી કે ન તો ડ્રગ્સ મગાવનારા મોટા મગરો પકડમાં આવી રહ્યા છે. ત્યારે ઝડપાયેલા ડ્રગ્સના જથ્થા સામે ન પકડાયેલો જથ્થો કેટલો હશે તેનો ફક્ત અંદાજો જ લગાવી શકાય છે.
