- કાનપુરમાં હિંસક અથડામણ થઈ હતી
- બે સમુદાય વચ્ચે બોલાચાલી થયા બાદ પથ્થરમારો
- પોલીસે હળવો લાઠીચાર્જ કરી બળપ્રયોગ કર્યો
કાનપુરમાં હિંસક અથડામણની ઘટના પર UP ADG લો એન્ડ ઓર્ડર પ્રશાંત કુમારનું નિવેદન આવ્યું છે. તેમણે કહ્યું કે, અત્યાર સુધી રમખાણોમાં સામેલ 18 આરોપીઓની ધરપકડ કરવામાં આવી છે. આ આરોપીઓ સામે ગેંગસ્ટર એક્ટ હેઠળ કાર્યવાહી કરવામાં આવશે.
UP ADG લો એન્ડ ઓર્ડરએ કહ્યું કે, કાનપુર નગરના બેકનગંજ પોલીસ સ્ટેશન વિસ્તારના નવા રોડ વિસ્તારમાં શુક્રવારની નમાજ પછી કેટલાક લોકોએ ત્યાં દુકાનો બંધ કરવાનો પ્રયાસ કર્યો, જેનો બીજી બાજુના લોકોએ વિરોધ કર્યો હતો. આ બાબતે એકબીજા વચ્ચે ઝઘડો થયો હતો, પથ્થરમારાની ઘટના બની હતી. આ માહિતી મળતાં જ પોલીસ તાત્કાલિક ઘટનાસ્થળે પહોંચી ગઈ હતી. પોલીસ દળે પરિસ્થિતિને કાબૂમાં લેવાનો પ્રયાસ કર્યો હતો. પોલીસ કમિશનર સહિત અન્ય અધિકારીઓ પણ ઘટનાસ્થળે પહોંચી ગયા હતા અને જરૂરી બળનો ઉપયોગ કરીને પરિસ્થિતિને કાબૂમાં લીધી હતી.
અત્યાર સુધીમાં 18 આરોપીઓની ધરપકડ કરવામાં આવી છે
ADGએ કહ્યું કે સરકારે આ ઘટનાને ખૂબ ગંભીરતાથી લીધી છે અને આ માટે વધારાની પોલીસ ફોર્સ મોકલવામાં આવી છે, જેમાં 12 કંપનીઓ અને એક પ્લાટૂન PAC કાનપુર મોકલવામાં આવી છે. કેટલાક અન્ય અધિકારીઓને પણ કાનપુર મોકલવામાં આવી રહ્યા છે. કાનપુરમાં ઉપદ્રવ સર્જનારાઓની ઓળખ કરવામાં આવી રહી છે, અત્યાર સુધીમાં 18 લોકોની ધરપકડ કરવામાં આવી છે.
મિલકત પર બુલડોઝર દોડશે
એડીજીએ કહ્યું કે અમને પૂરતા પ્રમાણમાં વીડિયો ફૂટેજ મળ્યા છે, જેના આધારે અમે આગળની કાર્યવાહી કરીશું. બદમાશો તેમજ કાવતરાખોરો સામે ગેંગસ્ટર એક્ટ હેઠળ કાર્યવાહી કરવામાં આવશે. તેમની સંપત્તિ પણ જપ્ત કરવામાં આવશે. આ સિવાય ત્યાંના લોકોને શાંતિ અને વ્યવસ્થા જાળવવા અપીલ કરવામાં આવી છે. વહીવટીતંત્રને સહકાર આપો, બદમાશોને ઓળખવામાં અમારી મદદ કરો.
એડીજીએ કહ્યું કે, કાનપુરના અધિકારીઓને ચોવીસ કલાક પોલીસ પ્રશાસનની ફરજ નિભાવવા અને દરેક કિંમતે શાંતિ અને વ્યવસ્થા જાળવવા સૂચના આપવામાં આવી છે. ઉત્તર પ્રદેશ સરકાર અને પોલીસ કોઈપણ સંજોગોમાં શાંતિ અને વ્યવસ્થાને ખલેલ પહોંચાડવા દેશે નહીં.
