જસદણ તાલુકા પંચાયત કચેરીમાં અંદરખાને વ્યાપેલા ભ્રષ્ટાચારના ગણગણાટ વચ્ચે ભ્રષ્ટાચાર ખૂલીને બહાર આવ્યો છે. તાલુકા પંચાયતના 2 ઈજનેર દ્વારા ભ્રષ્ટાચાર કરવામાં આવતો હોવાની રાવ ઉઠી રહી છે. જેમાં આ ઈજનેરોએ ફાઈલો પાસ કરવા સહિતના કામ માટે મકાન ભાડે રાખી તેમાં ઓફિસ બનાવી દીધી છે. જ્યાં ફાઈલો પાસ કરાવવા જેવા ગ્રાહક અને ગરજ તે મુજબ જબરું કમિશન લઈ તંત્રને ધુંબો મારવામાં આવી આવી રહ્યો હોવાની ફરિયાદ ઉઠી છે. આ મામલે મદાવા ગામના સરપંચ જયેશ જતારાએ આક્ષેપો કરી આ મામલે સ્ટીંગ ઓપરેશન પણ કર્યું હતું.
બીલ પાસ કરાવવાની ટકાવારી લેવા ભાડાના મકાનનો ઉપયોગ કરતાં
જાણવા મળતી વિગત અનુસાર ઈજનેરો દ્વારા એક, બે નહી પરંતુ છેલ્લા 4 વર્ષથી આ પ્રકારનો ખેલ આચરવામાં આવતો હોવાનો સ્થાનિકોમાં સૂર ઉઠ્યો છે. તગડી કામણી રોળવા સરકારી ફાઇલ અને સ્ટેમ્પ સહિતના સાહિત્યને કચેરીની બહાર ભાડાની ઓફીસે પણ ઉપયોગ કરવામાં આવતો હોવાના પણ આરોપો લગાવવામાં આવી રહ્યા છે. જસદણના વાજસુરપરા શેરી નંબર-3 માં એક ભાડાના મકાનમાં ગેરકાયદેસર ચાલતી તાલુકા પંચાયત કચેરીની બાંધકામ શાખાનો પર્દાફાશ થયો છે. જેમાં બે અધિક મદદનીશ ઈજનેર સરકારી દસ્તાવેજો સાથે રંગેહાથ ઝડપાયા હતા. છેલ્લા ચારેક વર્ષથી બન્ને ઈજનેરો ગ્રામપંચાયતના કામોની માપણી શીટ સહિતની ફાઈલો, ટીડીઓ સહિતના રબ્બર સ્ટેમ્પ, કોમ્પ્યુટર સીસ્ટમ સહિતનો ઉપયોગ કરી બીલ પાસ કરાવવાની ટકાવારી લેવા માટે આ મકાનનો ઉપયોગ કરતા હોવાનો સરપંચોએ આક્ષેપો કર્યા છે.
સરકારી દસ્તાવેજો તેમજ મોબાઈલ સહિતનું તમામ સાહિત્ય રેઢું મૂકીને ભાગી ગયા
જસદણ તાલુકા પંચાયત કચેરીમાં અધિક મદદનીશ ઈજનેર તરીકે નોકરી કરતા મૂળ મેસવડાના અને હાલ રાજકોટના નવાગામમાં રહેતા ઠાકરશી કોબીયા અને ગઢડા(સ્વામી) રહેતા નીરવ મકવાણા દ્વારા કચેરી હેઠળ આવતા દરેક ગામોના સરપંચો સહિતના કોન્ટ્રાક્ટરો પાસે કામનું બીલ પાસ કરાવવાનો 7 ટકાથી 9 ટકા સુધી વહીવટ કરતાં હતા.જેનું મદાવા ગામના સરપંચ સહિતનાની સ્ટીંગ ઓપરેશન હાથ ધરવામાં આવ્યું હતું. જેમાં બંને ઇજનેરો તથા રમેશ સાંકળીયા નામનો વચેટીયો ગ્રામપંચાયતના કામોની માપણી શીટ સહિતની અગત્યની સરકારી દસ્તાવેજી ફાઈલોનો ઉપયોગકરતાં ઝડપાયા હતા. ત્યારબાદ ઈજનેર અને વચેટીયા સહિતના લોકો સરકારી દસ્તાવેજો તેમજ મોબાઈલ સહિતનું તમામ સાહિત્ય રેઢું મૂકીને ભાગી ગયા હતા. મકાનમાથી સ્ટેમ સહિતની સામગ્રી મળી હતી.
જસદણ તાલુકા પંચાયત કચેરીની બાંધકામ શાખાના બે અધિકારી સમાંતર કચેરી ચલાવતા હોવાનો સ્ટિંગ ઓપરેશનમાં પર્દાફાશ કર્યા બાદ રાજકોટના ડીડીઓ દેવ ચૌધરીએ ત્વરિત કાર્યવાહી હાથ ધરી તપાસના આદેશ આપ્યા હતા તેના અનુસંધાને ડેપ્યુટી ડીડીઓએ જસદણ જઈ સજ્જડ પુરાવા એકત્રિત કર્યા છે.
જસદણના ટીડીઓ કૌશિકકુમાર પરમારની તાલાલા બદલી
જ્યારે જે બે અધિકારી ભ્રષ્ટાચારની કચેરી ચલાવતા હતા તે બન્નેને રાજકોટ હેડક્વાર્ટર ખાતે બેસાડી દઈ જ્યાં સુધી તપાસ પૂરી ન થાય ત્યાં સુધી કોઈપણ કાર્યવાહી ન કરવા આદેશ કરી દેવાયો છે ત્રણ અધિકારીની ટીમની રચના કરવામાં આવી છે. આ ટીમ 10 દિવસ સુધી સમગ્ર મામલે તપાસ કરશે ત્યારબાદ જિલ્લા વિકાસ અધિકારી ચૌધરીને રિપોર્ટ આપશે ડેપ્યુટી ડીડીઓ બ્રિજેશ કાલરિયાને જસદણ દોડાવાયા હતા. તેઓએ કરેલી પ્રાથમિક તપાસમાં સજ્જડ પુરાવા મળ્યા છે. આ ઘટના અંગે ઉચ્ચ કક્ષાએ ધ્યાન દોરવામાં આવતા જસદણના ટીડીઓ કૌશિકકુમાર પરમારની તાલાલા બદલી કરી દેવામાં આવી છે.
સળગતા સવાલો
ગુજરાતમાં ક્યાં સુધી ભ્રષ્ટાચાર થશે?
જસદણના લોકોએ પોતાનું કામ કરાવવા ક્યાં સુધી રૂપિયા આપવા પડશે?
શું ઈજનેરને પોતાના પગારમાં સંતોષ નથી?
ઈજનેર ઘરને ઓફિસ કેવી રીતે બનાવી શકે?
શું તાલુકા પંચાયતના પ્રમુખને આ વહીવટ અંગે ખબર નથી?
શું તાલુકા પંચાયતના પ્રમુખ પણ આમાં સંડોવાયેલા છે?
ઈજનેરને આવું કરવા માટે કોનું પીઠબળ મળે છે?
શું ઈજનેર વિરુદ્ધ કાર્યવાહી કરવામાં આવશે?
સરકારી ફાઈલ અને સ્ટેમ્પ સહિતનું સાહિત્ય ઓફિસ બહાર કેવી રીતે આવ્યું?
