- ચાલું વર્ષે 6 કરોડ લોકોએ ફાઈલ કર્યું આઈટી રિટર્ન
- ઈ વેરિફિકેશન કરવાનું ભૂલ્યાં લોકો
- આઈટી વિભાગે ચેતવણી આપીને કહ્યું પછી લાગશે પેનલ્ટી
દેશમાં વધુને વધુ લોકો આવકવેરા રિટર્ન ફાઇલ કરે તે માટે સરકાર અને આઇટી વિભાગ સમયાંતરે પ્રયાસો કરતા રહે છે. તેની અસર આ વર્ષે પણ જોવા મળી છે. આ વર્ષે લગભગ 6 કરોડ ટેક્સપેયર્સે આઇટીઆર ફાઇલ કર્યું છે. પરંતુ આ દરમિયાન કેટલાક લોકો એવા પણ છે જેમણે આઇટીઆર ફાઇલ કર્યું છે પરંતુ તેનું ઇ-વેરિફિકેશન કર્યું નથી. આવકવેરા વિભાગે આવા કરદાતાઓ માટે ચેતવણી જારી કરી છે. આઈટી વિભાગની ચેતવણીમાં કહેવાયું છે કે જે લોકો રિટર્ન ફાઈલ કર્યું છે તેમણે ફાઈલના 30 દિવસની અંદર ઈ વેરિફિકેશન કરી લેવું પડશે નહિંતર તેમને પેનલ્ટી સહિત બીજું ઘણું નુકશાન વેઠવાનો વારો આવી શકે છે.
આઈટીઆર ફાઈલ કર્યાના 30 દિવસની અંદર ઈ વેરિફિકેશન કરો
પોતાના ઓફિશિયલ એક્સ હેન્ડલ પર આવકવેરા વિભાગે કહ્યું કે જે કરદાતાઓએ પોતાનું ઈ-ફાઇલિંગ પૂરું નથી કર્યું, તેમણે આજે જ આ પ્રક્રિયા પૂરી કરવી જોઇએ! વિભાગે ઈ વેરિફિકેશન કેવી રીતે કરવું તેની રીત પણ જણાવી છે. આઈટી વિભાગનું કહેવું છે કે આઈટીઆર ફાઈલ કર્યાના 30 દિવસની અંદર ચકાસણી પ્રક્રિયા પૂર્ણ કરવાની રહેશે. જો તમે આ ન કરો, તો તમારે પછીથી દંડ ભરવો પડી શકે છે. આઈટી વિભાગનું એવું પણ કહેવું છે કે ઈ વેરિફિકેશન ન કરવાના કિસ્સામાં તમને રિફંડ લેવામાં પણ તકલીફ પડી શકે છે. નિયત સમય કરતાં મોડું આઈટીઆઈર ફાઈલ કરવા પર તમારે લેટ ફી પણ ચુકવવી પડી શકે છે.
ઈ-વેરિફિકેશન કેવી રીતે કરવું?
ઈ-વેરિફિકેશન માટે આઇ-ટી વિભાગે પાંચ પ્લેટફોર્મ જેવા કે બેન્ક એકાઉન્ટ, નેટ બેન્કિંગ, બેન્ક એટીએમ, આધાર અથવા ડીમેટ એકાઉન્ટનો વિકલ્પ પૂરો પાડ્યો છે.
ઇ-વેરિફિકેશન પૂર્ણ કરવા માટે સૌથી પહેલા આવકવેરા વિભાગના ઇ-ફાઇલિંગ પોર્ટલની મુલાકાત લો.
તમારો પાન નંબર અને પાસવર્ડ દાખલ કરો.
લોગિન કરતાની સાથે જ તમને ઈ-વેરિફિકેશનનો ઓપ્શન દેખાશે.
તમારા નેટ બેંકિંગ, બેંક એટીએમ, આધાર, ડિમેટ એકાઉન્ટ અથવા બેંક એકાઉન્ટમાંથી એકને પસંદ કરો
જો તમે આધાર વિકલ્પ સિલેક્ટ કર્યો છે તો તેની સાથે જોડાયેલા નંબર પર OTP આવશે, તેને એન્ટર કરો.
આ પછી ઈ-વેરિફિકેશનની પ્રક્રિયા સરળતાથી પૂરી થઈ જશે.
