બિઝનેસ / નોકરિયાતો માટે મોટા સમાચાર: Moonlighting ને લઈને મોદી સરકારે સ્પષ્ટ કર્યો સ્ટેન્ડ, કંપનીઓને ઝટકો

• મૂનલાઈટિંગનો મુદ્દો વધુ ઘેરાયો 
• રાજીવ ચંદ્રશેખરે કર્મચારીઓને સમર્થન આપ્યું
• કર્મચારીઓને અંકુશમાં લેવાના પ્રયાસો નિષ્ફળ થશે

આઈટી કંપનીઓએ મૂનલાઈટિંગ સામે મોરચો ઉભો કરી દીધો છે, ત્યારે કેન્દ્રીય આઈટી અને સ્કિલ ડેવલોપમેન્ટ મંત્રી રાજીવ ચંદ્રશેખરે તેને લઈને કર્મચારીઓને સમર્થન આપ્યું છે. 'મૂનલાઇટિંગ'ની પ્રથાને લઇને પ્રોફેશનલ્સ વચ્ચે ચાલી રહેલી ચર્ચા વચ્ચે ઇલેક્ટ્રોનિક્સ, ઇન્ફોર્મેશન ટેકનોલોજી અને સ્કિલ ડેવલપમેન્ટ રાજ્ય મંત્રી રાજીવ ચંદ્રશેખરે કહ્યું છે કે, એ દિવસો વીતી ગયા છે જ્યારે મોટી ટેક્નોલોજી કંપનીઓમાં નોકરી મેળવ્યા બાદ કર્મચારીઓ પોતાનું આખું જીવન એક જ જોબમાં વિતાવતા હતા.

મૂનલાઇટિંગ એટલે શું?
જ્યારે કર્મચારી તેની નિયમિત નોકરી સિવાય સ્વતંત્ર રીતે બીજા કોઈ પણ કામ કરે છે, ત્યારે તેને તકનીકી રીતે 'મૂનલાઇટિંગ' કહેવામાં આવે છે. તકનીકી વ્યાવસાયિકોમાં 'મૂનલાઇટિંગ' ના વધતા જતા વલણથી ઉદ્યોગમાં નવી ચર્ચાએ જન્મ આપ્યો છે.

મૂનલાઇટિંગ પર ચર્ચા વધી
આઇટી કંપની વિપ્રો લિમિટેડે તાજેતરમાં એક સાથે બે જગ્યાએ કામ કરવાના આરોપમાં તેના 300 કર્મચારીઓની હકાલપટ્ટી કરી છે. આ પછી આ મુદ્દો ખૂબ જ ઝડપથી ચર્ચાના કેન્દ્રમાં આવી ગયો છે.

સ્ટાર્ટઅપ રોકવાના પ્રયાસો નિષ્ફળ જશે
પબ્લિક અફેર્સ ફોરમ ઓફ ઇન્ડિયા (પીએએફઆઇ)ના એક કાર્યક્રમને સંબોધતા ચંદ્રશેખરે મૂનલાઇટિંગના મુદ્દે વ્યાવસાયિક કર્મચારીઓના વિચારોની પ્રશંસા કરી હતી. તેમણે જણાવ્યું કે કંપનીઓના તેમના કર્મચારીઓ પર નિયંત્રણો લગાવવા અને તેમને તેમના સ્ટાર્ટઅપ શરૂ કરવાથી રોકવાના પ્રયાસો ચોક્કસપણે નિષ્ફળ જશે.

કર્મચારીઓ પર પ્રતિબંધ મૂકવાનો કોઈ અર્થ નથી
ચંદ્રશેખરે કહ્યું "આજના યુવાનો આત્મવિશ્વાસથી ભરપુર છે, તેઓ પોતાનું મૂલ્ય વધારવા માંગે છે અને વધુ પૈસા કમાવવા માંગે છે. કંપનીઓનું એવું કહેવું છે કે તમારા સ્ટાર્ટઅપ પર કામ ન કરવું જોઈએ અને કર્મચારીઓને અંકુશમાં લેવાના તેમના પ્રયત્નો ચોક્કસપણે સફળ થશે નહીં.

કંપની સાથેના કરારનું ઉલ્લંઘન ન થવું જોઈએ
જો કે, મંત્રીએ કહ્યું હતું કે 'મૂનલાઇટિંગ' ને કારણે કંપની સાથેના કરારની જવાબદારીઓનું ઉલ્લંઘન થવું જોઈએ નહીં. એક સત્તાવાર પ્રકાશન મુજબ, ચંદ્રશેખરે આ કાર્યક્રમમાં જણાવ્યું હતું કે આ કર્મચારી-ઉદ્યોગસાહસિકોનો યુગ છે અને કોર્પોરેટ્સ અને કંપનીઓએ સમજવું પડશે કે યુવા ભારતીય ટેક વર્કફોર્સની માનસિકતા અને વલણમાં પરિવર્તન આવ્યું છે, તેમને કહ્યું "પ્રતિબંધો લાદવાની દરેક પદ્ધતિ નિષ્ફળ જશે. નોકરીદાતાઓ ઇચ્છે છે કે કર્મચારીઓ તેમની સાથે જોડાયેલા રહીને ઉદ્યોગસાહસિક બની રહે. પરંતુ તે જ કર્મચારીઓ આને પોતાના પર પણ લાગુ કરી શકે છે.