- રજત પાટીદારની સર્જરીનો તમામ ખર્ચ બીસીસીઆઈ ઉઠાવશે
- રજત પાટીદારને ડાબી એડી પર સર્જરીની જરૂર પડશે
- તેને વર્ષ 2022માં RCB માટે પ્લેઓફમાં શાનદાર સદી ફટકારી હતી
IPL 2023ની શરૂઆતમાં જ RCB પ્લેયર રજત પાટીદારની ઈજાના સમાચાર સામે આવ્યા હતા અને મધ્યપ્રદેશના આ સ્ટાર ક્રિકેટરને આઈપીએલની આખી સિઝનમાંથી બહાર થવું પડ્યું હતું. જણાવી દઈએ કે મેડિકલ તપાસમાં જાણવા મળ્યું કે રજત પાટીદારને ડાબી એડી પર સર્જરીની જરૂર પડશે અને હવે આ અંગે એક મોટા સમાચાર સામે આવ્યા છે.
વાત એમ છે કે ભારતીય ક્રિકેટ બોર્ડ એટલે કે BCCIએ કહ્યું છે કે તે રજત પાટીદારની સર્જરીનો તમામ ખર્ચ ઉઠાવશે અને બીસીસીઆઈના એક અધિકારીએ આ જાણકારી આપી.
આ સાથે જ એક અહેવાલ મુજબ એવું કહેવામાં આવ્યું હતું કે BCCI રજત પાટીદારને સર્જરી માટે ઈંગ્લેન્ડ મોકલશે. હવે અંહિયા એક વાત એ છે કે રજત પાટીદાર સેન્ટ્રલ કોન્ટ્રાક્ટ લિસ્ટમાં નથી પણ તે એક ટાર્ગેટેડ ખેલાડી છે એટલે BCCI સુનિશ્ચિત કરશે કે તેને શ્રેષ્ઠ સારવાર મળે. તેને થોડા દિવસ પહેલા ન્યૂઝીલેન્ડ સામેની વનડે શ્રેણીમાં સામેલ કરવામાં આવ્યો હતો. પરંતુ તે ડેબ્યુ કરી શક્યો નહોતો.
રોયલ ચેલેન્જર્સ બેંગ્લોર (RCB) એ એક નિવેદનમાં કહ્યું, “દુર્ભાગ્યથી રજત પાટીદાર એડીની ઈજાને કારણે IPL 2023માંથી બહાર થઈ ગયો છે અને અમને આશા છે કે રજત જલ્દી સ્વસ્થ થઈ જાય. સાથે જ અમે આ પ્રક્રિયામાં તેમનો સાથ આપીશું. જણાવી દઈએ કે રજત પાટીદાર એ જ ખેલાડી છે, જેણે વર્ષ 2022માં RCB માટે પ્લેઓફમાં શાનદાર સદી ફટકારી હતી.
રજત થોડા દિવસો પહેલા નેશનલ ક્રિકેટ એકેડમી, બેંગલુરુમાં રિહેબની પ્રક્રિયામાંથી પસાર થઈ રહ્યો હતો. તેઓ NCA ખાતે મેડિકલ ટીમની દેખરેખ હેઠળ હતા. હાલમાં તે પોતાના ઘરે છે અને ઈંગ્લેન્ડ જવા માટે તેના વિઝાની રાહ જોઈ રહ્યો છે.
