- ICC મેન્સ ટી20ની રેંકિંગમાં સૂર્યકુમાર ટોપ પર યથાવત
- 906નો અંક મેળવીને ટોપનું સ્થાન જાળવ્યું
- ટોપ-10 બોલર્સમાં એકપણ ભારતીય ખેલાડીનું નામ નથી
IPL 2023ની વાત કરીએ તો ભલે સૂર્યકુમાર યાદવનું પર્ફોમન્સ અત્યારસુધી થોડું નબળું રહ્યું હોય પરંતુ ICC મેન્સ ટી20ની રેંકિંગમાં તેમણે ટોપનું સ્થાન જાળવી રાખ્યું છે. સૂર્યકુમાર 906 અંકને સાથે લઈને લિસ્ટમાં પહેલા સ્થાન પર છે. જ્યારે પાકિસ્તાનનાં મોહમ્મદ રિઝવાન 811 અંક અને કેપ્ટન બાબર આઝમ 755 અંક સાથે દ્વિતીય-તૃતિય સ્થાન પર છે.દક્ષિણ આફ્રિકાનાં એડન માર્કરામ 748 અંક અને ન્યૂઝીલેન્ડનાં ડેવોન કોનવે 745 અંક સાથે 4-5માં ક્રમ પર છે. ભારતીય ક્રિકેટર વિરાટ કોહલી 15માં સ્થાન પર છે.
IPLનું ચરણ સૂર્યકુમાર માટે Unlucky
સૂર્યકુમાર માટે IPLનું આ ચરણ અત્યાર સુધી ખરાબ સાબિત થયું છે. તેમણે મુંબઈ ઈન્ડિયન્સ માટે પહેલી ત્રણ મેચોમાં 15, 1 અને શૂન્ય રન બનાવ્યાં છે. પાકિસ્તાનની ટીમનાં કેપ્ટન બાબર ત્રીજા સ્થાન પર છે અને તેમને શનિવારથી ન્યૂઝીલેન્ડની સામે પાકિસ્તાનની પાંચ મેચોની ટી20 આંતરરાષ્ટ્રીય સીરીઝમાં સૂર્યકુમારની નજીકનો આંકડો મેળવવાનો મોકો મળશે.
બોલર્સની લિસ્ટમાં રાશિદ ખાન ટોપ પર
ન્યૂઝીલેન્ડ અને શ્રીલંકાની વચ્ચે હાલમાં જ સમાપ્ત થયેલી ટી20 આંતરરાષ્ટ્રીય સીરીઝમાં ખેલાડીઓને ઉત્તમ પ્રદર્શન કરવાનો મોકો મળ્યો છે. જેમાં યુવા સ્પિનર મહીશ તીક્ષણા પોતાના કરિયરની સર્વશ્રેષ્ઠ રેટિંગ મેળવવામાં સફળ રહ્યાં છે. તો બોલર્સની રેન્કિંગમાં સંયુક્ત રૂપે તેઓ પાંચમા સ્થાન પર પહોંચ્યાં છે. અફઘાનિસ્તાનનાં સ્પિનર રાશિદ ખાન બોલર્સની લિસ્ટમાં ટોપનાં સ્થાન પર છે.
ટોપ-10 બોલર્સમાં એકપણ ભારતીય ખેલાડી નથી
બોલર્સની લિસ્ટમાં ટોપ-10માં કોઈપણ ભારતીય શામેલ નથી. બાંગ્લાદેશની આયરલેન્ડ પર જીત થતાં ટેસ્ટની રેન્કિંગમાં અનેક ફેરફારો આવ્યાં છે. મુશ્ફિકુર રહિમ 126 અને 51 રનનાં સ્કોરથી ટેસ્ટ બેટ્સમેનની લિસ્ટમાં 17માં સ્થાને પહોંચી ગયાં છે.તો તાઈજુલ ઈસ્લામ અને શાકિબ અલ હસનને બોલર્સની લિસ્ટમાં ફાયદો મળ્યો છે. તાઈજુલ 20માં સ્થાન પર પહોંચ્યાં છે.
