- વેરાવળમાં બેંક કર્મચારીએ ગ્રાહકોની મિલિભગતથી આચરી કરોડોની છેતરપિંડી
- એક્સિસ બેંકના કર્મચારીઓએ ગ્રાહકો સાથે મળી કરોડોનું કૌભાંડ આચર્યું
- નવા ગ્રાહકો બની આવેલા શખ્સોએ અસલી ગોલ્ડ મુકી ગોલ્ડ લોન લીધી
વેરાવળમાં આવેલી એક્સિસ બેન્કના કર્મચારીઓએ મોટી છેતરપીંડી આચરી હોવાની ચકચારી ઘટના સામે આવી છે. જેમાં કર્મચારીઓએ જ બેંકને ચુનો ચોપડતા પોલીસ તંત્ર દોડતું થયું છે. કર્મચારીઓએ બેન્કમાં નકલી સોનું રાખીને ગેરરીતિ આચરી હતી. ગોલ્ડ લોનના બદલામાં બેન્કમાં અસલી સોના જમા કરવામાં આવતું હતું. આ સોના સામે નકલી સોનુ મૂકી દીધું હતું. બાદમાં નવા ઉભા કરાયેલા ગ્રાહકોને લોન આપીને સમગ્ર કૌભાંડ અચરવામાં આવ્યું છે.
લોનના પૈસા બેંક કર્મચારીઓએ વહેંચી લીધા
ભેજાબાજ એક મહિલા અને બે પુરુષ આરોપીઓએ અસલી સોનું કાઢી લઈ નવા ગ્રાહકો ઉભા કર્યા હતા. બાદમાં નવા ગ્રાહકોએ અસલી સોનુ બેન્કમાં મુકી નવી લોન ઉઠાવી લીધી હતી અને આ લોન પેટે આવેલા રૂપિયા કર્મચારીઓ મીલીભગત કરી બાંટી લીધા હતા. આરોપીઓ બેંકમાં જમા અસલી સોનુ કાઢી નકલી સોનુ મુકી દેતા હતા. હાલ બેન્કના મહિલા કર્મચારી સાથે બે પુરુષ કર્મચારી મળી ત્રણની અટકાયત કરી લેવાઈ છે.
બેંક કર્મચારીઓએ બેંકમાં અસલી સોનું કાઢી નકલી સોનું મુકી દીધું
આ સમગ્ર કૌભાંડ સામે આવતા ખળભળાટ મચી ગયો છે. વેરાવળ બ્રાન્ચ, રાજકોટ રિજનલ મેનેજરની ફરિયાદ બાદ સમગ્ર મામલો પ્રકાશમાં આવ્યો છે. સમગ્ર મામલાની તપાસ હજુ 8 દિવસ સુધી ચાલે તેવી શક્યતા છે. હાલ 426 ગોલ્ડ લોન પૈકી 49 લોનમાં દાગીનામાં હેરાફેરી કરાઇ હોવાનું પણ પ્રાથમિક તપાસમાં બહાર આવ્યું છે. અંદાજિત 2 કરોડના 2 કિલો 74 ગ્રામ નકલી સોનું મુકી ગેરરીતિ આચરી હોવાનું ગીર સોમનાથ એસપી મનોહરસિંહ જાડેજાએ મીડિયા સાથેની વાતચીતમાં કહ્યું હતું.
