ચકચાર / વડોદરામાં કોંગ્રેસના મોટા નેતાના દીકરાનો મૃતદેહ તળાવમાંથી મળતા ખળભળાટ, રહસ્યમય રીતે થયો હતો ગુમ

• સાવલીના ગૂમ થેલા યુવકની મળી લાશ 
• ચાર દિવસ પહેલા ગૂમ થયો હતો યુવક 
• મંજુસર GIDCમાંથી ગૂમ,લાશ તળાવમાં મળી 

વડોદરાના સાવલી વિસ્તારમાં ચાર દિવસ અગાઉ ગુમ થયેલા યુવકની લાશ મળી આવતા ચકચાર મચી ગઈ છે. યુવક ચાર દિવસ અગાઉ મંજુસર GIDCમાંથી ગુમ થયો હતો અને તેનો મૃતદેહ અલીન્દ્રા ઝુમકાલ ગામની સીમના  તળાવમાંથી મળ્યો હતો.

વડોદરાના સાવલી ગામના પૂર્વ કોંગ્રેસ સમિતિના પ્રમુખ વિજય વાઘેલાનો પુત્ર ગુમ થયો હોવાની વાત ગામમાં પ્રસરી હતી. યુવક  કુલદીપ સિંહ વાઘેલા રહસ્યમય રીતે ચાર દિવસ અગાઉ મંજુસર GIDCમાંથી ગુમ થયો હતો. કેટલીય શોધ-ખોળ છતાં યુવકનો કોઈ પતો લાગ્યો નહતો. કહેવાય છે કે, કોઈ અજાણ્યા વટેમાર્ગુઓ દ્વારા  અલીન્દ્રા ઝુમકાલ ગામની સીમમાં તળાવમાં અજાણ્યા શખ્સનો મૃતદેહ હોવાની વાત મળતા જ ચકચાર મચી ગઈ હતી.તળાવમાં ગૂમ થયેલા યુવક  કુલદીપ સિંહ વાઘેલાનો મૃતદેહ હોવાની વાતને સમ્રથન મળ્યું હતું. ઘટનાની જાણ થતા જ ભાદરવા પોલીસ ઘટના સ્થળે પહોંચી અને બનાવની તપાસમાં લાગી ગઈ હતી.

મૃતક કુલદીપ સિંહ કેવી રીતે ગુમ થયો અને તેની લાશ સીમના તળાવમાંથી કેવી રીતે મળી તે બાબત પર પોલીસ તપાસ હાથ ધરી રહી છે. શું મંજુસર GIDCમાંથી કોઈ તેનું અપહરણ કરી ગયું હતું કે કોઈ મિત્રો સાથે ગયો હતો ? આ સઘળા તર્ક પર પોલીસ તપાસ હાથ ધરી રહી છે