- સુરતના કામરેજ નજીક તળાવમાંથી ત્રણ લાશથી ચકચાર
- યુવતી અને બે બાળકોની લાશ ખડસદના તળાવમાંથી મળી
- વાલીની ભાળ મેળવવા પોલીસ સોશિયલ મીડીયાના સહારે
દિવાળીના દિવસો દરમિયાનથી હત્યા,દુષ્કર્મ,અક્સમાત, દુર્ઘટના જેવી હચમચાવતી ઘટનાઓ પીછો નથી છોડી રહી .તેમાં પણ સુરતના પાંડેસરા,અને ગાંધીનગરની બાળકીઓ સાથે આચરાયેલા પાપાચાર પછી બાળક અંગેની કોઈ પણ ઘટના રૂંવાડા ઉભા કરી દે એ સ્વાભાવિક છે. આ વચ્ચે,સુરતના કામરેજ નજીકના ખડસદનાં તળાવમાંથી એક યુવતી અને બે બાળકોના મૃતદેહ મળતા ચકચાર મચી ગઈ છે. આ ત્રણે'ય કોણ છે અને તેના વાલી અંગે કોઈ કડી મળતી ના હોવાથી સોશિયલ મીડીયાના માધ્યમથી વાલી-વારસ શોધવા પોલીસે કવાયદ હાથ ધરી છે.
એક યુવતી અને બે બાળકોનાં મૃતદેહ
આ બે બાળકો અને યુવતીના મોત આકસ્મિક કે પૂર્વનિયોજિત ઘટના કે પછી શું ? એ અંગે ભારે તર્ક -વિતર્ક વહેતા થયા છે. હાલ તો પોલીસ વિભાગના શ્વાસ પણ અદ્ધર થઇ ગયા છે કે આ બે બાળકો અને યુવતી અંગે ભાળ મેળવવી કેવી રીતે ? કોણ હશે અને ક્યાંના હશે ? જણાવી દઈએ કે, મૃતકમાં એક યુવતી જેની ઉમર અંદાજે 20 વર્ષની હોય શકે જ્યારે અન્ય બે બાળકો,જેઓની અંદાજે ઉમર 11 અને 13 વર્ષ વચ્ચેની હોવાનું અનુમાન છે.
બે ત્રણ દિવસ પહેલાની ઘટનાનું અનુમાન
તળાવમાંથી બાળકોની લાશ મળતા ફાયર વિભાગે મૃતદેહ બહાર કાઢતા ઉમેર્યું કે, મૃતદેહ જોતા લાગે છે કે, ઘટના બેથી ત્રણ દિવસ પહેલાની હોઈ શકે. બાળકોની લાશ વિકૃત થઇ ગઈ છે અને આ પરિણામે મૃતદેહ તુરંત જ કોઈ ઓળખી શકે તેવી સ્થિતિ નથી. પાણીમાં રહેવાના કારણે મૃતદેહ ફૂલી પણ ગયા છે. હવે આસપાસનાં વિસ્તારોમાંથી બાળકો ગૂમ થયા અંગેની કોઈ ફરિયાદ સામે આવે તો એ દિશામાં કઈ વિગત મળી શકે છે. અત્યારની સ્થિતિમાં તો ગામથી તળાવ ઘણું દૂર છે તેમજ આ કોઈ પ્રવાસન સ્થળ પણ ના હોવાના કારણે, બાળકો કોણ છે ? ક્યાંથી આવ્યા હશે ? તેની કોઈ કડી નથી.
પોલીસ સોશિયલ મીડીયાના સહારે
આ પરિણામે સોશિયલ મીડીયાના માધ્યમનો સહારો લઇ બાળકો અને યુવતીની ભાળ મેળવવા પ્રયાસ કરવામાં આવ્યા છે. શું આ ત્રણ બાળકો સગા ભાઈ બહેન છે ? એ દિશામાં પણ પોલીસ વિચારી રહી છે.
