હજુ કેટલાંના જીવ લેશે? / રાજકોટમાં 12 કલાકમાં 3 મોત, તો બીજી બાજુ સુરત, જેતપુર, અમદાવાદ અને મહેસાણામાં પણ હાર્ટ એટેકથી 4ના મોત

• રાજકોટમાં શિક્ષક સહિત ત્રણના લોકોના મૃત્યુ
• સુરતમાં ગરબા રમતા-રમતા યુવકનું મોત નીપજ્યું 
• જેતપુરમાં વધુ એક યુવાનનું હાર્ટ એટેકથી મોત
• અમદાવાદમાં કોંગ્રેસ નેતાને આવ્યો હાર્ટએટેક 
• મહેસાણામાં હાર્ટએટેકથી 65 વર્ષીય વ્યક્તિનું મૃત્યુ 

Heart Attack News:  કોરોના કાળ પછી સૌથી મોટી ઉપાધિ સમાન યુવાઓમાં હાર્ટ એટેકના કિસ્સાઓ વધી રહ્યા છે. જેને લઇને મેડિકલ જગત પણ ચિંતિત છે અને આ પાછળનું ચોક્કસ કારણ જાણવા માટે  મથામણ કરી રહ્યું છે. આવી સ્થિતિ વચ્ચે હૃદય રોગના હુમલાના કારણે છેલ્લા 24 કલાકમાં ગુજરાતમાં 7થી વધુ લોકોના મૃત્યુ નિપજ્યાં છે. હાર્ટ એટેકથી મોતના કારણે મૃતકોના પરિવારજનોમાં પણ કાળો કલ્પાત ફેલાયો છે અને પરિજનોના જાણે આંસુ ન સુકાતા હોય તેવી સ્થિતિનું નિર્માણ થયું છે. અહીં સૌથી ચોંકાવનારી બાબત તો એ છે કે રાજકોટમાં જ છેલ્લા 12 કલાકમાં 3 લોકોના હ્રદય થંભી ગયા છે. 

રાજકોટમાં 12 કલાકમાં ત્રણના મોત 
મળતી માહિતી અનુસાર, રાજકોટમાં 12 કલાકમાં એક શિક્ષક સહિત ત્રણ લોકોના હાર્ટ અટેકથી મૃત્યુ થયા છે. જેમાં 24 વર્ષના રણજીત યાદવનું હાર્ટ અટેકથી મૃત્યુ થયું છે. તો 40 વર્ષીય આશિષ અકબરીનું પણ હાર્ટ અટેકથી મૃત્યુ થયું છે. 43 વર્ષના દિપક વેકરિયાને છાતીમાં દુખાવો ઉપડતા તેઓને સારવાર માટે હોસ્પિટલમાં ખસેડાયા હતા. જ્યાં સારવાર દરમમિયાન તેમનું મૃત્યુ નિપજ્યું હતું. રાજકોટમાં 12 કલાકમાં ત્રણના હાર્ટ એટેકથી મોત થતાં તબીબી નિષ્ણાંતો ચિંતામાં મુકાયા છે. 

સુરતમાં ગરબા રમતા રમતા યુવકનું મોત
સુરતના માંડવી વિસ્તારમાં યુવકનું હાર્ટ એટેકથી મોત થયું છે. મુકેશ ગામીત નામનો યુવક ગઈકાલે રાત્ર ગરબા રમી રહ્યો હતો. આ દરમિયાન તેને અચાનક છાતીમાં દુખાવો થતાં તે ઢળી પડ્યો હતો. જેથી પરિવારજનો મુકેશને તાત્કાલિક સારવાર માટે લઇ ગયા હતા. સારવાર દરમિયાન ફરજ પરના ડોક્ટરે યુવકને મૃત જાહેર કર્યો હતો. મુકેશના મૃત્યુના સમાચારથી પરિવારની માથે આભ ફાટી પડ્યું છે. 

22 વર્ષના યુવકનું હાર્ટ એટેકથી મોત
જેતપુરમાં પણ 22 વર્ષીય યુવકનું હાર્ટ એટેકથી મોત થયું છે. મળતી માહિતી અનુસાર જેતપુરના ખજુરી ગુંદાળામાં રહેતા 22 વર્ષીય કિશન મનુભાઇ મકવાણા નામનો યુવક પોતાના ઘરે બેઠો હતો, ત્યારે અચાનક તેને છાતીમાં દુખાવો ઉપડ્યો હતો. જેથી પરિવારજનો તેને લઈને તાત્કાલિક હોસ્પિટલ ખાતે પહોંચ્યા હતા. જોકે, કિશનને સારવાર મળે તે પહેલા જ તેણે દુનિયાને અલવિદા કહી દીધું હતું. હાલ યુવાનના મૃતદેહને પોસ્ટમોર્ટમ માટે ખસેડાયો છે.મ

અમદાવાદમાં હાર્ટ અટેકથી વધુ એક યુવાને ગુમાવ્યો જીવ
રાજ્યમાં હાર્ટએટેકથી મૃત્યુના કેસમાં સતત વધારો થયો છે. અમદાવાદ શહેર કોંગ્રેસના સોશિયલ મીડિયા વિભાગના મંત્રીનું હાર્ટએટેકથી નિધન થયું છે. પ્રાપ્ત વિગતો અનુસાર, શહેરના ચાંદખેડા વિસ્તારમાં રહેતા 36 વર્ષીય વિશાલ સોલંકીનું હાર્ટ એટેકથી અવસાન થયું છે. 

મહેસાણામાં હાર્ટએટેકથી 65 વર્ષીય વ્યક્તિનું મૃત્યુ 
તો મહેસાણામાં પણ સમાન બનાવ જ સામે આવ્યો છે. મહેસાણાના વિજાપુરના ખરોડ ગામે હાર્ટ એટેકથી 65 વર્ષીય વ્યક્તિનું મૃત્યુ થયું છે. ખરોડ ગામના રહેવાસી દશરથ પટેલને ગતરોજ હાર્ટ એટેક આવ્યો હતો. જેથી તેમનું ઓન ધ સ્પોટ જ મૃત્યુ થઈ ગયું હતું. તેમના મૃત્યુથી પરિવારજનોમાં શોકનો માહોલ ફેલાયો છે.