- ‘તું પોલીસને મારી બાતમી આપે છે કહી હુમલો
- યોગેશ નામના શખ્સે પોલીસના બાતમીદારના ગળા પર છરી ફેરવી દીધી
- અલ્પેશ ઠાકોરે પોલીસને તેની બાતમી આપી હોવાની શંકા
‘તું પોલીસને મારી બાતમી આપે છે અને તેં જ મને જેલમાં મોકલ્યો હતો’ કહીને યોગેશ નામના શખ્સે પોલીસના બાતમીદારના ગળા પર છરી ફેરવી દીધી હોવાની ચોંકાવનારી ઘટના સામે આવી છે. યોગેશને શંકા હતી કે અલ્પેશ ઠાકોરે પોલીસને તેની બાતમી આપી છે. આ શંકાના આધારે તેણે મોડી રાતે બબાલ કરી હતી. અલ્પેશ નોકરી પતાવીને ઘરે જતો હતો ત્યારે તે બનેવીને મળવા માટે ઊભો રહ્યો હતો, જ્યાં મામલો બીચક્યો હતો.
યોગેશ ઉર્ફે ગનિયા પવાર વિરુદ્ધ મારામારીની ફરિયાદ
બાપુનગર વિસ્તારમાં આવેલા ગુજરાત હાઉસિંગ બોર્ડના મકાનમાં રહેતા અલ્પેશ ઠાકોરે બાપુનગર પોલીસ સ્ટેશનમાં યોગેશ ઉર્ફે ગનિયા પવાર વિરુદ્ધ મારામારીની ફરિયાદ કરી છે. અલ્પેશ ઠાકોર પરિવાર સાથે રહે છે અને બાપુનગરમાં શ્રેયા એપ્રોઇન્સ નામની દુકાનમાં નોકરી કરીને ગુજરાન ચલાવે છે. ગઇ કાલે અલ્પેશ નોકરી પૂરી કરીને ઘરે આવતો હતો તે વખત બાપુનગર પોસ્ટ ઓફિસ ખાતે તેના બનેવી જૈમિન ઠાકોર યોગેશ પવાર નામના યુવક સાથે ઊભા હતા.
ઇજાગ્રસ્ત અલ્પેશને સારવાર માટે હોસ્પિટલમાં લઇ જવાયો
અલ્પેશ બનેવીને મળવા માટે ગયો હતો જ્યા યોગેશ ઉશ્કેરાયો હતો અને કહેવા લાગ્યો હતો કે તું મારા વિશે ચડામણી કરે છે. તું મારી બાતમી આપે છે અને તેં જ મને અગાઉ જેલમાં મોકલ્યો હતો. અલ્પેશ ચૂપચાપ યોગેશની વાત સાંભળતો હતો ત્યારે તે ઉશ્કેરાયો હતો અને ગાળો બોલવાની શરૂ કરી દીધી હતી. અલ્પેશે ગાળો બોલવાની ના પાડતાંં યોગેશે તેના પર હુમલો કરી દીધો હતો. યોગેશ ક્યાંકથી છરી લઇને આવ્યો હતો અને અલ્પેશના ગળામાં ફેરવી દીધી હતી. ઇજાગ્રસ્ત અલ્પેશને સારવાર માટે હોસ્પિટલમાં લઇ ગયા હતા જ્યારે બાપુનગર પોલીસે યોગેશ વિરુદ્ધ ગુનો દાખલ કર્યો હતો.
