પરિપત્ર / ધારાસભ્ય, સાંસદ, મેયર ફોન કરે તો ઉપાડો, મિસ્ડ કૉલ થાય તો સામેથી કરો: ગુજરાત સરકારે અધિકારીઓને આપવો પડ્યો આદેશ

• અધિકારીઓને પદાધિકારીઓના નંબર સેવ રાખવાની સૂચના
• ચૂંટાયેલા પદાધિકારીઓના નંબર રાખવા પડશે સેવ
• ફોન ઉપાડીને વિવેકપૂર્ણ ભાષામાં આપવો પડશે જવાબ

ગુજરાત સરકાર દ્વારા એક પરિપત્ર જાહેર કરીને સરકારી અધિકારીઓને મહત્વના આદેશો આપવામાં આવ્યા છે. પરિપત્રમાં સરકારી અધિકારીઓએ ચૂંટાયેલા પદાધિકારીઓના ફોન નંબર સેવ રાખવાની અને તેમના ફોન ઉપાડીને વિવેકપૂર્ણ ભાષામાં જવાબ આપવાની સૂચના આપવામાં આવી છે. 

સરકારી અધિકારીઓને અપાઈ સૂચના 
ગુજરાત સરકારના સામાન્ય વહીવટ વિભાગના નાયબ સચિવ રાજેન્દ્રસિંહ રાઠોડ દ્વારા જાહેર કરવામાં આવેલા પરિપત્રમાં જણાવવામાં આવ્યું છે કે, સંસદ તથા વિધાનસભાના સભ્ય કે પ્રજાના ચૂંટાયેલા અન્ય પદાધિકારીઓ જેમ કે જિલ્લા/તાલુકા પંચાયતના પ્રમુખો, નગરપતિ કે મેયરના સંપર્ક નંબરો સેવ રાખવાના રહેશે.

વ્યસ્ત હોય તો પછી ફોન કરવાનો રહેશે
તેમજ તેમના દ્વારા સરકારી અધિકારીઓને કચેરી સમય દરમિયાન તેમની કચેરીના લેન્ડલાઈન ફોન ઉપર સંપર્ક કરે અને કોઈ સંજોગોમાં સંબંધિત અધિકારી જે તે સમયે ઉપસ્થિત ન હોય અથવા તો મિટિંગ કે અન્ય રીતે વ્યસ્ત હોય અને તેથી ચૂંટાયેલા પદાધિકારી સાથે વાત કરી શકે તેમ ન હોય તેવા સંજોગોમાં આવા અધિકારીએ જ્યારે પણ તે કચેરીમાં પરત ફરે અથવા તો વ્યસ્તતામાંથી છૂટા થાય ત્યારે તુરંત જ આવા ચૂંટાયેલા પદાધિકારીઓને સામેથી ફોન કરવો.

ફોન કરનારની બનાવવી પડશે યાદી
પરિપત્રમાં લખ્યું છે કે ચૂંટાયેલા પદાધિકારી જ્યારે સરકારી અધિકારીને તેમની કચેરીના ફોન ઉપર ફોન કરે ત્યારે તેમની ગેર હાજરીમાં ફોન ઉપાડનાર કર્મચારી ખાસ કરીને અધિકારીના અંગત મદદનીશ કે રહસ્ય સચિવ આ ફોનની નોંધ કરી તેની યાદી રાખશે, જે સંબંધિત અધિકારી કચેરીમાં આવે કે તરત જ તેમના ધ્યાન પર આ નોંધની યાદી મુકવાની રહેશે. 

તમામ વિભાગોને અપાઈ સૂચનાઓ
ઉપરોક્ત સૂચનાઓનું ચુસ્તપણે અને યોગ્ય રીતે પાલન કરવા સચિવાલયના સર્વે વિભાગોને જણાવવામાં આવે છે તથા આ સૂચનાઓની તેઓના તાબા હેઠળના સર્વે ખાતાના વડા, કચેરીઓના વડા, બોર્ડ, કોર્પોરેશન તથા નિગમના વડાઓને જાણ કરવા તથા અમલ કરવાની જરૂરી સૂચના આપવા જણાવવામાં આવે છે. 

મહુવાના ધારાસભ્યએ ઉઠાવ્યો હતો મુદ્દો
અત્રે ઉલ્લેખનીય છે કે, છેલ્લા ઘણા સમયથી ચૂંટાયેલા પદાધિકારીઓનું સરકારી બાબુઓ સાંભળતા ન હોઈ પદાધિકારીઓ બેબાકળા બન્યા છે. ત્યારે તાજેતરમાં જ મહુવા ધારાસભ્ય મોહન ઢોડિયા દ્વારા આ બાબતે સંકલનની બેઠકમાં મુદ્દો ઉઠાવતા આ મુદ્દો ચર્ચાસ્પદ બન્યો હતો. જેને લઈને સામાન્ય વહીવટી વિભાગ દ્વારા આ પરિપત્ર જાહેર કરવામાં આવ્યો છે.