- ભાદર નદીમાંથી મળ્યો હતો યુવકનો મૃતદેહ
- ગોંડલ પોલીસે હત્યાનો ભેદ ઉકેલ્યો
- આરોપીઓની પૂછપરછમાં થયા ચોંકાવનારા ખુલાસા
- પતિ અને દેવર સાથે મળીને પ્રેમીને મોતને ઘાટ ઉતારી દીધો
થોડા સમય પહેલા રાજકોટ જિલ્લાના જામકંડોરાણા નજીક આવેલી ભાદર નદીમાંથી એક લાશ મળી આવી હતી. જેથી પોલીસે તપાસના ચક્રો ગતિમાન કર્યા હતા. આ દરમિયાન ચોંકાવનારી વિગત સામે હતી. પોલીસ તપાસમાં સામે આવ્યું કે યુવકની હત્યા કરીને લાશ ફેંકી દેવામાં આવી છે. મૃતકનું નામ શીવા ઘુંઘવાળા ગીર સોમનાથના ગીર ગઢડાના હરમડીયા ગામનો વતની હતો અને તેને દુધીવદરની એક પરિણીતા સાથે પ્રેમ સંબંધ હતો. પણ પ્રેમિકાએ દગો દઈને પોતાના પતિ અને દેવર સાથે મળીને પ્રેમીને મોતને ઘાટ ઉતારી દીધો હતો અને લાશ ભાદર નદીમાં ફેંકી દીધી હતી. જોકે, પોલીસે પ્રેમિકા, તેના પતિ અને દેવરની ધરપકડ કરીને તપાસ હાર ધરી છે.
નદીમાંથી મૃતદેહ મળી આવ્યા બાદ કરાઈ તપાસ
ગોંડલના DYSP કિશોરસિંહ ઝાલાએ સમગ્ર બનાવ અંગે માહિતી આપતા કહ્યું કે, રાજકોટ જિલ્લાના જામકંડોરણા તાલુકાના ભાદર નદીમાંથી એક અજાણ્યા પુરુષની તરતી હાલતમાં લાશ મળી આવી હતી. જેથી પોલીસની અલગ અલગ ટીમો બનાવવામાં આવી હતી અને તપાસ હાથ ધરવામાં આવી હતી. આ દરમિયાન પોલીસે મૃતકના ભાઈની પૂછપરછ કરી હતી. જેમાં જાણવા મળ્યું હતું કે પ્રેમિકા રેશમા, તેનો પતિ હતરિયા ડાવર અને દેવર મુકેશસિંગ ડાવર આ હત્યામાં સામેલ છે. જેથી તેમની પૂછપરછ કરવામાં આવી હતી.
મૃતક અને પરિણીતા વચ્ચે હતો પ્રેમ સંબંધ
પૂછપરછમાં સામે આવ્યું હતું કે, રેશમા અને મૃતક શીવા વચ્ચે છેલ્લા ઘણા સમયથી પ્રેમ સંબંધ હતો. મૃતક શીવા વારંવાર રેશમાને ફોન કરતો હતો. જેથી રેશમના પતિ અને દેવરે શીવાની હત્યા કરવાનું નક્કી કર્યુ હતું. જેથી રેશમાએ ફોન કરીને શીવાને બોલાવ્યો હતો. જે બાદ તેને પોતાનો ફોન બંધ કરી દીધી હતો. જેથી શીવા ગીર સોમનાથથી દુધીવદર આવ્યો હતો. જ્યાં રેશમાના પતિ અને દેવરે મળીને શીવાને છરી અને કુહાડીના ઘા મારીને મોતને ઘાટ ઉતાર્યો હતો અને બાદમાં તેની લાશને ભાદર નદીમાં ફેંકી દીધી હતી.
પતિ અને દેવરે મળી કરી હતી હત્યા
હાલ તો પોલીસે પ્રેમિકા રેશમા, તેનો પતિ હતરિયા ડાવર અને દેવર મુકેશસિંગ ડાવરના નિવેદન નોંધીને ત્રણેયની ધરપકડ કરી છે. પોલીસે ત્રણેયને જેલના હવાલે કરીને આગળની કાર્યવાહી હાથ ધરી છે.
