દુર્ઘટના / રાજકોટના નવાગામ નજીક ગંભીર અકસ્માત: નિર્માણાધીન પુલ સાથે બાઈક અથડાતા 2ના મોત, એકની હાલત ગંભીર

• રાજકોટના ગોમટા-નવાગામ પાસે ભયાનક અકસ્માત
• નિર્માણાધીન પુલ સાથે બાઈક અથડાતા 3 લોકો પડ્યા ખાડામાં 
• 2 લોકોના કરૂણ મોત, એક ગંભીર રીતે ઈજાગ્રસ્ત 

રાજ્યમાં અવાર નવાર અનેક અકસ્માતની ઘટનાઓ સામે આવતી રહે છે, આ અકસ્માતની ઘટના દરમિયાન અનેક લોકોના મૃત્યુ થાય છે. થોડી પણ બેદરકારી પોતાના જીવને તો જોખમમાં મુકે છે સાથે અન્ય નિર્દોષ લોકોને પણ આનો ભોગ બનવું પડે છે. ત્યારે રાજકોટમાંથી વધુ એક અકસ્માતનો બનાવ સામે આવ્યો છે. જેમાં બે લોકોના કમકમાટીભર્યા મોત નીપજ્યાં છે, જ્યારે એક ઈજાગ્રસ્તને સારવાર અર્થે હોસ્પિટલમાં ખસેડવામાં આવ્યા છે.

પુલ સાથે બાઈક અથડાતા ત્રણેય પડ્યા ખાડામાં 
મળતી માહિતી અનુસાર, ગોંડલ તાલુકાના ગોમટા ગામે રહેતા અને છૂટક મજૂરી કરી જીવન નિર્વાહ ચલાવતા પરપ્રાંતિય દેવાભાઈ સોમાભાઈ વાસકલ,  તેમનો દીકરો વિપુલ (ઉં.વ 23)  અને જીગાભાઈ મોતીભાઈ તાદડ (ઉં.વ 50) સોમવારે સાંજે ગોમટા-નવાગામ રોડ પરથી બાઇક પર પસાર થઈ રહ્યા હતા. આ દરમિયાન નિર્માણાધીન પુલ સાથે બાઈક અથડાતા ત્રણેય ખાડામાં પડ્યા હતા.

એકનું સારવાર દરમિયાન મોત 
જે બાદ ત્રણેયને 108 એમ્બ્યુલન્સ દ્વારા સારવાર માટે ગોંડલની સિવિલ હોસ્પિટલ ખાતે પહોંચાડવામાં આવ્યા હતા. જ્યાં સારવાર દરમિયાન દેવાભાઈનું મોત નીપજ્યું હતું. જ્યારે વિપુલ અને જીગાભાઈને ગંભીર ઈજા થઈ હોવાથી વધુ સારવાર માટે રાજકોટ ખસેડવામાં આવ્યા હતા. જ્યાં રસ્તામાં જીગાભાઈએ પણ દમ તોડી દીધો હતો. 

પરિવારજનો ઉપર આભ તૂટી પડ્યું 
આ ઘટના દુર્ઘટના બાદ મૃતકના પરિવારજનો ઉપર શોકનું મોજું ફરી વળ્યું છે. હાલ વિપુલ દેવાભાઈ વાસકલની રાજકોટની હોસ્પિટલમાં સારવાર ચાલી રહી છે. આ મામલે પોલીસે વધુ તપાસ હાથ ધરી છે.