અકસ્માત / આણંદ બાદ હવે જામનગરમાં હિટ એન્ડ રન: પુલ નીચે સૂઈ રહેલા શખ્સને 200 મીટર સુધી કાર ચાલકે ઢસડ્યો, જુઓ પછી શું બન્યું

• જામનગરમાં આંબેડકર બ્રિજ નીચે હિટ એન્ડ રનની ઘટના 
• પુલ નીચે સૂઈ રહેલા વ્યક્તિને કારે 200 મીટર ઢસેડ્યા
• અકસ્માત બાદ અજાણ્યો કાર ચાલક થયો ફરાર 

જામનગર શહેરમાંથી હિટ એન્ડ રનનો બનાવ સામે આવ્યો છે. જેમાં શહેરના આંબેડકર બ્રિજ નીચે સૂતેલા એક વ્યક્તિને કારચાલકે અડફેટે લઈ 200 મીટર સુધી ઢસેડ્યા હતા. આ અકસ્માતની ઘટનામાં આ વ્યક્તિને ગંભીર ઈજાઓ પહોંચી છે. પોલીસે અજાણ્યા કારચાલક સામે ગુનો નોંધી તેની શોધખોળ હાથ ધરી છે.  

અકસ્માત બાદ અજાણ્યો કાર ચાલક થયો ફરાર 
મળતી માહિતી અનુસાર, જામનગરના આંબેડકર બ્રિજ નીચે ગઈકાલે રાત્રે કનુભાઈ માધવજી રાઠોડ સૂતા હતા. આ દરમિયાન મોડી રાત્રે એક કારચાલકે બ્રિજની નીચે સૂતેલા કનુભાઈને અડફેટે લીધા હતા અને તેમને અંદાજે 200 મીટર સુધી ઢસેડ્યા હતા. આ અકસ્માતમાં તેઓ ગંભીર રીતે ઈજાગ્રસ્ત થયા હતા. જોકે, અકસ્માત સર્જી કારચાલક ફરાર થઈ ગયો હતો. 

પોલીસે કારચાલકની શોધખોળ હાથ ધરી
આ અકસ્માતને પગલે મોટી સંખ્યામાં લોકો એકઠા થઈ ગયા હતા. રાહદારીઓ દ્વારા તાત્કાલિક 108 એમ્બ્યુલન્સને બોલાવી કનુભાઈને સારવાર અર્થે જી.જી હોસ્પિટલમાં ખસેડાયા હતા. આ અંગેની જાણ પોલીસને કરાતા પોલીસ પણ જી.જી હોસ્પિટલ ખાતે દોડી આવી હતી. હાલ પોલીસે અજાણ્યા કાર ચાલક સામે ગુનો નોંધીને વધુ તપાસ હાથ ધરી છે.