હિરણ નદીમાં કપડા ધોતા સમયે મહિલાને આવ્યો હાર્ટએટેક
ગાભા ગામના નિકુંજ પરમાર નામના વ્યક્તિનું હાર્ટએટેકથી મૃત્યુ
સાબરકાંઠામાં હાર્ટએટેકથી વધુ એક યુવાનનું મોત
Heart Attack News: ગુજરાતમાં નાની વયે હાર્ટ અટેકના કેસ સતત વધી રહ્યાં છે. હાર્ટ અટેકના કારણે મૃત્યુના કિસ્સાએ ચિંતા વધારી છે. કોરોના પછી ખાસ કરીને યુવાનોમાં હાર્ટ એટેકથી મોતનું પ્રમાણ ચિંતાજનક રીતે વધી ગયું છે. આ મામલે જુદા-જુદા તબીબો અલગ-અલગ કારણો આપી રહ્યા છે. આમ છતાં અચાનક યુવાનોમાં હાર્ટ એટેકનું પ્રમાણ કેમ વધી ગયું છે તેની પાછળનું કોઈ ચોક્કસ કારણ હજુ સુધી બહાર આવ્યું નથી. ગુજરાતના અલગ-અલગ જિલ્લાઓમાં આજે ફરી હાર્ટ એટેકથી 3 લોકોના મૃત્યુ થયા છે. જેમાં ગીર સોમનાથ જિલ્લામાં હાર્ટ એટેકથી 2 લોકોના નિધન થયા છે. જ્યારે સાબરકાંઠામાં હાર્ટ એટેકથી એક યુવાનનું મૃત્યુ નિપજ્યું છે. આ તમામના મોતથી પરિવાર પર આભ તૂટી પડ્યું છે.
કપડા ધોતી વખતે મહિલાને આવ્યો હાર્ટ એટેક
છેલ્લા 24 કલાકમાં ગીર સોમનાથના તાલાલામાં હાર્ટ એટેકથી 2ના મોત થયા છે. જેમાં એક મહિલાનો પણ સમાવેશ થાય છે. પ્રાપ્ત વિગતો અનુસાર, તાલાલાની હિરણ નદીમાં કપડા ધોતી વખતે મહિલાને હાર્ટ એટેક આવ્યો હતો. જેબુનબેન અહેમદ નામના મહિલાનું હાર્ટ એટેક આવતા મૃત્યુ નિપજ્યું હતું. જેબુનબેન નદીના કાંઠે કપડા ધોતી વખતે અચાનક બેભાન થઈને ઢળી પડ્યા હતા. જે બાદ તેમના પરિવારજનો તેમને લઈને હોસ્પિટલ ખાતે પહોંચ્યા હતા. જ્યાં ફરજ પર હાજર તબીબોએ તેમને મૃત જાહેર કર્યા હતા.
ગાભા ગામના નિકુંજનું હાર્ટ એટેકથી મોત
તો બીજા બનાવની વાત કરીએ તો ગીર સોમનાથના ગાભા ગામમાં પણ એક વ્યક્તિનું હાર્ટ એટેકથી નિધન થયું છે. પ્રાપ્ત વિગતો અનુસાર, ગીર સોમનાથના ગાભા ગામના નિકુંજ પરમાર નામના વ્યક્તિને હાર્ટ એટેક આવ્યો હતો. જેમાં તેને હોસ્પિટલમાં સારવાર મળે તે પહેલા જ મૃત્યુ નિપજ્યું હતું. નિકુંજ પરમારના અકાળે અવસાનથી પરિવારમાં માતમ છવાયો છે.
મૃતકઃ નિકુંજ પરમાર
છાતીમાં દુખાવો ઉપડ્યા બાદ ભરત પટેલ ઢળી પડ્યા
સાબરકાંઠા જિલ્લામાં પણ એક યુવકનું હ્રદય થંભી જતાં મૃત્યુ નિપજ્યું છે. સાબરકાંઠાના સાબલવાડ કંપાના રહેવાસી ભરત પટેલને ગઈકાલે રાતે છાતીમાં દુખાવો ઉપડ્યો હતો, જે બાદ તેઓ અચાનક ઢળી પડ્યા હતા. જેથી તેમને લઈને પરિવારજનો હોસ્પિટલ ખાતે પહોંચ્યા હતા. જ્યાં ફરજ પર હાજર તબીબોએ ભરત પટેલને મૃત જાહેર કર્યા હતા. સાબરકાંઠામાં એક સપ્તાહમાં હાર્ટ એટેકથી મોતની બીજી ઘટના સામે આવી છે.
મૃતકઃ ભરત પટેલ
હાર્ટ એટેકથી જ હ્રદય બંધ થઈ જાય છેઃ આર. એસ ત્રિવેદી
રાજ્યમાં સતત વધી રહેલા હાર્ટ એટેકના બનાવ પર રાજકોટ સિવિલ હોસ્પિટલના સુપ્રિન્ટેડન્ટ આર.એસ ત્રિવેદીએ જણાવ્યું કે, પોસ્ટ મોર્ટમ રિપોર્ટમાં હાર્ટ એટેકથી જ હ્રદય બંધ થઈ જાય છે તેવું સામે આવ્યું છે. આવા કેસોમાં અન્ય કોઈ કારણ જણાતું નથી. હાર્ટ એટેક આવવા પાછળના અલગ-અલગ કારણો હોઈ શકે છે. જેમ કે કોઈને સ્ટ્રેસ હોય, કોઈને ચિંતા હોય, કોઈને વધારે હરખ હોય, કોઈને બ્લડપ્રેશરની બીમારી હોય તો પણ આવું થઈ શકે છે. ચોક્કસ કારણ હ્રદય બંધ થઈ જવું જ આવે છે.
