તાપમાન / વરસાદ હાથતાળી વચ્ચે અમદાવાદ ગુજરાતનાં હોટેસ્ટ સિટીમાં બીજા ક્રમાંકેઃ લોકો બફારાથી ‘ત્રસ્ત’, આ શહેર સૌથી ગરમ

• રાજ્યમાંથી વરસાદે વિરામ લીધો છે
• ઘણાં જિલ્લાઓમાં ગરમીનો પારો ઊંચકાયો
• ભાવનગર રાજ્યનું હોટેસ્ટ સિટી બન્યું

શહેરમાં લાંબા સમયથી વરસાદે વિરામ લીધો છે અને વચ્ચે વચ્ચે વરસાદી ઝાપટાં પડી રહ્યાં છે, જોકે હજુ લોકો વરસાદ માટે તરસે છે. હવે ગરમીનો પારો ઊંચકાયો છે. ગઈ કાલે અમદાવાદ ૩૪.૬ ડિગ્રી સેલ્સિયસ મહત્તમ તાપમાન સાથે ગુજરાતનાં હોટેસ્ટ સિટીમાં બીજા ક્રમાંકે આવ્યું હતું. હવે અમદાવાદમાં ગરમીમાં થયેલો વધારો ચર્ચાસ્પદ બન્યો છે, જ્યારે ભાવનગર ૩પ.પ ડિગ્રી ગરમી સાથે રાજ્યનું સૌથી હોટેસ્ટ સિટી બન્યું છે. 

રાજ્યમાં ગરમી વધી 
અમદાવાદ સહિત રાજ્યભરમાંથી વરસાદે વિદાય લીધી છે, જેના કારણે સ્વાભાવિકપણે સમગ્ર રાજ્યમાં ગરમી વધી છે. પાટણમાં ૩૩ ડિગ્રી, રાજકોટમાં ૩૩ ડિગ્રી, ભૂજમાં ૩ર.ર ડિગ્રી અને ગાંધીનગરમાં ૩૧.પ‌ ડિગ્રી સેલ્સિયસ ગરમી નોંધાઈ હતી. આમ, સમગ્ર ગુજરાતમાં ગરમીના વધતા પ્રમાણે લોકોમાં   નવી ચર્ચા જગાડી છે. વરસાદ હજુ પણ મચક આપે તેમ લાગતું નથી એટલે આગામી દિવસોમાં ગરમીનું પ્રમાણ જળવાઈ રહેશે.

સવારે પણ ગરમીનો પારો ઊંચકાયો
શહેરમાં આજે સવારે પણ ગરમીનો પારો ઊંચકાયો હતો અને ર૬.૩ ‌ડિગ્રી   લઘુતમ તાપમાન નોંધાયું હતું, જે સામાન્ય તાપમાન કરતાં એક ડિગ્રી વધુ હતું, જ્યારે આજે સવારના ૮.૩૦ વાગ્યે હવામાંનો ભેજ ૮પ ટકા નોંધાયો હતો. સ્થાનિક હવામાન વિભાગની આગાહીમાં જણાવ્યા મુજબ શહેરમાં આગામી ૩૦ ઓગસ્ટ સુધી ભારે વરસાદ પડવાની કોઇ શક્યતા નથી. શહેરમાં આ દિવસોમાં વાદળછાયું વાતાવરણ રહેશે તેમ પણ હવામાન વિભાગ જણાવે છે. 

વરસાદની આગાહી
હવામાન વિભાગે રાજ્યમાં વરસાદ અંગે કરેલી આગાહીને તપાસતાં આજે   બનાસકાંઠા, સાબરકાંઠા, સુરત, ડાંગ, તાપી, નવસારી, વલસાડ, દમણ, દાદરા-નગર હવેલી, જૂનાગઢ, અમરેલી, ભાવનગર, ગીર-સોમનાથ અને દીવમાં હળવાથી મધ્યમ પ્રકારનો વરસાદ થઈ શકે છે, જ્યારે આવતી કાલે દક્ષિણ ગુજરાતના તમામ જિલ્લામાં ગાજવીજ સાથે વરસાદ પડવાની સંભાવના હવામાન વિભાગની આગાહીમાં દર્શાવાઈ છે.

સામાન્ય વરસાદ પડવાની શક્યતા
જ્યારે ર૭ ઓગસ્ટે સુરત, ડાંગ, નવસારી, વલસાડ, દમણ, દાદરા-નગર હવેલી, તા. ર૮ અને ર૯ ઓગસ્ટે પણ સુરત, ડાંગ, તાપી, નવસારી, વલસાડ અને દમણ, દાદરા-નગર હવેલીમાં હળવાથી મધ્યમ પ્રકારનો વરસાદ કે વરસાદી ઝાપટાં પડવાની શક્યતા છે.મેઘરાજા ગુજરાતને હાથતાળી આપી રહ્યા હોય તેવું ચિત્ર ઉપસ્યું છે. સ્થાનિક હવામાન વિભાગની આગાહીને જોતાં રાજ્યમાં સામાન્ય વરસાદ પડવાની શક્યતા હોઈ દક્ષિણ ગુજરાત સિવાયના ‌ભાગમાંથી વરસાદ ગાયબ થવાની સંભાવના છે. 

ભારે વરસાદને લઈને કોઈ ચેતવણી 
ર૯ ઓગસ્ટ સુધીના રાજ્યના હવામાન અંગેની આગાહીમાં ભારે વરસાદને લઇ કોઇ ચેતવણી કે એલર્ટ આપવામાં આવ્યું નથી. દક્ષિણ ગુજરાતમાં થોડો ઘણો વરસાદ ત્યાંની ‌વેસ્ટર્ન ડિસ્ટર્બન્સ સિસ્ટમની અસર હોવાનું જણાવાઈ રહ્યું છે. હવે સામાન્ય વરસાદ થવાની આગાહીના કારણે ખેડૂતોમાં ચિંતાનું મોજું પ્રસરી ગયું છે. ખેતરમાં રહેલા ઊભા પાકને નવજીવન માટે પાણીની જરૂર છે, જો આગામી દિવસોમાં સારો એવો વરસાદ નહીં થાય તો આ પાક બળી જશે અને ખરીફ પાકને ભારે નુકસાન થશે. વરસાદનો જો આવો જ હાલ રહેશે તો શિયાળામાં લેવાતા રવી પાકને પણ નુકસાન પહોંચવાની ભીતિ ‌કૃષિ નિષ્ણાતો વ્યક્ત કરી રહ્યા છે. 

છેલ્લા ર૪ કલાકમાં રાજ્યના પ૪ તાલુકામાં ઝરમર વરસાદ 
ગુજરાતમાંથી વરસાદ અદૃશ્ય થયો હોય તેમ આજે સવારે છ વાગ્યે પૂરા થયેલા ર૪ કલાકમાં કુલ પ૪ તાલુકામાં ઝરમર વરસાદ પડ્યો છે. નવસારીના ખેરગામમાં સૌથી વધુ પોણો ઇંચ વરસાદ નોંધાયો છે, જ્યારે ઉમરગામ, ડોલવણ, વાંસદા, ડાંગ, વાપી, પારડી અને વઘઈમાં અડધો ઇંચ જેટલો વરસાદ પડ્યો હોવાનું ગાંધીનગર આવેલા સ્ટેટ ઇમર્જન્સી ઓપરેશન સેન્ટરનાં સૂત્રો દ્વારા જાણવા મળ્યું છે.