- પંચમહાલના મોરવા હડફના કેસમાં ગુજરાત હાઈકોર્ટનો ચુકાદો
- શૈક્ષણિક લાયકાત વધારે હોય એટલે કંઈ સરકારી નોકરીમાં રાખી ન શકાય
- શૈક્ષણિક લાયકાત અનુસાર ભરતી કરી શકાય
- વધારે લાયકાતવાળાને રાખીને જરુરી ઉમેદવારોને વંચિત ન રાખી શકાય
ગુજરાત હાઈકોર્ટે પંચમહાલના મોરવા હડફ તાલુકાના એક કેસમાં મહત્વપૂર્ણ ચુકાદો જાહેર કર્યો છે. હાઈકોર્ટની ખંડપીઠે કહ્યું કે સરકારી નોકરીમાં જે પદ માટે જેટલી શૈક્ષણિક લાયકાતની જરૂરિયાત હોય તે મુજબ જ ભરતી કરવી જોઈએ, તેનાથી ઉપરવટ જઈને માપદંડો બહાર જઈ અન્ય ઉમેદવારની નિમણૂક કરી શકાય નહીં. વધુમાં જે ઉમેદવાર પાત્રતા ધરાવતા હોય તેમને નિમણૂકથી વંચિત રાખી શકાય નહીં.
જે ઉમેદવાર પાત્રતા ધરાવે છે તેને વંચિત ન રાખી શકાય
આ કેસમાં ગુજરાત હાઈકોર્ટની ખંડપીઠે ચુકાદો આપ્યો હતો કે, માત્ર શૈક્ષણિક લાયકાત વધારે હોવાથી જાહેરાતમાં દર્શાવેલી શરતોનો ભંગ કરીને નિમણૂંક ન આપી શકાય. સાથે જ હાઈકોર્ટે જણાવ્યું કે, જે ઉમેદવાર પાત્રતા ધરાવે છે તેને નિમણૂંકથી વંચિત ન રાખી શકાય.
હાઈકોર્ટે નોંધ્યું કે, કોઈ પણ પસંદગી પ્રક્રિયા દર્શાવેલી પ્રક્રિયા અનુસાર જ થવી જોઈએ. જ્યારે જાહેરાતમાં પસંદગીના ધોરણો નિર્દિષ્ઠ હોય ત્યારે પછી તેમાં કોઈ છૂટછાટ કે રાહતને અવકાશ હોતો નથી. તેથી સત્તાધીશોએ એસએસસી પાસની લાયકાતને જ ધ્યાનમાં રાખવી. હાઈકોર્ટે અરજદાર સુરેખાની અરજી ફગાવી હતી.
પંચમહાલ જિલ્લાના મોરવા તાલુકાનો હતો મામલો
સત્તાધીશોએ પંચમહાલ જિલ્લાના મોરવા તાલુકામાં મધ્યાહન ભોજન યોજના કેન્દ્રમાં બીએડની ડિગ્રી ધરાવતા ઉમેદવાર સુરેખાની સંકલનકાર કમ રસોઈયા તરીકે નિમણૂક કરી હતી. જોકે, પ્રતિવાદી ભાવના પરમારે આ નિમણૂકનો વિરોધ કર્યો હતો. તેમણે ફરિયાદ કરી હતી કે, 11 ફેબ્રુઆરી 2016ના રોજ ઓથોરિટીએ પંચમહાલ જિલ્લાના મોરવા તાલુકામાં મધ્યાહન ભોજન યોજના કેન્દ્રના સંકલનકાર કમ રસોઈયાની જાહેરાત બહાર પાડી હતી. આ જગ્યા માટે શૈક્ષણિક લાયકાત એસએસસી પાસ હોવી જરૂરી હતી. જોકે, સત્તાધીશોએ આ પદ માટે વધુ શૈક્ષણિક લાયકાત ધરાવતા સુરેખાબહેનની નિમણૂક કરી હતી.
