- ગુજરાત હાઈકોર્ટને મળશે નવા ચીફ જસ્ટિસ!
- સુનિતા અગ્રવાલને ગુજરાત HCના ચીફ જસ્ટિસ બનાવવા ભલામણ
- સુપ્રીમ કોર્ટ કોલેજીયમ દ્વારા કરાઈ ભલામણ
સુપ્રીમ કોર્ટ કોલેજિયમે 7 હાઈકોર્ટના મુખ્ય ન્યાયાધીશો (ચીફ જસ્ટિસ)ના નામનો પ્રસ્તાવ મૂક્યો છે. કોલેજિયમે બોમ્બે, ગુજરાત, તેલંગાણા, આંધ્રપ્રદેશ, મણિપુર, ઓડિશા અને કેરળની હાઈકોર્ટના મુખ્ય ન્યાયાધીશોની નિમણૂક માટે ભલામણ કરી છે. ચીફ જસ્ટિસ ડીવાય ચંદ્રચુડ, જસ્ટિસ સંજય કે.કૌલ અને જસ્ટિસ સંજીવ ખન્નાની ત્રણ સભ્યોની કોલેજિયમે જસ્ટિસ સુનીતા અગ્રવાલને ગુજરાત હાઈકોર્ટના ચીફ જસ્ટિસ (મુખ્ય ન્યાયાધીશ) બનાવવાની ભલામણ કરી છે.
કોલેજિયમે કરી ભલામણ
જો કેન્દ્રમાંથી મંજૂરી મળી જાય છે તો તેમની નિમણૂંક થયા બાદ તેઓ કોઈ હાઈકોર્ટના એક માત્ર મહિલા ચીફ જસ્ટિસ હશે, કારણ કે હાલમાં આ પદ પર કોઈ મહિલા પ્રતિનિધિત્વ નથી કરી રહી. કોલેજિયમે બુધવારની બેઠકમાં અલાહાબાદ હાઈકોર્ટના ન્યાયાધીશ દેવેન્દ્ર કુમાર ઉપાધ્યાયને બોમ્બે હાઈકોર્ટના મુખ્ય ન્યાયાધીશ (ચીફ જસ્ટિસ) તરીકે નિયુક્ત કરવાની ભલામણ કરી છે.
ધીરજસિંહ ઠાકુરના નામની પણ કરાઈ ભલામણ
કોલેજિયમે કર્ણાટક હાઈકોર્ટના ન્યાયાધીશ જસ્ટિટ આલોક આરાધેની તેલંગાણા હાઈકોર્ટના મુખ્ય ન્યાયાધીશ તરીકે ભલામણ કરી છે. આંધ્રપ્રદેશ હાઈકોર્ટના મુખ્ય ન્યાયાધીશ માટે કોલેજિયમે બોમ્બે હાઈકોર્ટ [મૂળ હાઈકોર્ટ: J&K અને લદ્દાખ]ના ન્યાયાધીશ જસ્ટિસ ધીરજ સિંહ ઠાકુરની નિમણૂકની ભલામણ કરી છે.
જસ્ટિસ આશિષ જે.દેસાઈના નામની પણ કરાઈ ભલામણ
દિલ્હી હાઈકોર્ટના ન્યાયાધીશ જસ્ટિસ સિદ્ધાર્થ મૃદુલની કોલેજિયમે મણિપુર હાઈકોર્ટના મુખ્ય ન્યાયાધીશ તરીકે ભલામણ કરી છે. આ સાથે સુપ્રીમ કોર્ટ કોલેજિયમે ઓડિશા હાઈકોર્ટ (મૂળ હાઈકોર્ટ: ત્રિપુરા)ના ન્યાયાધીશ સુભાસીસ તાલપાત્રાને ઓડિશા હાઈકોર્ટના મુખ્ય ન્યાયાધીશ તરીકે નિયુક્ત કરવાની ભલામણ પણ કરી છે. એવી જ રીતે કેરળ હાઈકોર્ટના મુખ્ય ન્યાયાધીશ તરીકે કોલેજિયમ દ્વારા ગુજરાત હાઈકોર્ટના જજ જસ્ટિસ આશિષ જે. દેસાઈની ભલામણ કરવામાં આવી છે.
