લાંચીયાબાબુઓ / ભ્રષ્ટ અધિકારીઓને શોધવા માટે રાજ્ય સરકાર શરૂ કરશે આ કામ

Dharmishtha

Last Updated: 10:18 PM, 2 January 2020

FOLLOW ON

શેર કરો

ગુજરાત એસીબીએ ભ્રષ્ટ લાંચિયા સરકારી અધિકારી, કર્મચારીઓની અપ્રમાણસર મિલકતને શોધવા માટે હવે ફે‌મિલી ટ્રી બનાવવાનું શરૂ કર્યું છે. જેમાં ઝડપાયેલા અધિકારીઓની તમામ દૂરના તેમજ નજીકનાં સગાંવહાલાંઓની સંપત્તિ મામલે તપાસ કરવામાં આવશે.

થોડાક સમય પહેલા જમીન વિકાસ નિગમના મદદનીશ નિયમક પ્રવીણ પ્રેમલની ૧૦.પ૪ કરોડની અપ્રમાણસર મિલકતનો પર્દાફાશ એસીબીએ ફે‌મિલી ટ્રીના આધારે જ કરાયો છે. ત્યારે હવે જેતપુરમાં લાંચ કેસમાં ફસાયેલા ડીવાયએસપી જે.એમ.ભરવાડ તેમજ ૧૮ લાખની લાંચ લેવામાં ઝડપાયેલા જૂનાગઢ એસીબીના પોલીસ ઇન્સ્પેક્ટર ડી.ડી.ચાવડાની અપ્રમાણસર મિલકત શોધવા માટે એસીબીએ ફે‌મિલી ટ્રી તૈયાર કરી દીધું છે.

વિતેલાં વર્ષે ગુજરાત એસીબીએ કુલ રપપ ગુના લાંચિયાબાબુઓ વિરુદ્ધમાં કરીને કુલ ૪૧૭ આરોપીઓની પકડી પાડ્યા છે. મોટાભાગના કેસમાં કાયદાકીય સંકજો લાંચિયાબાબુ પર કસાય તે માટે એસીબીની ટીમે બાડા (બેનામી એસ્ટેટ એન્ડ ડીસપ્રોપર્ટીનેટ એસ્ટેટ) નામનું ડિપાર્ટમેન્ટ બનાવ્યું છે. જેમાં કરપ્શન કરતા અધિકારીઓની એક એક વિગતોની તપાસ કરાશે. બાડા દ્વારા કોઇ પણ કેસના ઇન્વેસ્ટિગેશન માટે આઠ મહિનાથી એક વર્ષનો સમય લાગે છે. બાડા જેતે લાંચિયા અધિકારીઓની પહેલાં ગુપ્ત માહિતીના આધારે ફે‌મિલી ટ્રી તૈયાર કરે છે. જેમાં અધિકારીની પત્ની, બાળકો, માતા પિતા, ભાઇ બહેન, અધિકારીના સાળા, સાળી, મામા, મામી, તેમજ સાળાના પરિવારજનો જેવા અનેક દૂરના તેમજ નજીકનાં સંબંધીઓનું એક લિસ્ટ બનાવે છે અને ત્યારબાદ તપાસ શરૂ કરી છે.

અધિકારીના દૂરના સંબંધીથી તપાસની શરૂઆત કરે છે અને ત્યાર બાદ ધીમે ધીમે તમામ બેનામી સંપતિના પૂરાવા ભેગા કરીને અધિકારી વિરુદ્ધમાં કાયદેસરની કાર્યવાહી કરે છે. ઉલ્લેખનીય છે કે ફે‌મિલી ટ્રી બનાવીને તપાસની સૌ પહેલાં શરૂઆત જમીન વિકાસ નિગમના મદદનીશ નિયામક પ્રવીણ પ્રેમલના કેસથી થઇ. જેમાં એસીબીએ તેમની પત્ની અને પુત્ર વિરુદ્ધમાં પણ ફરિયાદ નોંધી છે.

સંકળાયેલા મુદ્દાઓ

Anti corruption officer Corruption Crime gujarat Corruption