અદ્ભુત / ઓય, બાપા! ગેંડા કરતાં પણ ભારે છે આ ચોકલેટ, બની ગયો વર્લ્ડ રેકોર્ડ! VIDEO જોઈને તમે પણ ચોંકી જશો

• ચોકલેટ ઉત્પાદકે કલ્પના બહારનો વિશ્વ રેકોર્ડ બનાવ્યો 
• 2,547.50 કિગ્રા ચોકલેટથી ભરેલું વિશાળ બોક્સ બનાવ્યું
• ચોકલેટ એટલી ભારે હોય છે કે તેનું વજન પુખ્ત ગેંડા જેટલું

દુનિયામાં લોકો વર્લ્ડ રેકોર્ડ બનાવવા માટે ખુબ જ મહેનત કરે છે અને અલગ અલગ રીતે દુનિયા સામે પોતાને સાબિત કરે છે. તો કેટલીક વખત એવા વિચિત્ર રેકોર્ડ પણ સામે આવતા હોય છે કે જે જોઈને સૌ કોઈ ચોંકી જતા હોય છે. હાલમાં પણ એક ચોકલેટ ઉત્પાદકે કોઈપણ ચોકલેટ પ્રેમીની કલ્પના બહારનો વિશ્વ રેકોર્ડ બનાવ્યો છે. ગિનિસ વર્લ્ડ રેકોર્ડ્સ અનુસાર ચોકલેટ બ્રાન્ડ રસેલ સ્ટોવરે 2,547.50 કિગ્રા વજનની ચોકલેટથી ભરેલું વિશાળ બોક્સ બનાવીને નવો રેકોર્ડ બનાવ્યો છે. ચોકલેટ એટલી ભારે છે કે તેનું વજન પુખ્ત ગેંડા જેટલું છે. આ વિશાળ પ્રાણીઓનું વજન સામાન્ય રીતે 1,400 અને 2,800 kg ની વચ્ચે હોય છે.

205 વિશાળ ચોકલેટના ટુકડાનો ઉપયોગ કર્યો

વર્લ્ડ રેકોર્ડના પ્રમાણપત્ર અને જરૂરી દસ્તાવેજોને સાચવતી સંસ્થા ગિનીસ બુક ઓફ વર્લ્ડ રેકોર્ડ દ્વારા કહેવામાં આવ્યું હતું કે ચોકલેટથી ભરેલા બોક્સની સાઈઝ 9.27 m x 4.69 m x 0.47 m (30.43 ft x 15.41 ft x 1.55 ft છે. તેનું અનાવરણ 17 એપ્રિલે કેન્સાસ સિટી, મિઝોરી, યુએસએમાં કરવામાં આવ્યું હતું. રેકોર્ડ તોડવા માટે જરૂરી ન્યૂનતમ વજન સુધી પહોંચવા માટે રસેલ સ્ટોવરે કુલ 205 વિશાળ ચોકલેટના ટુકડાનો ઉપયોગ કર્યો. રસેલ સ્ટોવર પ્લાન્ટ્સમાં ટુકડાઓનું ઉત્પાદન કરવામાં આવ્યું હતું. આ દરમિયાન ચોકલેટના દરેક ટુકડાનું વજન કરવામાં આવ્યું હતું. અને જ્યારે નાના ટુકડાઓનું વજન લગભગ 4.53 kg હતું. જ્યારે કેટલાક સૌથી મોટા ટુકડાઓનું વજન 16 kg થી વધુ હતું.

નવ અલગ-અલગ સ્વાદિષ્ટ ચોકલેટ્સનો ઉપયોગ કરાયો

આ અદ્ભુત ચોકલેટ બોક્સ નવ અલગ-અલગ સ્વાદિષ્ટ ચોકલેટ્સ ભરીને બનાવવામાં આવે છે. કારામેલ, કોકોનટ ક્લસ્ટર, ફ્રુટ એન્ડ નટ કારામેલ, પીનટ ક્લસ્ટર, પેકન ડિલાઈટ, રાસ્પબેરી ક્રીમ, સ્ટ્રોબેરી ક્રીમ, ટોફી અને ટ્રફલ, તેમજ ચોકલેટ કવર્ડ બદામના ટુકડાઓ આખા બોક્સને બનાવે છે.