એડવાઈઝરી / Facebook, Instagram અને X ને સરકારે આપી ચેતવણી, જાહેર કરી ગાઈડલાઇન, પોર્ન, ડીપફેકનો ઉલ્લેખ

• ડીપફેક વિડીયો ચિંતાનો વિષય
• સરકારે નારાજગી વ્યક્ત કરી
• સોશિયલ મીડિયા પ્લેટફોર્મ માટે માર્ગદર્શિકા જાહેર

સોશિયલ મીડિયા પર વાયરલ થતા ડીપફેક વિડીયો ચિંતાનો વિષય બની ગયા છે. આ પ્રકારના વિડીયોથી સત્ય અને જુઠ્ઠાણુ જાણી શકાતું નથી. સરકારે આ બાબતે નારાજગી વ્યક્ત કરી છે. ઈલેક્ટ્રોનિક્સ એન્ડ ઈન્ફોર્મેશન ટેકનોલોજી મંત્રાલયે સોશિયલ મીડિયા પ્લેટફોર્મ માટે માર્ગદર્શિકા જાહેર કરી છે અને ચેતવણી આપી છે. 

સરકારે જણાવ્યું છે કે, સોશિયલ મીડિયા પ્લેટફોર્મ ફેસબુક, ઈન્સ્ટાગ્રામ અને Xએ IT નિયમો હેઠળ ડીપફેક વિડીયો વિરુદ્ધ કાર્યવાહી કરવી જોઈએ. એડવાઈઝરીમાં જણાવવામાં આવ્યું છે કે, સોશિયલ મીડિયા પ્લેટફોર્મ આ પ્રકારના વિડીયોને વાયરલ થતા નહીં રોકે તો તેમના વિરુદ્ધ કાર્યવાહી કરવામાં આવશે. 

એડવાઈઝરી
સરકારે જણાવ્યું છે કે, IT નિયમ 3(1)(b) માં આ પ્રકારના કન્ટેન્ટને રોકવા માટેનું જણાવવામાં આવ્યું છે. જેમાં ખાનગી, અભદ્ર અથવા પોર્ન કન્ટેન્ટ રોકવા માટે પણ જણાવવામાં આવ્યું છે. જે કન્ટેન્ટથી યૂઝર્સને ભ્રમિત કરવામાં આવે છે, કોઈપણ વ્યક્તિની ઓળખનો ઉપયોગ કરીને અસત્યને તથ્ય તરીકે રજૂ કરવામાં આવે છે. 

ડીપફેક વિડીયો
અમિતાભ બચ્ચને રશ્મિકા મંદાનાના ડીપફેક વિડીયો બાબતે ચિંતા વ્યક્ત કરી હતી. કેન્દ્રીય મંત્રી અશ્વિની વૈષ્ણવે જણાવ્યું હતું કે, સોશિયલ મીડિયા પ્લેટફોર્મે આ પ્રકારના વિડીયો પર કાર્યવાહી કરીને તેને હટાવી દેવા જોઈએ. 

ડીપફેક વિડીયો એટલે શું?
ડીપફેક વિડીયોમાં ટેકનોલોજીની મદદથી વિડીયોમાં દેખાઈ રહેલ વ્યક્તિનો ચહેરો અન્ય વ્યક્તિ પર લગાવી દેવામાં આવે છે. ડીપફેકના કારણે કોઈપણ ઘટનાને સાક્ષ્ય ગણવામાં આવતા વિડીયોની વિશ્વસનીયતા પર સવાલ ઊભા કરવામાં આવે છે.