ભારતનો સ્ટાર ઓલરાઉન્ડર હાર્દિક પંડ્યા છેલ્લા ઘણા સમય બાદ ક્રિકેટમાં પાછો ફર્યો છે. ગયા વર્ષે ODI વર્લ્ડ કપ દરમિયાન ઈજાગ્રસ્ત થયેલા હાર્દિકે IPL પહેલા ફિટ થઈ ગયો છે અને આવતાની સાથે જ હાર્દિકે શાનદાર પ્રદર્શનની શરૂઆત કરી દીધી છે.
લગભગ 4 મહિના પછી ક્રિકેટના મેદાનમાં વાપસી કરનાર હાર્દિક પંડ્યા નવી મુંબઈમાં આયોજિત DY પાટિલ T20 ટૂર્નામેન્ટમાં રિલાયન્સ 1 તરફથી રમી રહ્યો છે. ભારત પેટ્રોલિયમ સામેની મેચમાં હાર્દિકે બોલિંગમાં 3 ઓવરમાં 22 રન આપીને 2 વિકેટ ઝડપી હતી.
ઓલરાઉન્ડર હાર્દિક પંડ્યા ઈજાના કારણે લાંબા વિરામ બાદ સ્પર્ધાત્મક ક્રિકેટમાં પરત ફર્યો હતો, તેણે DY પાટિલ T-20 કપમાં બે વિકેટ ઝડપી હતી અને તે 10માં નંબર પર બેટિંગ કરવા આવ્યો હતો. જેમાં 4 બોલમાં 3 રન બનાવીને અણનમ રહ્યો હતો. આ મેચમાં રિલાયન્સે ભારત પેટ્રોલિયમને 2 વિકેટે હરાવ્યું હતું.
એ વાત તો જાણીતી જ છે કે ઑક્ટોબરમાં પૂણેમાં બાંગ્લાદેશ સામેની ODI વર્લ્ડ કપ મેચ દરમિયાન પગની ઘૂંટીમાં ઈજા થતાં પંડ્યા ક્રિકેટથી દૂર હતો. હવે તે પાંચ વખતની વિજેતા મુંબઈ ઈન્ડિયન્સના નવા કેપ્ટન તરીકે ઈન્ડિયન પ્રીમિયર લીગમાં પરત ફરવાની તૈયારી કરી રહ્યો છે.
વધુ વાંચો: 'ભૂખ હોવી જોઈએ', હાર્દિક- ઈશાન પર રોહિત શર્માનો મોટો હુમલો, કેમ વધી કડવાશ?
હાર્દિક પંડ્યા લાંબા સમયથી નેશનલ એકેડમીમાં પોતાની ફિટનેસ પર કામ કરી રહ્યો હતો. ત્યાં તેણે રિષભ પંત સાથે કેટલીક T20 મેચોમાં ભાગ લીધો જેમાં તેણે બોલિંગ અને બેટિંગ બંને કરી. NCA તરફથી ઓર્ડર મળ્યા બાદ જ તે ટ્રેનિંગ માટે બરોડા ગયો હતો અને હવે T20 ટૂર્નામેન્ટ રમી રહ્યો છે. અહેવાલો અનુસાર, આ T20 ટૂર્નામેન્ટ પછી, પંડ્યા માર્ચના પહેલા અઠવાડિયામાં ફરીથી NCA જશે જ્યાં તેની ફિટનેસની ફરીથી તપાસ કરવામાં આવશે. એ બાદ તેને ફિટ જાહેર કરવામાં આવશે પછી તે IPLમાં ભાગ લઈ શકે છે.
