- અફઘાનિસ્તાન સામે ઓસ્ટ્રેલિયાની શાનદાર જીત
- ઓસ્ટ્રેલિયાની વિધિવત રીતે સેમી ફાઈનલમાં એન્ટ્રી
- ગ્લેન મેક્સવેલની ડબલ સદી
વર્લ્ડ કપની અત્યાર સુધીની સૌથી રોમાંચકકારી મેચમાં ઓસ્ટ્રેલિયાએ ગ્લેન મેક્સવેલની ડબલ સદીથી અફઘાનિસ્તાન સામે શાનદાર જીત મેળવીને વર્લ્ડ કપની સેમી ફાઈનલમાં સત્તાવાર એન્ટ્રી મેળવી લીધી છે. એક તબક્કે ઓસ્ટ્રેલિયા હારની અણી પર હતું પરંતુ તોફાની બેટર મેક્સવેલે એકલે હાથે મેચ જીતાડી દીધી હતી. ઓસ્ટ્રેલિયાએ અફઘાનિસ્તાનને 3 વિકેટથી પરાજય આપ્યો હતો. પહેલા બેટિંગ કરીને અફઘાનિસ્તાને 5 વિકેટમાં 291 રન કર્યાં હતા જવાબમાં ઓસ્ટ્રેલિયાએ 7 વિકેટમાં 293 રન કર્યાં હતા.
ગ્લેન મેક્સવેલની ડબલ સદી
ગ્લેન મેક્સવેલ આ મેચનો હીરો રહ્યો છે. ઈજા થઈ હોવા છતાં પણ ગ્લેન મેક્સવેલે એકલે હાથે અફઘાનિસ્તાન પાસેથી જીત છીનવી લીધી હતી. મેક્સવેલે ડબલ સદીથી તોફાન મચાવ્યું હતું. તેણે 201 રન ફટકાર્યાં હતા.
ડબલ સેન્યુચરી બાદ શું બોલ્યો મેક્સવેલ
અફઘાનિસ્તાને તબાહ કર્યાં બાદ મેક્સવેલે પોતાની વિસ્ફોટક બેટિંગની ચર્ચા કરી છે. ગ્લેન મેક્સવેલે કદાચ લંગડાતી વખતે તેની કારકિર્દીની સર્વશ્રેષ્ઠ ઇનિંગ્સ રમી છે. ગ્લેન મેક્સવેલે અફઘાનિસ્તાનના જડબામાંથી અસંભવ જીત છીનવી લીધી છે. ગ્લેન મેક્સવેલે મેચ બાદ પોતાની ઈનિંગ વિશે કહ્યું, 'આજે ફિલ્ડિંગ કરતી વખતે ખૂબ જ ગરમી હતી. મેં ઉનાળામાં વધારે કસરત નહોતી કરી. આજે ગરમીએ મારા પર કાબૂ મેળવી લીધો. હું મારા પગ પર ઉભો રહેવા અને ક્રિઝ પર રહેવા માંગતો હતો. તેમ છતાં મેં મારા શોટ્સ રમવાનો પ્રયાસ કર્યો.
91 રનમાં 7 વિકેટ ગુમાવી હતી
એક તબક્કે ઓસ્ટ્રેલિયા હારશે તે નક્કી હતું કારણ કે 91 રનમાં તેની સાત વિકેટ પડી ગઈ હતી પરંતુ ત્યાર બાદ આવેલા મેક્સવેલ એકલે હાથે બાજી સંભાળી લીધી હતી. મેક્સવેલના 201 રનમાં 21 ચોગ્ગા અને 10 છગ્ગા સામેલ છે.
ઓસ્ટ્રેલિયાની સેમી ફાઈનલમાં સત્તાવાર એન્ટ્રી
અફઘાનિસ્તાન સામેની ભવ્ય જીત બાદ ઓસ્ટ્રેલિયાની સેમી ફાઈનલમાં સત્તાવાર એન્ટ્રી થઈ છે. ઓસ્ટ્રેલિયા પોઈન્ટ ટેબલમાં ત્રીજા નંબરે છે.
ઈબ્રાહિમ જાદરાનની સદી બેકાર
વર્લ્ડ કપમાં અત્યાર સુધી વાનખેડે સ્ટેડિયમની પીચ બેટ્સમેનો માટે સ્વર્ગ સમાન સાબિત થઈ છે. આ ત્રણેય મેચની પ્રથમ ઇનિંગમાં અનુક્રમે 399, 382 અને 357 રનનો મોટો સ્કોર બનાવ્યો હતો. આ વખતે પણ અફઘાનિસ્તાનના બેટ્સમેનોએ સારો દેખાવ કર્યો હતો. ઓપનર ઈબ્રાહિમ જાદરાન અણનમ 129 રન બનાવીને વર્લ્ડ કપમાં સદી ફટકારનાર પ્રથમ અફઘાન બેટ્સમેન બન્યો હતો. જાદરાને પોતાની ટીમના દરેક બેટ્સમેન સાથે નાની-નાની ભાગીદારી કરી. રહેમાનુલ્લા ગુરબાઝ (21), કેપ્ટન હશમતુલ્લાહ શાહિદી (26), રહમત શાહ (30) અઝમતુલ્લા ઓમરઝાઈ (22) બાદ છેલ્લી ઓવરોમાં રશીદ ખાનના 18 બોલમાં વિસ્ફોટક 35 રનના કારણે સ્કોરબોર્ડ પર 291 રનનો સ્કોર પડ્યો હતો.
