- વિરાટ અને પાક. ખેલાડીઓ વચ્ચેની મિત્રતાનો મુદો
- ગૌતમ ગંભીરે કહ્યું ખેલાડીઓની આંખોમાં આક્રમકતા હોવી જોઈએ
- 'તમે તમારા દેશની ટીમનું પ્રતિનિધિત્વ કરી રહ્યાં છો'
એશિયા કપ 2023માં જ્યારે ભારત-પાકિસ્તાનની મેચ થઈ તે પહેલાં વિરાટ કોહલીનો એક ફોટો ઘણો વાયરલ થયો હતો. જેમાં તેઓ પાકિસ્તાની ખેલાડીઓ સાથે મજાક-મસ્તી કરી રહ્યાં છે. વિરાટ કોહલીની પાકિસ્તાની ખેલાડીઓ સાથે સારી મિત્રતા છે અને જ્યારે પણ આ 2 ટીમો આમને સામને થાય છે ત્યારે તેમની મિત્રતા પણ લોકોને જોવા મળે છે. જો કે વિરાટનો આ સ્વભાવ કેટલાક લોકોને પસંદ નથી. ટીમ ઈન્ડિયાનાં પૂર્વ ક્રિકેટર અને એશિયા કપમાં કમેન્ટ્રી કરતાં ગૌતમ ગંભીરે આ મુદે મોટી વાત કરી છે.
' મેચ દરમિયાન ખેલાડીની આંખોમાં આક્રમકતા હોવી જોઈએ'
ગૌતમ ગંભીરે કહ્યું કે, અમારા સમયમાં એવું નહોતું કે વિરોધી ખેલાડીઓને ભેટવાનું કે તેમના ખભ્ભા પર હાથ રાખવું.. મેચ દરમિયાન ખેલાડીની આંખોમાં આક્રમકતા હોવી જોઈએ કારણકે એ સમયે તમે તમારા દેશની ટીમનું પ્રતિનિધિત્વ કરી રહ્યાં છો. તમારે જીત વિશે વિચારવું જોઈએ. ગંભીરે કહ્યું કે તે 6-7 કલાક ઘણાં મહત્વનાં હોય છે. તે સમયે તમે માત્ર ટીમ ઈન્ડિયાની જર્સી જ નથી પહેરી પરંતુ તમે 140 કરોડ લોકોનું પ્રતિનિધિત્વ કરી રહ્યાં છો.
ખેલાડીઓમાં યારાના!
વિરાટ કોહલી પાકિસ્તાનના ફાસ્ટ બોલર હરિસ રૌફ પાસે જાય છે, તેને ગળે લગાવે છે અને પછી એકબીજાની વચ્ચે વાત કરીને હસવા લાગે છે. ક્રિકેટના મેદાન પર ભારત અને પાકિસ્તાનને કટ્ટર હરીફ માનવામાં આવે છે, પરંતુ આ બંને દેશોના ખેલાડીઓ વચ્ચે સારા સંબંધો રહ્યા છે, જેની એક ઓળખ છે કોહલી અને રઉફ વચ્ચેની મુલાકાત. કોહલી બાદમાં પાકિસ્તાનના વાઇસ કેપ્ટન શાદાબ ખાનને પણ મળ્યો હતો અને તેની સાથે થોડી ક્ષણો વિતાવી હતી. આટલું જ નહીં ભારતીય ફાસ્ટ બોલર મોહમ્મદ સિરાજે રઉફ સાથે પલ્લેકેલેની પિચ વિશે ચર્ચા કરી હતી. ભારત અને પાકિસ્તાનના ખેલાડીઓ વચ્ચેની આવી મુલાકાતના વીડિયોની સોશિયલ મીડિયા પર ખૂબ પ્રશંસા થઈ રહી છે. 80 અને 90 ના દાયકાના કોઈપણ ક્રિકેટ પ્રેમી માટે આ આશ્ચર્યજનક દૃશ્ય હોઈ શકે છે કારણ કે તે સમયે આ બંને દેશોના ક્રિકેટરો જાહેરમાં એકબીજાને મળવાથી દૂર રહેતા હતા. એ અલગ વાત છે કે તેમની વચ્ચે પડદા પાછળ સારા સંબંધો હતા.
કોહલી અને બાબર એકબીજાના ખૂબ વખાણ કરે છે
જ્યારે કોહલી ખરાબ તબક્કામાંથી પસાર થઈ રહ્યો હતો, ત્યારે પાકિસ્તાનના કેપ્ટન બાબર આઝમે X (અગાઉ ટ્વિટર) પર એક સંદેશ જાહેર કર્યો હતો અને તેને સમર્થન આપ્યું હતું. કોહલી અને બાબરમાં કોણ સર્વશ્રેષ્ઠ છે તે મુદ્દે સોશિયલ મીડિયા પર ભલે ચાહકોમાં ઉગ્ર પ્રતિક્રિયા જોવા મળી રહી છે, પરંતુ આ બંને ખેલાડીઓ તેનાથી અસ્પૃશ્ય રહ્યા છે. કોહલીએ તાજેતરમાં જ પાકિસ્તાનના સુકાનીને હાલના તમામ ફોર્મેટમાં સર્વશ્રેષ્ઠ ખેલાડી તરીકે રેટ કર્યું છે જ્યારે બાબરને વારંવાર પ્રેસ કોન્ફરન્સ દરમિયાન કોહલી સાથેની દુશ્મનાવટ વિશે પૂછવામાં આવે છે. એશિયા કપમાં પણ બંને ટીમો વચ્ચેની મેચની પૂર્વ સંધ્યાએ તેને આવો સવાલ પૂછવામાં આવ્યો હતો.
