- ભારતીય ટીમે પાકિસ્તાનને 228 રનના માર્જિનથી હરાવ્યું હતું
- શ્રેષ્ઠ ખેલાડી કોહલી, રાહુલ કે ગિલ નહીં પણ કુલદીપ યાદવ
- કુલદીપનું પ્રદર્શન પ્રશંસનીય છે - ગૌતમ ગંભીર
એશિયા કપ 2023 માં સુપર 4ની ત્રીજી મેચમાં ભારતીય ટીમે પાકિસ્તાનને 228 રનના માર્જિનથી હરાવ્યું હતું અને એશિયા કપના ઈતિહાસમાં ભારતની આ અત્યાર સુધીની સૌથી મોટી જીત હતી. આ મેચમાં તેની 122 રનની સદીની ઇનિંગને કારણે વિરાટ કોહલીને પ્લેયર ઓફ ધ મેચનો એવોર્ડ આપવામાં આવ્યો હતો. જોકે આ વાત પર પૂર્વ ક્રિકેટર ગૌતમ ગંભીરનો મત અલગ હતો.
શ્રેષ્ઠ ખેલાડી કોહલી, રાહુલ કે ગિલ નહીં પણ કુલદીપ યાદવ
મેચ પૂરી થયા પછી જ્યારે ગૌતમ ગંભીરને સ્ટાર સ્પોર્ટ્સ પર મેચના શ્રેષ્ઠ ખેલાડીની પસંદગી કરવા માટે કહેવામાં આવ્યું, ત્યારે તેણે કોહલી, રાહુલ અથવા ગિલનું નામ ન લીધું પરંતુ કુલદીપ યાદવનું નામ લીધું જેણે 5 વિકેટ લીધી હતી. જે બાદ તેમની આ ટિપ્પણીએ ફરી એકવાર ચર્ચાનું બજાર ગરમ કર્યું છે.
કુલદીપનું પ્રદર્શન પ્રશંસનીય છે - ગંભીર
ભારતીય ક્રિકેટ ટીમના ભૂતપૂર્વ સ્ટાર ગૌતમ ગંભીરે રમત બાદ તેના વ્યક્તિગત પ્રદર્શનનું વિશ્લેષણ કરતાં કુલદીપ યાદવની પ્રશંસા કરી હતી. "કુલદીપ યાદવથી આગળ જોઈ શકતો નથી," તેણે કહ્યું. હા, વિરાટ કોહલીએ 100 રન, કેએલ રાહુલે 100 રન, રોહિત શર્માએ 50 રન, શુભમન ગીલે 50 રન બનાવ્યા હતા. પણ આવી વિકેટ પર જ્યાં સ્વિંગ હતું, સીમિંગ હતું, જો કોઈ સાત ઓવરમાં પાંચ વિકેટ લઈ શકે તો તે અદ્ભુત છે. વધુ મહત્ત્વની વાત એ છે કે, મને આશ્ચર્ય થયું કે પરંપરાગત રીતે સ્પિન રમતા પાકિસ્તાનના બેટ્સમેનો કુલદીપનો સામનો કરી શક્યા નહીં.'
આ રીતે ભારતે જીત નોંધાવી
કોલંબોના આર. પ્રેમદાસા સ્ટેડિયમમાં બે દિવસ સુધી રમાયેલી એ મેચમાં વિરાટ કોહલી (122*) અને ફરીથી ફિટ થયેલા કેએલ રાહુલ (111*)ની મદદથી ટીમે 2 વિકેટના નુકસાન પર 356 રન બનાવ્યા હતા. ત્યાર બાદ બોલિંગ કરતાં સમયે કુલદીપ યાદવનો દબદબો જોવા મળ્યો હતો. તેને આઠ ઓવરમાં 25 આપીને પાંચ વિકેટ લીધી હતી, આ સાથે જ ભારતે ODI ઈતિહાસમાં પાકિસ્તાન સામે સૌથી મોટી જીત હાંસલ કરી હતી. ભારતના 357 રનના લક્ષ્યાંકના જવાબમાં બાબર આઝમની આગેવાની હેઠળની ટીમ 128 રનમાં ઓલઆઉટ થઈ ગઈ હતી.
