ચેતીજજો / ‘દીદી, મૈં આપકે ભાઈકા દોસ્ત હૂં, મુજે ફોન કરના હૈ’ કહી ગઠિયાઓ બાઉન્સર મહિલાનો મોબાઈલ લઈ ફરાર

• બે અજાણ્યા ગઠિયા મહિલા બાઉન્સરનો ફોન લઇને જતા રહ્યા
• મહિલા પંખો રિપેર કરાવવા જતી હતી તે સમયે બની ઘટના
• મેઘાણીનગર પોલીસે અજાણ્યા શખ્સ વિરૂદ્ધ ચીટીંગની ફરિયાદ કરી

 મેઘાણીનગર વિસ્તારમાં આવેલા ગુજરાત હાઉસિંગ બોર્ડના મકાનમાં રહેતાં રીના યાદવે મેઘાણીનગર પોલીસ સ્ટેશનમાં અજાણ્યા શખ્સ વિરુદ્ધ ચીટિંગની ફરિયાદ કરી છે. રીના યાદવ ઇન્ટરનેશનલ એરપોર્ટ ખાતે એમ.એસ.એફ કંપનીમાં બાઉન્સર તરીકે નોકરી કરીને પોતાનું તેમજ પરિવારનું ગુજરાન ચલાવે છે. રીનાનાં સાત વર્ષ પહેલાં પતિ સાથે છૂટાછેડા થઇ ગયા હોવાથી તે તેનાં સંતાનો સાથે રહે છે. ગઇ કાલે રીના પંખો રિપેર કરાવવા માટે રામેશ્વર પોલીસ ચોકી પાસે આવેલી જય અંબે ઇલેક્ટ્રોનિક્સ દુકાન ખાતે ગઇ હતી જ્યાં બાઇક પર બે શખ્સ આવ્યા હતા. અને તેને તેના નામથી સંબોધીને વાત શરૂ કરી હતી. મહિલા ક્યાં રહે છે, ક્યાં નોકરી કરે છે. તે તમામ વિગતો પણ ગઠિયાઓ પાસે હતી. 

પોલીસે ગુનો નોંધી તપાસ હાથ ધરી
રીના પાસે જઇને બંને શખ્સે કહ્યું હતું રીના દીદી નમસ્તે, પહેચાના મુજે મૈ તુમ્હારે ભાઇ કા દોસ્ત હૂં ઔર મૈ આપકો જાનતા હૂં, આપ એરપોર્ટ મેં બાઉન્સરકી જોબ કરતે હો. મુજે એક ફોન કરના હે ઇસ લિયે આપકા મુજે ફોન ચાહીએ. ભાઇના મિત્ર હોવાનું સાંભળીને રીનાએ પોતાનો મોબાઇલ આપ્યો હતો અને યુવકે ફોન પર વાત કરી હતી. રીના પંખો રિપેર કરાવવા માટે દુકાનમાં ગયાં ત્યાં સુધીમાં બંને જણા મોબાઇલ લઇને જતા રહ્યા હતા. રીનાએ આ મામલે મેઘાણીનગર પોલીસ સ્ટેશનમાં ફરિયાદ કરી છે. પોલીસે આ મામલે ગુનો દાખલ કરીને તપાસ શરૂ કરી છે.