- મહાદેવ ગેમિંગ-સટ્ટાબાજી એપ કેસમાં ED એ રણબીર કપૂરને સમન્સ પાઠવ્યું
- છઠ્ઠી ઓક્ટોબરે રાયપુર છત્તીસગઢની ઓફિસમાં હાજર થવા માટે કહેવામાં આવ્યું
- રણબીર કપૂરે આ મામલે પત્ર લખીને એજન્સી પાસેથી 2 અઠવાડિયાનો સમય માંગ્યો
બોલિવૂડ એક્ટર રણબીર કપૂરને મહાદેવ ગેમિંગ-સટ્ટાબાજી એપ કેસમાં એન્ફોર્સમેન્ટ ડિરેક્ટોરેટ (ED) દ્વારા સમન્સ મોકલવામાં આવ્યું હતું. તેમને છઠ્ઠી ઓક્ટોબરે રાયપુર છત્તીસગઢની ઓફિસમાં હાજર થવા માટે કહેવામાં આવ્યું હતું. જ્યાં તેની પણ આ કેસમાં પૂછપરછ કરવામાં આવશે. પરંતુ રણબીર કપૂરે આ મામલે એજન્સી પાસેથી 2 અઠવાડિયાનો સમય માંગ્યો છે.
કેસમાં અન્ય ઘણા સેલેબ્સ ફસાયા
તમને જણાવી દઈએ કે આ કેસમાં માત્ર રણબીર કપૂરનું જ નામ નથી આવી રહ્યું. આ કેસમાં અન્ય ઘણા સેલેબ્સ ફસાયા છે. આ લિસ્ટમાં આતિફ અસલમ, રાહત ફતેહ અલી ખાન, અલી અસગર, વિશાલ દદલાની, ટાઈગર શ્રોફ, નેગા કક્કર, ભારતી સિંહ, એલી અવરામ, સની લિયોન, ભાગ્યશ્રી, પલકિત સમ્રાટ, કીર્તિ ખરબંદા, નુસરત ભરૂચા અને કૃષ્ણા અભિષેકના નામ સામેલ છે.
શું છે મામલો?
થોડા મહિના પહેલા 'મહાદેવ ગેમિંગ-બેટિંગ એપ'નું નામ સમાચારોમાં હતું. આ એક ઓનલાઈન સટ્ટાબાજીની એપ છે. ઘણા સેલેબ્સે આ એપને સમર્થન આપ્યું હતું. લોકોને ગેમિંગ માટે પણ પ્રોત્સાહિત કરવામાં આવ્યા હતા. એટલું જ નહીં આ એપના પ્રમોટર સૌરભ ચંદ્રાકરના લગ્ન ફેબ્રુઆરીમાં સંયુક્ત આરબ અમીરાતમાં થયા હતા. લગ્નમાં 200 કરોડથી વધુનો ખર્ચ કરવામાં આવ્યો હતો. આ વૈભવી લગ્નનો વીડિયો ભારતીય એજન્સીઓએ કેપ્ચર કર્યો છે. લગ્નમાં પરફોર્મ કરવા માટે આમંત્રિત કરાયેલા તમામ સેલેબ્સ EDના રડારમાં આવી ગયા છે, જેમાંથી એક રણબીર કપૂર છે.
કરોડો રૂપિયાનો ખર્ચ
સૌરભ ચંદ્રકરે લગ્ન માટે જે લોકોને આમંત્રણ આપ્યું હતું તે તમામ લોકો નાગપુરથી UAE પહોંચ્યા હતા. આ માટે પર્સનલ જેટ ભાડે લેવામાં આવ્યા હતા. પછી તેને લગ્નમાં આમંત્રણ આપવામાં આવ્યું. આટલું જ નહીં લગ્ન માટે મુંબઈથી વેડિંગ પ્લાનર, ડાન્સર, ડેકોરેટર વગેરેને બોલાવવામાં આવ્યા હતા, જેમાં કરોડો રૂપિયાનો ખર્ચ થયો હતો. બધું રોકડમાં ચૂકવવામાં આવ્યું હતું. ઇડીએ આ સંબંધમાં ડિજિટલ પુરાવા એકત્રિત કર્યા છે, જે મુજબ યોગેશ પોપટની મેસર્સ આર-1 ઇવેન્ટ્સ પ્રાઇવેટ લિમિટેડના નામે એક ઇવેન્ટ મેનેજમેન્ટ કંપનીને હવાલા દ્વારા રૂ. 112 કરોડ ટ્રાન્સફર કરવામાં આવ્યા હતા અને રૂ. 42 કરોડ રોકડમાં ટ્રાન્સફર કરવામાં આવ્યા હતા.
EDએ મુંબઈ, ભોપાલ અને કોલકાતાના હવાલા ઓપરેટરો પર દરોડા પાડ્યા
થોડા દિવસો પહેલા EDએ મુંબઈ, ભોપાલ અને કોલકાતાના હવાલા ઓપરેટરો પર દરોડા પાડ્યા હતા, જેમણે આ ઈવેન્ટ માટેના પૈસા મુંબઈની ઈવેન્ટ ફર્મને મોકલ્યા હતા. સિંગર નેહા કક્કર, સુખવિંદર સિંહ, એક્ટર ભારતી સિંહ અને ભાગ્યશ્રીને અહીંથી પરફોર્મ કરવા માટે પૈસા આપવામાં આવ્યા હતા. કહેવામાં આવી રહ્યું છે કે ટૂંક સમયમાં ED આ તમામ સેલેબ્સની પૂછપરછ કરશે.
