આતંક / વડોદરામાં રખડતાં ઢોરે ભાજપના કાઉન્સિલરને ઉલાળ્યા તો પાંસળી તૂટી ગઈ, બીજી બાજુ નવસારીમાં આખલા મકાનમાં ઘૂસી જતા અફરાતફરી મચી

• રાજ્યમાં રખડતાં ઢોરનો આતંક 
• રખડતાં ઢોરના આતંકની ચાર ઘટના 
• ક્યાંક આંખલા યુદ્ધ તો ક્યાંક પશુઓ માટે બબાલ 

રાજ્યના વિવિધ શહેરમાં વધુ એક વાર રખડતા ઢોરનો આતંક સામે આવ્યો છે. મોટા ઉત્સાહ સાથે શરૂ થતી ઢોરનિયંત્રણ ઝુંબેશ કશા પરિણામ વગર જ શમી જાય છે અને પછી નવેસરથી શરૂ થાય છે, રખડતા ઢોરનો આતંક. આ સિલસિલો બંધ થવાનો નામ જ લેતો નથી. આજે ચીખલી, રાજકોટ, સુરત અને વડોદરામાં રખડા ઢોરનો આતંક સામે આવ્યો છે. 

 

ચીખલીમાં રખડતા ઢોરનો ત્રાસ
નવસારીના ચીખલી તાલુકામાં રખડતા પશુઓનો આતંક સામે આવ્યો છે. ચીખલીમાં રખડતા આખલો મકાનમાં ઘૂસી જતા અફરાતફરી મચી હતી અને ચીખલી બજારમાં તેણે આતંક વેર્યો હતો. રખડતાં પશુઓના કારણે સ્થાનિકો હેરાન પરેશાન થઈ ગયા છે. પંચાયત દ્વારા રખડતા પશુને પકડવા કામગીરી કરવામાં આવે તેવી સ્થાનિકોની માગ ઉઠી છે. 

ભાયાવદરમાં આખલાનો આતંક
રાજકોટના ભાયાવદરમાં પાણીમાં આખલા વચ્ચે યુદ્ધ જામ્યો હતો. ભાયાવદરમાં ભારે વરસાદના કારણે તળાવ ભરાયું છે જે તળાવમાં આખલાઓનું યુદ્ધ થયું હતું. જેને જોઈ લોકોમાં ભયનો માહોલ જોવા મળ્યો હતો. જેનો વીડિયો પણ સામે આવ્યું છે અને પ્રાથમિક માહિતી મુજબ ભાયાવદર તાલુકાના ટીંબડી ગામનો હોવાનું અનુમાન છે.

સુરતમાં ઢોર પાર્ટી સાથે બબાલ
સુરતમાં SMCની ઢોર પાર્ટીના કર્મચારીઓ સાથે પશુપાલકોએ બબાલ કરી છે. ડીંડોલી વિસ્તારમાં ઉમિયા ચોક પાસે ઢોર પાર્ટીએ પકડેલા પશુઓને પશુપાલકો છોડાવી ગયા હતાં. SMC કર્મચારીએ પશુ છોડાવી ગયેલા લોકો સામે ફરિયાદ નોંધાવી છે. ડીંડોલી પોલીસે 4 શખ્સો સામે ફરિયાદ પણ નોંધાઈ છે.  

વડોદરામાં રખડતા ઢોરનો વધતો ત્રાસ
વડોદરાના પાદરામાં રખડતા પશુઓનો આતંક વધ્યો છે. પાદરા નગરપાલિકાના કોર્પોરેટર જ રખડતા ઢોરોના ભોગ બન્યા છે. વોર્ડ નંબર 4ના ભાજપના કાઉન્સિલર સુભાષ પટેલને રખડા પશુએ અડફેટે લીધા હતાં. સુભાષ પટેલને ગાયએ અડફેટે લેતા પાંસળી તૂટી ગઈ છે. અત્રે તમને જણાવીએ કે, થોડા દિવસ પૂર્વે રખડતા પશુની અડફેટે રાણાવાસની મહિલાનું મૃત્યુ થયું હતું. રસ્તા પર રખડતા ઢોરોને અંકુશમાં લાવવા માટે લોકોની માગ ઉઠી છે.