- ભારતમાં બેરોજગારી દર ઘટ્યો
- જાન્યુઆરીમાં ઘટીને 6.57 ટકા થયો બેરોજગારી દર
- માર્ચ 2021 બાદ સૌથી નીચા સ્તરે બેરોજગારી દર
દેશમાં કોરોના કહેર મચાવી રહ્યો છે. કોરોનાને કારણે દેશની આર્થિક સ્થિતિ પર ઘણી અસર પડી છે. નોકરી ધંધાઅને વ્યવસાય પર કોરોનાની માઠી અસર પડી છે. પરંતુ ધીમે ધીમે દેશ તેમાંથી બહાર આવી રહ્યો છે. જેનો પુરાવો છે બેરોજગારી દરમાં ઘટાડો. ભારતીય બેરોજગારી દરમાં સૌથી મોટો ઘટાડો નોઁધાયો છે. સેન્ટર ફોર મોનિટરિંગ ઇન્ડિયન ઇકોનોમી અનુસાર જાન્યુઆરીમાં દેશનો બેરોજગારી દર ઘટીને 6.57 ટકા પર આવી ગયો છે..
ગ્રામીણ વિસ્તારોમાં બેરોજગારી દર ઘટ્યો
ભારતના શહેરી વિસ્તારોમાં બેરોજગારીનો દર જાન્યુઆરીમાં 8.16 ટકા હતો, જ્યારે ગ્રામીણ વિસ્તારોમાં બેરોજગારીનો દર ઘટીને 5.84 ટકાની સર્વકાલીન નીચી સપાટીએ આવી ગયો છે. એક રિપોર્ટ અનુસાર ડિસેમ્બરમાં ભારતમાં બેરોજગારીનો દર 7.91 ટકા હતો. ત્યારે શહેરી વિસ્તારોમાં બેરોજગારીનો દર 9.30 ટકા અને ગ્રામીણ વિસ્તારોમાં 7.28 ટકા હતો.
કયા રાજ્યોમાં સૌથી ઓછી બેરોજગારી ?
તેલંગાણામાં જાન્યુઆરીમાં સૌથી ઓછી બેરોજગારી જોવા મળી હતી, જ્યારે હરિયાણામાં સૌથી વધુ બેરોજગારી જોવા મળી હતી. તેલંગાણામાં આ આંકડો 0.7 ટકા હતો, ત્યારબાદ ગુજરાત (1.2 ટકા), મેઘાલય (1.5 ટકા) અને ઓડિશા (1.8 ટકા)નો નંબર આવે છે. હરિયાણા 23.4 ટકાના બેરોજગારી દર સાથે યાદીમાં ટોચ પર છે. તે પછી રાજસ્થાનનો નંબર આવે છે જ્યાં બેરોજગારી 18.9 ટકા હતી. CMIEએ ડિસેમ્બર, 2021માં અનુમાન લગાવ્યું હતું કે દેશમાં બેરોજગારોની કુલ સંખ્યા લગભગ 53 મિલિયન છે, જેમાં મહિલાઓનો મોટો હિસ્સો છે
CMIEના ચીફનું શું છે કહેવું ?
બેરોજગારીના આંકડાઓ પર, CMIEના મેનેજિંગ ડિરેક્ટર અને ચીફ એક્ઝિક્યુટિવ ઓફિસર મહેશ વ્યાસે જણાવ્યું હતું કે ડિસેમ્બરમાં, લગભગ 35 મિલિયન બેરોજગાર લોકો સક્રિયપણે કામની શોધમાં હતા અને તેમાંથી લગભગ 80 લાખ મહિલાઓ હતી. તેમણે કહ્યું કે 1.7 કરોડ એવા લોકોને જોડવા મહત્વપૂર્ણ છે જેઓ રોજગાર ન હોવા છતાં સક્રિયપણે કામ શોધી રહ્યા નથી.
