- એસ.કુમાર રેસીડેન્સીના બ્લોકમાં લાગી આગ
- ફાયર વિભાગની ગાડીમાંથી પ્રેશર ન આવતા સ્થાનિકોમાં રોષ
- સ્થાનિકોએ જાતે જ પાણીનો મારો ચલાવ્યો
જેતપુરની એસ.કુમાર રેસીડેન્સીના એક મકાનમાં ભીષણ આગ લાગતા અફરાતફરીનો માહોલ સર્જાયો હતો. જેની જાણ ફાયર વિભાગને કરાતા ફાયરની ગાડીઓ ઘટના સ્થળે આવવા માટે રવાના થઈ હતી. જે બાદ ફાયર વિભાગની એક ગાડી રસ્તામાં અધવચ્ચે જ બંધ પડી ગઈ હતી. તો અન્ય ફાયર વિભાગની ગાડીમાંથી પ્રેશર ન આવતા સ્થાનિકોએ જાતે જ પાણીનો મારો ચલાવ્યો હતો. નગરપાલિકાની બેદરકારીને લઈ સ્થાનિકોમાં ભારે રોષ જોવા મળ્યો હતો.
ગેસ સિલિન્ડરમાં થયો હતો બ્લાસ્ટ
મળતી માહિતી અનુસાર, જેતપુરની એસ.કુમાર રેસીડેન્સીના બ્લોકમાં આવેલા એક મકાનમાં ગેસ ચાલુ કરતા સિલિન્ડર એકાએક બ્લાસ્ટ થયો હતો. સ્થાનિકો દ્વારા આ અંગેની જાણ ફાયર વિભાગને કરવામાં આવી હતી. જે બાદ ફાયર વિભાગની એક ગાડી એસ.કુમાર રેસીડેન્સી ખાતે દોડી આવી હતી. તો અન્ય એક ગાડી રસ્તામાં જ બંધ પડી ગઈ હતા.
સ્થાનિકોએ જાતે જ પાણીનો મારો ચલાવ્યો
એસ.કુમાર રેસીડેન્સી ખાતે પહોંચેલા ફાયર ફાયટરમાંથી પાણીમારો શરૂ કરાયો હતો. જોકે, ફાયર વિભાગની ગાડીમાંથી પ્રેશર જ આવ્યું નહોતું. જેથી ના છૂટકે સ્થાનિકોએ જાતે જ પાણીનો મારો ચલાવ્યો હતો. નગરપાલિકાની બેદરકારીને લઈ સ્થાનિકોમાં ભારે રોષ જોવા મળ્યો હતો. આગ લાગવાને કારણે એક મહિલા દાજી જતાં સારવાર અર્થે હોસ્પિટલમાં ખસેડાઈ હતી. તો ભીષણ આગમાં ઘરવખરી પણ બળીને ખાખ થઈ ગઈ હતી.
આ મામલે મકાન માલિક હિતેષભાઇએ જણાવ્યું કે, ગેસ સિલિન્ડર બ્લાસ્ટ બાદ ભીષણ આગ ફાટી નીકળી હતી. જે બાદ ફાયગ બ્રિગેડની ટીમ દોડી આવી હતી. પરંતુ ફાયરની ગાડીમાં પાણીનું પ્રેશર જ ન આવ્યું, જેથી આજુબાજુના લોકોએ રેતી અને પાણીથી આગને ઓલવી છે. ઘરની બધી વસ્તુઓ બળીને ખાખ થઈ ગઈ છે. મારા ભાભીને ઈજા પહોંચી છે. નગરપાલિકાની આ બેદરકારી છે. ખાલી દેખાડવા પૂરતી બે-બે ગાડીઓ મોકલી આપે છે, પરંતુ તેના મશીનો કામ જ નથી કરતા.
સળગતા સવાલ?
- નગરપાલિકા કેમ સાધનોનું સમયસર નિરીક્ષણ નથી કરતી?
- શું ફાયર વિભાગ પણ સાધનોની યોગ્ય તપાસ નથી કરતું?
- ફાયર વિભાગ હોવા છતાં સ્થાનિકો જાતે જ કામગીરી કરવા મજબૂર કેમ?
- ક્યારે નગરપાલિકા તંત્ર જવાબદારીથી કામગીરી કરશે?
- કોઈ પણ આગની ઘટનામાં મોટી દુર્ઘટના ઘટે તો જવાબદાર કોણ?
