હાલત કફોડી / શાકભાજી પકવતો ખેડૂત બિચારો કરે શું, ના બરોબર ભાવ રહેતા નારાજ ખેડૂતોએ અપનાવ્યો નવો રસ્તો, આ જિલ્લાઓમાં તાતને તકલીફ

 

• શાકભાજીની ખેતી કરતા ખેડૂતો મુશ્કેલીમાં
• ખેડૂતો પશુઓને ખવડાવી રહ્યા છે શાકભાજી
• પૂરતા ભાવ ન મળતા અન્નદાતાઓમાં નિરાશા

ઠંડીની ઋતુ શિયાળામાં લીલા શાકભાજી ખાવાની મજા જ કંઈક અલગ હોય છે. શિયાળામાં શાકમાર્કેટમાં પણ તમામ શાકભાજી સહેલાઈથી મળી રહેતા હોય છે. પરંતુ શું ખેડૂતોને તેના પૂરતા ભાવ મળે છે ખરા? જ્યારે આ સવાલનો જવાબ મેળવવા માટે VTVની ટીમ ખેડૂતોની વચ્ચે પહોંચી ત્યારે ખેડૂતોમાં નિરાશા જોવા મળી, તેનું કારણ છે ફુલાવર, કોબીજ અને ટમેટાના ભાવમાં ઘટાડો. એક તરફ મોદી સરકારનું ફોકસ ખેડૂતોની આવક બમણી કરવા પર છે, તો બીજી બાજુ ખર્ચ પ્રમાણે શાકભાજીનું વળતર ન મળતા ખેડૂતોની હાલત દયનીય બની છે.

શાકભાજીના પૂરતા ભાવ ન મળતા ખેડૂતોની હાલત કફોડી
જગતનો તાત ગણાતા એવા ખેડૂતો માટે ચોમાસું સારૂ હોય તો પણ મુશ્કેલી અને ખરાબ હોય તો પણ મુશ્કેલી... આ વર્ષે સોનારૂપી વરસાદ થયો છે ત્યારે વાવેતરમાં વધારો થવાની સાથે ઉત્પાદન પણ વધ્યું છે. ત્યારે હવે શાકભાજીનું વાવેતર કરતા ખેડૂતોમાં નિરાશા જોવા મળી રહી છે. શાકભાજીના પૂરતા ભાવ ન મળતા ખેડૂતોની હાલત કફોડી બની છે.

અમદાવાદમાં ફુલાવરની ખેતી કરતા ખેડૂતો મુશ્કેલીમાં
શાકભાજીની ખેતી કરતા ખેડૂતો મુશ્કેલીમાં મૂકાયા છે. અમદાવાદમાં માર્કેટમાં કોબીજ અને ફુલાવરના ભાવ યોગ્ય ન મળતા ખેડૂતોની ચિંતા વધી છે. VTVના ગ્રાઉન્ડ રિપોર્ટમાં ફુલાવરના યોગ્ય ભાવ ન મળતા હોવાનું ખેડૂતોએ જણાવ્યું છે. ખેડૂતોએ જણાવ્યું કે, 'ફુલાવરના 1 છોડની કિંમત એક રૂપિયા અને માવજત માટે ત્રણ રૂપિયાનો ખર્ચ થાય છે. 90 દિવસની મહેનત બાદ પણ ખર્ચ પ્રમાણે વળતર મળતું નથી. 5 રૂપિયાની માવજત સામે 2 રૂપિયામાં શાકભાજી વેચાતા આટલી મહેનત કરવા છતાં નુકસાન વેઠવાનો વારો આવે છે.' શાકભાજીના પૂરતા ભાવ ન મળતા ખેડૂતો પશુઓને ખવડાવવા માટે મજબૂર બન્યા છે. ગામડેથી શાકભાજી લઇને આવતા ખેડૂતોને વાહનના ભાડાનો ખર્ચ પણ માથે પડી રહ્યો હોવાનું ખેડૂત જણાવી રહ્યાં છે. આપને જણાવી દઈએ કે, ધોળકા તાલુકામાં ચલોડા, કેલીયા, વાસણા સહિતના ગામોમાં ફુલાવરની ખેતી થાય છે. 

ખેડૂતો પશુઓને ખવડાવી રહ્યા છે ટમેટા
ગીર પંથકના ખાંભા અને ચકરાવા ગામના ખેડૂતો પણ મૂંઝવણમાં મૂકાયા છે. અહીં ખેડૂતોને ટમેટાના પૂરતા ભાવ ન મળતા ખેડૂતો ટમેટાને પશુઓને ખવડાવી રહ્યા છે. VTV સાથેની વાતચીતમાં ખેડૂતોએ જણાવ્યું કે, ટમેટા બજારમાં 8થી 10 રૂપિયા પ્રતિ કિલો વેચાય છે, જ્યારે જાહેર હરાજીમાં 25 કિલોના કેરેટના માત્ર 50 રૂપિયા મળી રહ્યા છે. ટમેટાના ભાવો ગગડતા ખેડૂતો ટમેટા પશુઓને ખવડાવી રહ્યા છે. 

ખેડૂતોને મજૂરીના પૈસા પણ નથી નિકળતા
ઉલ્લેખનીય છે કે, ખેડૂતોને શાકભાજીના યોગ્ય ભાવ ન મળતાં ખેડૂતોમાં નારાજગી જોવા મળી રહી છે. પરંતુ વાસ્તવિકતા એ છે કે ખેડૂતો પાસેથી 2 કે 4 રૂપિયે 1 કિલોના ભાવે ખરીદેલું શાક જ્યારે શહેરોના માર્કેટમાં આવે છે ત્યારે તેની કિંમત 20 રૂપિયાનું 250 ગ્રામ થઈ જાય છે. શાકના 10 ગણા કરતા પણ વધારે ભાવ વધી જાય છે.  શાકભાજીના ભાવમાં ખૂબ જ ઘટાડો થતાં ખેડૂતોને મજૂરીના પૈસા પણ નથી નિકળતા બીજી બાજુ ગ્રાહકોને તો સસ્તા શાકબાજી મળતા નથી પણ વચ્ચેની મલાઈ એજન્ટો, દલાલો ખાઈ જતાં હોય છે.