- અવાર નવાર સાસરીયાઓ દ્વારા દહેજની માંગણી કરાતી
- મહિલાએ તેનાં પતિ સામે પણ કર્યા ચોંકાવનારા આક્ષેપ
- કૃષ્ણનગર પોલીસે સાસરીયાઓ વિરૂદ્ધ ગુનો નોંધી તપાસ હાથ ધરી
પત્નીની તબિયત સારી ના હોય તો પણ પતિ મોબાઇલમાં પોર્ન ફિલ્મ બતાવીને શરીર સંબંધ બાંધવા માટે મજબૂર કરતો હોવાનો ચોંકાવનારો કિસ્સો પ્રકાશમાં આવ્યો છે. પત્ની શરીર સંબંધ રાખવાની ના પાડે તો પતિ તેની સાથે મારઝૂડ કરતો હતો. આ સિવાય સસરાએ પણ તેની સાથે અવારનવાર શારીરિક છેડછાડ કરી હતી. વિકૃત પતિનો ત્રાસ અને સાસરિયાંની પાંચ લાખ રૂપિયા માગવાની ખોરી નીતિથી કંટાળીને અંતે પત્નીએ પોલીસ ફરિયાદ કરી છે.
સાસરીયાઓ દ્વારા અવાર નવાર દહેજની માંગણી કરવામાં આવતી
નરોડા વિસ્તારમાં રહેતી હીના (નામ બદલ્યું છે)એ કૃષ્ણનગર પોલીસ સ્ટેશનમાં પોલીસ ફરિયાદ નોંધાવી છે કે લગ્ન બાદ તેનાં માતા-પિતાએ યથાશક્તિ કરિયાવર આપ્યો હતો, જેમાં સોના-ચાંદીના દાગીના, કપડાં અને અન્ય ઘરવખરીનો સામાન આપ્યો હતો. લગ્ન બાદ હીના સંયુક્ત પરિવારમાં રહેતી હતી. શરૂઆતના ૧પ દિવસ સુધી તેને સારી રીતે રાખવામાં આવી હતી. ત્યાર બાદ તેના પતિ અને સાસરિયાં દહેજમાં કંઇ લાવી નથી તેમ કહીને અવારનવાર મહેણાંટોણાં મારતાં હતાં અને નાની નાની બાબતોમાં ઝઘડો- તકરાર કરતાં હતાં એટલું જ નહીં, અમારા મોભા મુજબ દહેજ આપ્યું નથી, જેથી તારે તારા પિયરમાંથી પાંચ લાખ રૂપિયા લાવવા પડશે, નહીંતર તારે ઘરમાં નોકરાણીની જેમ જ રહેવું પડશે તેમ કહીને આખા ઘરનું કામ કરાવતાં હતાં.
પરણીતાનો પતિ અવાર નવાર મહિલા સાથે મારઝુડ કરતો હતો
હીનાનો આક્ષેપ છે કે તેના પતિ દારૂ પીવાની ટેવવાળા હોવાથી અવારનવાર દારૂ પીને મારઝૂડ કરતા હતા તેમજ મોબાઇલમાં પોર્ન ફિલ્મ બતાવી તે પ્રમાણે શરીર સંબંધ બાંધવાનું કહેતો હતો. હીનાની તબિયત સારી ના હોય તો પણ શરીર સંબંધ બાંધવા માટે મજબૂર કરતો હતો. જો હીના ના પાડે તો તેની સાથે પતિ મારઝૂડ કરતો હતો. આ સિવાય હીનાના સસરા પણ અવારનવાર તેની સાથે શારીરિક છેડછાડ કરતા હોવાનો આરોપ લગાવ્યા છે. હીના આ બાબતની જાણ તેના પતિ, સાસુ કે નણંદને કરે તો તેઓ સસરાનું ઉપરાણું લેતાં અને તારે દહેજ લાવવું નથી તેમ કહીને ખોટા આક્ષેપ કરતાં હતાં.
સાસિરયાંના ત્રાસથી કંટાળીને પરણીતાએ પોલીસ મથકમાં ફરિયાદ કરી
ઉત્તરાયણના દિવસે હીનાના પતિ, સાસુ તથા નણંદ ધાબા પર હતાં ત્યારે તેના સસરા દારૂ પીધેલી હાલતમાં રસોડામાં આવ્યા હતા અને હીનાને બાથ ભરી દીધી હતી. હીનાએ ગભરાઇને ધાબા પર જઈ તેના પતિને વાત કરતાં તેઓ ઉશ્કેરાઇ ગયા હતા અને તેની સાથે મારઝૂડ કરી ઘરમાંથી કાઢી મૂકી હતી. હીના ત્યારથી પિયરમાં રહે છે. સાસિરયાંના ત્રાસથી કંટાળીને હીનાએ કૃષ્ણનગર પોલીસ સ્ટેશનમાં ફરિયાદ કરી છે.
