- સ્કૂલોમાં પહેલા ધોરણમાં બાળકોને દાખલ કરવાની ઉંમરમાં ફેરફાર
- 5 વર્ષને બદલે 6 વર્ષે પહેલા ધોરણમાં દાખલ કરી શકાશે
- કેન્દ્રીય શિક્ષણ મંત્રાલયે તમામ રાજ્ય સરકારોને આપ્યો આદેશ
છોકરાને પહેલા ધોરણમાં દાખલ કરવાની ઉંમરને લઈને કેન્દ્ર સરકારે એક મોટો નિર્ણય લીધો છે. કેન્દ્ર સરકારના શિક્ષણ મંત્રાલયે આજે તમામ રાજ્યોને બાળકોને પહેલા ધોરણમાં દાખલ કરવાની ઉંમર તરીકે પાંચ વર્ષ નહીં પરંતુ 6 વર્ષ રાખવાનો નિર્દેશ આપીને તેનું પાલન કરવાનું જણાવી દીધું છે.
3 વર્ષનું પ્રી સ્કુલિંગ શિક્ષણ જરુરી
માનવ સંસાધન વિકાસ મંત્રાલયના અધિકારીઓએ જણાવ્યું કે નવી રાષ્ટ્રીય શિક્ષણ નીતિ (એનઇપી) અનુસાર, મૂળભૂત તબક્કામાં તમામ બાળકો (3 થી 8 વર્ષની વચ્ચેની વયના) માટે પાંચ વર્ષની શીખવાની તકોનો સમાવેશ થાય છે, જેમાં ત્રણ વર્ષનું પૂર્વશાળા શિક્ષણ અને પછી ધોરણ 1 અને 2 નો સમાવેશ થાય છે.
નવી રાષ્ટ્રીય શિક્ષણ નીતિમાં ઉંમરમાં ફેરફાર
નવી રાષ્ટ્રીય શિક્ષણ નીતિ પૂર્વ-શાળાથી બીજા ધોરણ સુધીના બાળકોના અવિરત શિક્ષણ અને વિકાસને પ્રોત્સાહન આપે છે. આંગણવાડીઓ અથવા સરકારી, સરકારી સહાયિત, ખાનગી અને એનજીઓ દ્વારા સંચાલિત પ્રિસ્કૂલ કેન્દ્રોમાં અભ્યાસ કરતા તમામ બાળકો માટે ત્રણ વર્ષના ગુણવત્તાયુક્ત પૂર્વશાળા શિક્ષણની સુલભતા સુનિશ્ચિત કરીને જ આ કરી શકાય છે. અધિકારીએ ઉમેર્યું હતું કે, મંત્રાલયે રાજ્ય સરકારો અને કેન્દ્રશાસિત પ્રદેશોના વહીવટકર્તાઓને સ્કૂલોમાં બાળકોને દાખલ કરવાની ઉંમર 6 વર્ષ રાખવાનો નિર્દેશ આપ્યો છે.
હાલમાં બાળકોને સ્કૂલોમાં દાખલ કરવાની ઉંમર 5 વર્ષ છે
ઉલ્લેખીય છે કે સ્કૂલોમાં બાળકોને દાખલ કરવાની ઓછામાં ઓછી ઉંમર 5 વર્ષ છે પરંતુ હવેથી સ્કૂલોએ 6 વર્ષ રાખવી પડશે. કેન્દ્રનો આદેશ મળ્યાં બાદ રાજ્ય સરકારો સ્કૂલોને આવો આદેશ આપી શકે છે.
