- ED અને CBI ને લઈ મોટા સમાચાર
- ED CBI ને મળી શકે છે નવા બોસ
- CIOના પદ પર વિચાર કરી રહી છે સરકાર
NSA એટલે કે રાષ્ટ્રીય સુરક્ષા સલાહકાર અને ચીફ ઑફ ડિફેન્સ સ્ટાફ (CDS)ની જેમ હવે ભારત સરકાર ભારતના મુખ્ય તપાસ અધિકારી એટલે કે CIOની પોસ્ટ બનાવવાનું વિચારી રહી છે. જોકે આ અંગે સત્તાવાર રીતે કંઈ કહેવામાં આવ્યું નથી. આ તરફ એવું કહેવામાં આવી રહ્યું છે કે જો CIO ની પોસ્ટ નિયુક્ત કરવામાં આવે છે તો તે એન્ફોર્સમેન્ટ ડિરેક્ટોરેટ (ED) અને સેન્ટ્રલ બ્યુરો ઑફ ઇન્વેસ્ટિગેશન (CBI)ના વડા તરીકે કામ કરશે.
એક ખાનગી મીડિયાના અહેવાલમાં સૂત્રોને ટાંકીને કહેવામાં આવ્યું છે કે, જો દેશમાં CIOની નિમણૂક કરવામાં આવે છે, તો ED અને CBI તેમને રિપોર્ટ કરશે. ખાસ વાત એ છે કે CDS સેનાની ત્રણેય સેવાઓમાં ટોચનું સ્થાન ધરાવે છે અને બંને ગુપ્તચર એજન્સીઓ NSAને રિપોર્ટ કરે છે. હાલ CIOની પોસ્ટને લઈને ટોચના સ્તરે ચર્ચા ચાલી રહી છે.
ED અને CBIનું કામ શું હોય છે ?
હાલમાં ED મુખ્યત્વે આર્થિક છેતરપિંડીના મામલા પર કામ કરે છે. આ ઉપરાંત કેન્દ્રીય એજન્સી મની લોન્ડરિંગ અને FEMA એટલે કે ફોરેન એક્સચેન્જ મેનેજમેન્ટ એક્ટના ઉલ્લંઘન જેવા કેસોમાં પણ પગલાં લે છે. અહીં અન્ય કેન્દ્રીય એજન્સી CBI ભ્રષ્ટાચાર અને અન્ય આર્થિક ગુનાઓ સામે સક્રિય રહે છે.
CIOનું કામ શું હશે ?
રિપોર્ટ અનુસાર સૂત્રોએ જણાવ્યું છે કે, નવી પોસ્ટ ભારત સરકારમાં સેક્રેટરી રેન્કની હશે. એવું કહેવામાં આવી રહ્યું છે કે, આ પછી પણ ED કેન્દ્રીય નાણા મંત્રાલયના મહેસૂલ વિભાગ અને કર્મચારી, જાહેર ફરિયાદ અને પેન્શન મંત્રાલય હેઠળ CBI હેઠળ કામ કરવાનું ચાલુ રાખશે. જો કે આ CIO દ્વારા ચલાવવામાં આવી શકે છે જે સીધા વડાપ્રધાન કાર્યાલયને રિપોર્ટ કરશે.
પ્રથમ CIO કોણ હોઈ શકે ?
સત્તાવાર રીતે આ પદ કે પ્રથમ અધિકારી વિશે કંઈ કહેવામાં આવ્યું નથી પરંતુ એવી અટકળો છે કે EDના વર્તમાન ચીફ સંજય કુમાર મિશ્રાને પ્રથમ CIO બનાવવામાં આવી શકે છે. તાજેતરમાં સર્વોચ્ચ અદાલતે મિશ્રાને 15 સપ્ટેમ્બર સુધી ED વડા તરીકે ચાલુ રાખવાની મંજૂરી આપી હતી. ખાસ વાત એ છે કે તે દરમિયાન સુપ્રિમ કોર્ટે મિશ્રાને નિવૃત્તિ બાદ બે વખત આપવામાં આવેલ સર્વિસ એક્સટેન્શનને ગેરકાયદેસર ગણાવ્યું હતું.
