સિદ્ધિ / જામનગરની દીકરીઓએ ક્રિકેટમાં કર્યો કમાલ, રણજી અને અન્ડર નાઇન્ટીન કેપ્ટન બની પિતાનું સપનું કર્યું સાકાર, રોચક સફર જાણવા જેવી

• જામનગરની દીકરીઓનો ક્રિકેટમાં ડંકો
• પિતા પુલાવ વેચીને પરિવારનું ગુજરાન ચલાવે છે
• સુજાન અને રાબિયાની સંઘર્ષગાથાને અભિનંદન 

ક્રિકેટ ક્ષેત્રે જામનગરનો ઇતિહાસ વર્ષોથી ઉજળો રહ્યો છે અને નવી પેઢીએ પણ તેના સાહસ અને ખંતથી આ ઉજળા ઇતિહાસને સવાયો કર્યો છે. ક્રિકેટ ક્ષેત્રે જામનગરની દીકરીઓએ પણ કાઠું કાઢી દેશમાં ઓળખ બનાવી એક નવી ઉમળકાભેર સિદ્ધિ હાંસલ કરી છે. ત્યારે છેલ્લા ઘણા સમયથી મહિલા ક્રિકેટ ટીમમાં જામનગરના સુજાન અને રાબીયા સામાનું નામ ઝળહળી રહ્યું છે. 

આ દીકરીઓને અભિનંદન
સુજાન અને રાબીયા સામાન્ય પરિવારમાંથી આવતી હોવાથી અનેક સામજિક વંટોળો વચ્ચે અને પડકારોને પાછળ પછાડી આજે પોતાની એક નવી ઓળખ ઉભી કરી છે.  આ દીકરીઓને અભિનંદન અને તેના પિતાને વંદન છે, કારણ કે તેઓ લારી પર વેજ પુલાવ વેચીને પરિવારનું ગુજરાન ચલાવે છે છતાં પોતાની બન્ને દીકરીઓને ક્રિકેટ ક્ષેત્રે આગળ ધપાવવા પૂરતો સહયોગ આપે છે.

સુજાન અને રાબિયાએ રાત-દિવસ એક કરીને સફળતાની સિદ્ધિ મેળવી
સુજાન અને રાબિયાના પિતા આસિફ સમા જામનગરમાં ત્રણ દરવાજા, ગ્રીન માર્કેટ પાસે વેજ પુલાવ વેચીને પોતાના પરિવારનું ગુજરાન ચલાવે છે. તેમને 5 દીકરીઓ છે. જેમાંથી સુજાન સમા રણજીત ટ્રોફી અને રાબિયા સમા અન્ડર 19 અને અન્ડર 15ની કેપ્ટન છે. બંને દીકરીઓએ રાત-દિવસ એક કરીને સફળતાની સિદ્ધિ મેળવી છે. બંને દીકરીઓને મળેલી સફળતાને લઈને પિતા પણ ગર્વની લાગણી અનુભવી રહ્યાં છે.

'હું ક્રિકેટર ન બની શક્યા પરંતુ દીકરીઓને ક્રિકેટર બનાવી'
પિતા આસિફ સમય જણાવ્યું હતું કે, મારે પાંચ દીકરીઓ છે મારો પહેલેથી શોખ ક્રિકેટર બનવાનો હતો. પરંતુ આ શોખ માત્ર સપનું બનીને જ રહી ગયો હતો અને મેં મારા પુત્રને ક્રિકેટર બનાવવાનું મનોમન વિચારી લીધું હતું. આ દરમિયાન વસવસો ઠાલવતા કહ્યું કે ભગવાને દીકરાની પણ ખોટ રાખી છે આથી મે મારી બંને દીકરીઓને ક્રિકેટમાં કરિયર બનાવવાનું નક્કી કર્યું હતું. બન્ને દીકરીઓ જામનગર ક્રિકેટ બંગલા ખાતે પ્રેક્ટિસ કરી હતી. કોચ મહેન્દ્ર સિંહ ચોહાણ (તેઓ રવિન્દ્ર જાડેજાના પણ કોચ હતા) અને મારી બંને દીકરીઓને રાતદિવસની મહેનતથી સફળતા મેળવી છે.