- અમદાવાદમાં ડ્રગ્સની હેરાફેરીનો પર્દાફાશ
- યુવતી સહિત બે આરોપીની ધરપકડ
- કારમાંથી ડ્રગ્સ ઝડપાયું 16.120 ગ્રામ MD ડ્રગ્સ
અમદાવાદમાં ડ્રગ્સની હેરાફેરીનો પર્દાફાશ થયો છે. અમદાવાદમાં SOGએ વધુ એક વખત બરોડા એક્સપ્રેસ હાઇવે નજીક કારમાંથી ડ્રગ્સ ઝડપી પાડ્યું છે. 16.120 ગ્રામ એમડી ડ્રગ્સ સાથે એક યુવતી સહિત 2 આરોપીઓની ધરપકડ કરી 11.43 લાખનો મુદ્દામાલ કબ્જે કર્યો છે. નશાની હેરાફેરી કરતા કોણ છે આ આરોપી. જોઈએ આ અહેવાલમાં...
ડ્રગ્સની હેરાફેરીનો ફરી એકવાર પર્દાફાશ
SOGના ACP બી.સી સોલંકીએ જણાવ્યું કે, SOGને બાતમી મળતા અમદાવાદ-બરોડા એક્સપ્રેસ હાઇવે પાસેથી ડ્રગ્સ સાથે યુવતી અને યુવકની ધરપકડ કરી છે. ફિર્દોષ મન્સૂરી નામની યુવતી અને આશિષ પરમાર 16.120 ગ્રામ ડ્રગ્સની ડિલિવરી આપવા વડોદરાથી અમદાવાદ આવ્યા હતા. જોકે, ડિલિવરી આપે તે પહેલાં જ SOGએ આરોપીઓની ધરપકડ કરી છે.
યુવક-યુવતીની વડોદરા એક્સપ્રેસ હાઇવે પરથી ધરપકડ
તેમણે જણાવ્યું કે, આરોપીઓની પૂછપરછ કરતા સામે આવ્યું હતું કે આ ડ્રગ્સનો જથ્થો સાગર સુથાર નામના આરોપી પાસેથી લાવવામાં આવ્યો હતો. પોલીસને જાણ થાય નહીં એટલા માટે યુવતીને સાથે રાખવામાં આવી હતી. SOGએ બંન્ને આરોપીના રિમાન્ડ મેળવી તપાસ શરૂ કરી છે.
SOGએ વધુ તપાસ હાથ ધરી
બી.સી સોલંકીએ જણાવ્યું કે, આરોપીઓ અમદાવાદમાં કોને ડિલિવરી આપવાના હતા, તે બાબતે SOGએ તપાસ હાથ ધરી છે. જ્યારે બરોડાથી જે વ્યક્તિ પાસેથી ડ્રગ્સ લાવ્યા હતા તે અંગે બરોડા SOGને જાણ કરવામાં આવી છે. હાલમાં SOGએ ડ્રગ્સ આપનાર અને ડ્રગ્સની ડિલિવરી લેનાર બંનેની શોધખોળ શરૂ કરી છે..
24 જાન્યુઆરીએ સારંગપુરમાંથી કરાઈ હતી પેડલરની ધરપકડ
ઉલ્લેખનીય છે કે, આ પહેલા 24 જાન્યુઆરીએ SOGની ટીમે MD ડ્રગ્સ સાથે પેડલરની ધરપકડ કરી હતી. SOG ક્રાઇમે સારંગપુર વિસ્તારમાંથી MD ડ્રગ્સ વેચનાર પેડલરની ડ્રગ્સ સાથે ઝડપી લીધો હતો. SOGએ આ કેસમાં આરોપી અબ્દુલ વાઝીદ શેખની ધરપકડ કરી હતી. જે નશાનો વેપાર કરતા ઝડપાઇ ગયો હતો. સારંગપુર પાણીની ટાંકી પાસે બાતમીના આધારે SOG ક્રાઈમે વોચ ગોઠવીને આરોપીને ડ્રગ્સના જથ્થા સાથે ઝડપી લીધો હતો. તેની પાસેથી 32 ગ્રામ MD ડ્રગ્સ મળી આવ્યું હતું.
