- ઘરમાં એકલી રહેતી મહિલાઓ માટે ચેતવણીરૂપ કિસ્સો
- કિન્નરના વેશમાં આવીને ગઠિયાએ છેતરપિંડી આચરી
- દુઃખ દૂર કરવાની લાલચમાં આપી દાગીના સેરવી ગયો
અમદાવાદના એલીસબ્રીજ વિસ્તારમાં આવેલ સુનીતાનગરમાં રહેતા શિક્ષિકા ભૂમિકાબેન ત્રિવેદી તેમના પરિવાર સાથે રહે છે. આ દરમિયાન 14 મી એપ્રીલના દિવસે એક કિન્નર તેમના ઘરે આવ્યો હતો અને ઘરમાં બહુ તકલીફ ચાલે છે. તેમ કહીને અલગ અલગ રીતે વિધિ કરવાના બહાને તેમના પાસેથી રોકડ અને દાગીના સહિત રૂપિયા 49 હજારની છેતરપિંડી કરી છે. જે અંગે મહિલાએ એલીસબ્રીજ પોલીસ સ્ટેશનમાં ફરિયાદ દાખલ કરાવી છે. કિન્નરના વેશમાં ફરી રહેલા ઠગ અને ચોરથી સાવચેત રહેવાની અપીલ મહિલા અને તેના પરિવારે કર્યો છે.
દાગીના દૂધમાં ધોઈને તે પહેરી લેજો
મહિલાએ આ કિન્નરને ચા પીવા માટે ઘરમાં બોલાવ્યા ત્યારે તેણે કહ્યું હતું કે તમારા ઘરમાં હાલ બહુ તકલીફ છે. તમારા ઘરની વિધિ કરવી પડશે તેમ કહી દરવાજા બંધ કરાવી દીધા હતા અને એક ગ્લાસમાં પાણી, કંકુ અને ચોખા માંગ્યા હતા બાદમાં આ પાણીના ગ્લાસને ઘરમાં ફેરવી અને પોતે પી ગયા હતા અને કહ્યું હતું કે તમારા બધા દુઃખ હું પી ગયેલ છું. ઉપરાંત મહિલાએ ઘી માટેના 1100 રૂપિયા આપતા એક રૂપિયો લઈને બીજા રૂપિયા પરત કર્યા હતા અને કહ્યું હતું કે હું તારી પરીક્ષા કરતો હતો કે તું માતાજીને પૈસા આપે છે કે કેમ. બાદમાં એક રૂમાલ પાથરીને કહ્યું હતું કે તેમાં પૈસા મૂકો અને 3 સોનાના દાગીના મૂકો તેના પર હું વિધિ કરીને આપુ બાદમાં દૂધમાં ધોઈને તે પહેરી લેજો.
કિન્નર વેશમાં આવેલ ઠગને સીસીટીવીમાં કેદ
જેથી મહિલાએ રોકડ રૂપિયા 4,000 અને રૂપિયા 45 હજારની કિંમતના દાગીના મૂક્યા હતા. કિન્નરે કહ્યું હતું કે મારામાં માતાજીનો સાક્ષાત વાસ છે આ રૂમાલ મારી થેલીમાં મૂકી દો હું વિધિ કરીને હમણાં બે કલાકમાં આવું છું ત્યાં સુધી તમે જમવાનું બનાવી રાખો. પછી તમારા ઘરે જમી લઈશ..આમ કરી ઠગ કિન્નર સોના દાગીના લઈ ફરાર થઈ ગયો હતો. બીજી બાજુ કિન્નર વેશમાં આવેલ ઠગને સીસીટીવીના આધારે એલિજબ્રિજ પોલીસે શોધખોળ શરૂ કરી છે. પોલીસે સીસીટીવી આધારે તપાસ કરતા કિન્નર સાથે એક રીક્ષા ચાલક પણ આવ્યો હતો જેને લઈ પોલીસે ઠગ શખ્સો પકડવા ચક્રોગતિમાન કર્યા છે.
