- વડોદરાના 4 તાલુકા સાથે જોડતા રસ્તાઓ બિસ્માર
- ચારેય તાલુકાના જોડતા બિસ્માર રસ્તાઓ કરાશે રિપેર
- 11 સ્ટેટ હાઈવે પર 15 કીમીમાં પડ્યા છે અનેક ખાડાઓ
વડોદરા જિલ્લાના તમામ તાલુકા મથકોને જોડતા રોડની હાલત બિસ્માર થઇ ગઇ છે. જિલ્લામાં સ્ટેટ હાઈ-વે પર 15 કિલોમીટર સુધી ખાડા પડ્યા છે ત્યારે વડોદરા જિલ્લામાં આવતા સ્ટેટ હાઈ-વે પર પડેલા ખાડા 4 કરોડના ખર્ચે રિપેર કરવામાં આવશે. ઉલ્લેખનીય છે કે, વડોદરા જિલ્લામાં 41 સ્ટેટ હાઇ-વે પૈકી 11 હાઈ-વે પર ખાડા પડ્યા છે. જેનું પેચ વર્ક શરૂ કરી દેવામાં આવ્યું છે. જો કે, વડોદરાને વાઘોડીયા અને સાવલી સાથે જોડતા હાઈ-વેનું કામ નવરાત્રીથી શરૂ કરવામાં આવશે.
મહત્વનું છે કે, ચોમાસાની શરૂઆત બાદ રાજ્યમાં રોડ રસ્તા તૂટી જવાની બૂમો ઉઠી છે ત્યારે વડોદરા જિલ્લાની જો વાત કરીએ તો તમામ તાલુકા મથકને જોડતા રોડ બિસ્માર બન્યા છે. સ્ટેટ હાઇ-વેની વાત કરીએ તો વડોદરા જિલ્લા 700 કિમીના 41 સ્ટેટ હાઇવે આવેલા છે. તે પૈકી વડોદરા સાવલી, વડોદરા વાઘોડીયા, વડોદરા ડભોઇ અને વડોદરા જંબુસર હાઇવે પર મોટા પ્રમાણમાં ખાડા પડ્યા છે. વડોદરા જિલ્લા માર્ગ મકાન વિભાગના સર્વે મુજબ રોડ પર પડેલા ખાડાનો અંદાજ કાઢવામાં આવ્યો કે જેમાં કુલ 15 કિમીના ખાડા પડ્યા છે. આ ખાડા પુરાવાની કામગીરી સતત ચાલી રહી છે.
રોડ પર જે ખાડા પડ્યા છે તેને પૂરીને પેચવર્ક કરવામાં આવશે
વડોદરા જિલ્લામાં 41 સ્ટેટ હાઇવે પૈકી 11 હાઇવે પર વરસાદ ના કારણે ખાડા પડ્યા છે જેનું પેચ વર્ક શરૂ કરી દેવામાં આવ્યું છે. જોકે વડોદરાના વાઘોડીયા અને સાવલીને જોડતા હાઇ-વેને સંપૂર્ણ બનાવવાનું કામ નવરાત્રીથી શરૂ થશે. જ્યારે વડોદરાથી ડભોઇ રોડને પહોળો કરવાની અને ડીવાઈડર મોટા કરવાનું આયોજન કરવામાં આવ્યું છે. જોકે હાલ પૂરતા જે રોડ પર ખાડા પડ્યા છે તે પૂરીને પેચવર્ક કરવામાં આવશે અને નવરાત્રી પહેલાં આ કામ પૂરું કરી દેવાની ખાતરી આપવામાં આવી રહી છે.
રોડ-રસ્તા પર પડેલા ખાડાના કારણે વાહન ચાલકો પરેશાન
રાજ્યમાં રોડ-રસ્તા પર પડેલા ખાડાના કારણે વાહન ચાલકો પરેશાન છે. બીજી બાજુ માર્ગ મકાન વિભાગ પૂર્ણેશ મોદી પાસેથી લઇ લેવામાં આવ્યું છે ત્યારે અધિકારીઓ હવે રોડ રસ્તાની બાબતમાં એક્શનમાં આવ્યા છે. વહેલી તકે રોડ પરના ખાડા પૂરાઇ જાય તેના કામમાં લાગી ગયા છે.
