ગપશપ / શું સની દેઓલની લોન ચૂકવવામાં અક્ષય કુમારે કરી મદદ? અભિનેતાની ટીમે જણાવી સચ્ચાઈ

• સની દેઓલના બંગલા વિશે અલગ-અલગ સમાચારો સામે આવે છે 
• એક દાવામાં કહેવામાં આવ્યું કે અક્ષય કુમારે સની દેઓલની લોન ચૂકવી દીધી
• હવે સની દેઓલની ટીમે આ દાવાને લઈને જવાબ આપ્યો છે 

Sunny Deol Bungalow: સની દેઓલના બંગલા વિશે અલગ-અલગ સમાચારો સામે આવી રહ્યા છે.  એવું કહેવામાં આવી રહ્યું હતું કે સની દેઓલ પર 56 કરોડ રૂપિયાની લોન હતી, જેને વસૂલવા માટે બેંક ઓફ બરોડા તેની પ્રોપર્ટીની હરાજી કરી રહી છે. 24 કલાકની અંદર બેંક ઓફ બરોડાએ આ અંગે સ્પષ્ટતા કરી અને કહ્યું કે એ જાહેરાત ટેકનિકલ ખામી હતી.  આ દરમિયાન બીજો દાવો થવા લાગ્યો. દાવામાં કહેવામાં આવી રહ્યું છે કે અક્ષય કુમારે સની દેઓલની લોન ચૂકવી દીધી છે. જો કે સનીની ટીમે આનો જવાબ આપ્યો છે અને તેને સંપૂર્ણ રીતે ખોટું ગણાવ્યું છે. 

અક્ષય કુમારે સની દેઓલની લોન ચૂકવી દીધી? શું છે સત્ય 
અહેવાલોમાં દાવો કરવામાં આવી રહ્યો હતો કે અક્ષય કુમાર સની દેઓલની મદદ માટે આગળ આવ્યા અને પોતાનું ઘર બચાવવા માટે 56 કરોડ રૂપિયાની લોન ચૂકવી દીધી. હવે આ અંગે સની દેઓલની ટીમ એ એક વાતચીતમાં સ્પષ્ટ કર્યું કે આ સંપૂર્ણપણે ખોટા સમાચાર છે. અક્ષય કુમાર દ્વારા આવી કોઈ મદદ નથી કરવામાં આવી. આ સાથે સનીની ટીમે એમ પણ કહ્યું કે આ બાબતે કોઈ અટકળો ન કરવી જોઈએ. ટીમ આ મામલાને ઉકેલવામાં વ્યસ્ત છે. 

આ રીતે શરૂ થયો મામલો
બેંક ઓફ બરોડા દ્વારા ગત રોજ અખબારમાં પ્રકાશિત એક જાહેરાતમાં કહેવામાં આવ્યું હતું કે સની દેઓલ પર 56 કરોડ રૂપિયાનું દેવું છે. આ લોન અને વ્યાજની વસૂલાત માટે બેંક ઓફ બરોડા દ્વારા તેમના સની વિલાની હરાજી કરવામાં આવી રહી છે. હરાજીની તારીખ પણ સામે આવી ગઈ હતી. એ જાહેરાત અનુસાર, હરાજી 25 સપ્ટેમ્બરે રૂ. 51.43 કરોડની અનામત કિંમતે શરૂ થવાની હતી. 

સની દેઓલ પર દેવું છે કે નહીં? 
આ બાબત પ્રકાશિત થયાના એક દિવસ બાદ જ બેંક ઓફ બરોડાએ એક નવી જાહેરાત બહાર પાડી. જેમાં સ્પષ્ટપણે જણાવવામાં આવ્યું હતું કે આગલા દિવસે પ્રસિદ્ધ થયેલી જાહેરાત ટેક્નિકલ ખામીના કારણે છપાઈ હતી. હાલમાં બેંક ઓફ બરોડાએ સ્પષ્ટતા કરી નથી કે સની દેઓલ પર દેવું છે કે નહીં? તેમજ બેંક ઓફ બરોડાએ સની દેઓલ સાથેની વાતચીત અંગે કોઈ માહિતી શેર કરી નથી.