સાચવજો / અમદાવાદીઓ સાવધાન ! સોલા સિવિલ દર્દીઓથી ઉભરાઇ, ચાલુ મહિને ડેન્ગ્યુ-મલેરિયાના કેસ ડબલ નોંધાયા

• અમદાવાદની સોલા સિવિલ દર્દીઓથી ઉભરાઈ
• સોલા સિવિલમાં મચ્છરજન્ય રોગચાળાના દર્દીઓ વધ્યા
• જૂલાઈ કરતા ચાલુ મહિને ડેન્ગ્યુ અને મેલેરિયાના ડબલ કેસ નોંધાયા

એક તરફ રાજ્યમાં વરસાદી માહોલ જામ્યો છે તો બીજી તરફ ઠેર ઠેર પાણી ભરાઇ જવા પામ્યા છે. જેને કારણે ગંદકી અને મચ્છરોનો ઉપદ્રવ વધતા રોગચાળો વકર્યો છે. ત્યારે વાત કરીએ અમદાવાદ સોલા સિવિલની તો અહીં મચ્છરજન્ય રોગના દર્દીઓની સંખ્યામાં વધારો થયો છે. જુલાઇ મહિનાની સરખામણીએ ચાલુ મહિને ડેન્ગ્યુ અને મલેરિયાના ડબલ કેસ નોંધાયા.  

ડેન્ગ્યુ અને મલેરિયાના કેસ બમણા 

છેલ્લા બે દિવસમાં શહેરમાં રૂટિન ઓપીડી કરતા ઓપીડીમાં 30 ટકાનો વધારો જોવા મળ્યો છે.  સોલા સિવિલમાં સોમવારે 1960 OPD અને મંગળવારે 1570 OPD નોંધાઇ. ઉલ્લેખનીય છે કે  જૂલાઈમાં ડેન્ગ્યુના 32 કેસ હતા જ્યારે ચાલુ મહિને અત્યાર સુધીમાં 68 કેસ નોંધાયા છે. જ્યારે જુલાઇ માસમાં મેલેરિયાના 26 કેસ હતા તે ચાલુ મહિને 44 કેસ નોંધાયા છે.  કેસ વધતા મેડિસિન સિવાય નવા વોર્ડ ખોલીને દર્દીઓની સારવાર શરૂ કરાઇ છે. 

અમદાવાદમાં સ્વાઇનફ્લૂથી હાહાકાર

બીજી બાજુ અમદાવાદમાં પણ સ્વાઇન ફલૂએ હાહાકાર મચાવ્યો છે. ઓગસ્ટ મહિનામાં સ્વાઇન ફ્લૂના 509 કેસ નોધાયા. સ્વાઇન ફ્લૂના 70 ટકા દર્દીઓ હોસ્પિટલમાં એડમિટ છે. દાખલ દર્દીઓની ઉંમર 40 વર્ષથી વધુ હોવાનું સામે આવ્યું છે. 35 બાળકો 5 વર્ષથી નીચેના, 91 બાળકો 6થી 15 વર્ષના, 145 દર્દીઓ 15થી 40 વર્ષના સ્વાઇન ફ્લૂના શિકાર થયા છે. જ્યારે સાદા મલેરિયાના 129 કેસ, ડેન્ગ્યુના 132 કેસ નોંધાયા છે. આથી, કોમર્શિયલ અને રેસિડેન્ટ એકમો પર તપાસ તેજ કરાઇ.

છેલ્લા 20 દિવસમાં સિવિલમાં કેટલા નોંધાયા કેસ

અમદાવાદ સિવિલ હોસ્પિટલમાં છેલ્લા 20 દિવસમાં ડેન્ગ્યુનાં 45 કેસ, ચિકનગુનિયાનાં 21, મેલેરિયાનાં 32, હિપેટાઇટિસનાં 120 અને ડાયેરિયા તેમજ વોમેટિંગનાં 87 દર્દીઓ નોંધાયા છે.