જામનગર / અન્ય મહિલા દર્દીએ ગળુ દબાવી હત્યા કરી? જીજી હોસ્પિટલમાં મહિલાનું ભેદી મોત, પરિવારજનોના આરોપથી પોલીસ તપાસનો ધમધમાટ

• જામનગરની જી.જી હોસ્પીટલમાં સારવાર દરમિયાન મહિલાનું મોત 
• મૃતકના પરિવારજનોએ લગાવ્યા અન્ય મહિલા દર્દી પર આરોપ
• પોલીસ દ્વારા તપાસનો ધમધમાટ

જામનગરની જી.જી હોસ્પીટલ વધુ એક વખત ચર્ચાના ચકડોળે ચડી છે. હોસ્પિટલમાં નવી બિલ્ડીંગના ત્રીજા માળે માનસિક રોગના વોર્ડમાં ગઈકાલે એક મહિલાનું ભેદી મોત નીપજ્યું હતું. ત્યારબાદ મૃતકના પરિવારજનોએ અન્ય દાખલ મહિલા દર્દી પર આક્ષેપ કરતા સનસનાટી મચી જવા પામી છે. અન્ય મહિલા દર્દીએ મહિલાનું ગળું દબાવી મોતને ઘાટ ઉતાર્યાના આક્ષેપ થતા સમગ્ર મામલે તાપસ તેજ બની છે. હાલ પોલીસે મૃતક મહિલાના પતિના નિવેદન અને સીસીટીવી આધારે તપાસનો ધમધમાટ હાથ ધર્યો છે.

મૃતક મહિલાના પરિવારજનોના ધગધગતા આરોપ
 
જીજી હોસ્પિટલના માનસિક વોર્ડમાં મધુબેન અશોકભાઈ ભટીજાણી લાંબા સમયથી સારવાર લઇ રહ્યા હતા. આ દરમિયાન 40 વર્ષીય મહિલાનું ગતરાત્રીના શંકાસ્પદ મોત નીપજ્યું હતું. જેમાં પોલીસે નોંધ્યું છે કે મૃતક મહિલા છેલ્લા 25 વર્ષથી માનસિક બીમારીથી પીડાતા હોય જેને સારવાર દરમિયાન કોઈપણ કારણોસર આખરી શ્વાસ લેતા તેનું મોત થયું હતું. જો કે મૃતક મહિલાના પરિવારજનોએ આક્ષેપ કર્યો કે અન્ય દાખલ મહિલા દર્દીએ મધુબેનનું ગળું દબાવતા તેણીનું મોત નીપજ્યું છે. આ આક્ષેપને પગલે તંત્ર દોડતું થયું છે અને મહિલના મોત પાછળ સાચું કારણ શું તે જાણવા પોસ્ટમોર્ટમ સહિતની કાર્યવાહી કરાઈ છે.

હોસ્પિટલના ડીન નંદની દેશાઈએ કહ્યું કે...

બીજી બાજુ જામનગર જી.જી.હોસ્પિટલના ડીન નંદની દેશાઈએ આ મામલે જણાવ્યું હતું કે, ગળું દબાવી હત્યા કરાઈ હોવાના આક્ષેપને લઈને પીએમ કરાયું છે. જો કે પોસ્ટમોર્ટમ દરમિયાન મૃતક મહિલાના શરીર પર કોઈ નિશાન મળ્યા નથી. જેથી હાલ સીસીટીવી ફૂટેજના આધારે પોલીસ દ્વારા તપાસ કરવામાં આવી રહી છે.