- પાકિસ્તાન ક્રિકેટની ટીમ પહોંચી ઓસ્ટ્રેલિયા
- ખેલાડીઓ લાહોરથી દુબઈ થઈને સિડની પહોંચ્યા
- એરપોર્ટ પર ખેલાડીઓને જાતે સામાન ટ્રેકમાં લોડ કરવો પડ્યો
પાકિસ્તાન ક્રિકેટ ટીમ 3 મેચની ટેસ્ટ સીરીઝ રમવા ઓસ્ટ્રેલિયા પહોંચી છે. નવા કેપ્ટન શાન મસૂદની આગેવાની હેઠળની ટીમનું ઓસ્ટ્રેલિયામાં અલગ અંદાજમાં સ્વાગત થયું છે જેની કલ્પના પાકિસ્તાની ખેલાડીઓએ ભાગ્યે જ કરી હશે. સોશિયલ મીડિયા પર એક વીડિયો ખૂબ જ વાયરલ થઈ રહ્યો છે જેમાં પાકિસ્તાની ખેલાડીઓ સિડની એરપોર્ટ પર પોતાનો સામાન ટ્રકમાં લોડ કરતા જોવા મળી રહ્યા છે. 18 ખેલાડીઓ અને 17 સહાયક સ્ટાફ અને મેનેજમેન્ટ અધિકારીઓની બનેલી પાકિસ્તાનની ટીમ ઓસ્ટ્રેલિયા પહોંચી ગઈ છે. પાકિસ્તાનની ટીમ આ સીરીઝમાં યજમાન ટીમ વિરૂદ્ધ ટેસ્ટની શરૂઆત કરશે જે ICC વર્લ્ડ ટેસ્ટ ચેમ્પિયનશિપનો ભાગ છે.
ટ્રક જાતે સમાન લોડ કર્યો
પાકિસ્તાની ખેલાડીઓ લાહોરથી દુબઈ થઈને સિડની પહોંચ્યા છે. સામાન્ય રીતે એરપોર્ટ પર પાકિસ્તાન દૂતાવાસના અધિકારીઓ હોવા જોઈએ પરંતુ ન તો પાકિસ્તાની દૂતાવાસના કોઈ અધિકારી કે ન તો કોઈ ઓસ્ટ્રેલિયાના ક્રિકેટના અધિકારીઓ જોવા મળ્યા હતા. પાકિસ્તાની ખેલાડીઓ અને અધિકારીઓએ પોતાનો સામાન જાતે ઉપાડીને ટ્રકમાં ચઢાવવો પડ્યો હતો.
વીડિયો થયો વાયરલ
વીડિયોમાં પાકિસ્તાન ક્રિકેટ ટીમના સિનિયર ખેલાડી મોહમ્મદ રિઝવાન પણ ટ્રકમાં ઉભા રહીને અન્ય સાથી ખેલાડીઓની મદદ કરતા જોવા મળે છે. રિઝવાન ટ્રકમાં ઉભો છે અને અન્ય ખેલાડીઓનો સામાન લોડ કરી રહ્યો છે. સામાન્ય રીતે એરપોર્ટ પર ખેલાડીઓ સાથે આવી સ્થિતિ જોવા મળતી નથી. આ બધું હોવા છતાં રિઝવાને ચાહકો પર ગુસ્સો ના કર્યો અને તેમની સાથે સેલ્ફી માટે પોઝ આપ્યો હતો.
નવો કેપ્ટન ઉતરશે મેદાનમાં
ઓસ્ટ્રેલિયા અને પાકિસ્તાન વચ્ચે શ્રેણીની પ્રથમ ટેસ્ટ મેચ 14 ડિસેમ્બરથી પર્થમાં રમાશે. આ શ્રેણીમાં પાકિસ્તાની ટીમ નવા કેપ્ટન શાન મસૂદના નેતૃત્વમાં મેદાનમાં ઉતરશે. તાજેતરમાં ભારતમાં રમાયેલા ODI વર્લ્ડ કપમાં પાકિસ્તાનનું પ્રદર્શન ખરાબ રહ્યું હતું. બાબર આઝમની કપ્તાનીવાળી ટીમ વર્લ્ડ કપમાં 9માંથી 4 મેચ જીતવામાં સફળ રહી હતી. વર્લ્ડ કપ બાદ પાકિસ્તાન પરત ફર્યા બાદ બાબરે કેપ્ટનશીપ છોડી દીધી હતી
