સાવધાન / દેશમાં છેલ્લાં 6 મહિનાનો રેકોર્ડ તોડી રહ્યાં છે કોરોનાના નવા કેસો! આજે રાજ્યોના સ્વાસ્થ્ય મંત્રીઓ સાથે મહત્વની બેઠક

• 24 કલાકમાં 6 હજારથી વધુ નવા કોરોના કેસ નોંધાયા
• નવા કેસોએ છેલ્લા 6 મહિનાનો રેકોર્ડ તોડ્યો
• જેના કારણે સરકાર પણ એલર્ટ મોડમાં આવી ગઈ છે

દેશમાં કોરોના વાયરસે ફરી એકવાર દસ્તક આપી છે. નોંધનીય છે કે ભારતમાં કોરોના દર્દીઓની સંખ્યા સતત વધી રહી છે અને આ નવા કેસોએ છેલ્લા 6 મહિનાનો રેકોર્ડ તોડ્યો છે. સામે આવેલ નવા આંકડા મુજબ ભારતમાં હવે એક દિવસમાં 6 હજારથી વધુ નવા કેસ સામે આવ્યા છે જેના કારણે સરકાર પણ એલર્ટ મોડમાં આવી ગઈ છે. 

24 કલાકમાં 6 હજારથી વધુ નવા કોરોના કેસ નોંધાયા
જણાવી દઈએ કે આજે દેશમાં છેલ્લા 24 કલાકમાં 6 હજારથી વધુ નવા કોરોના કેસ નોંધાયા છે જે ગુરુવારની સરખામણીમાં લગભગ 13 ટકા વધુ છે. આ આંકડા બહાર આવતાની સાથે જ કેન્દ્રીય આરોગ્ય મંત્રી મનસુખ માંડવિયાએ આજે કોરોના વાયરસની સ્થિતિ અને તૈયારીઓની સમીક્ષા કરવા માટે બેઠક કરવા જઈ રહ્યા છે. આજે એટલે કે શુક્રવારે બપોરે 12 વાગ્યે યોજવામાં આવેલ આ બેઠકમાં કોરોનાની સ્થિતિ અને રાજ્ય સરકારોની તૈયારીઓ પર ચર્ચા થશે.

દૈનિક કોવિડ ડેટામાં 20% થી વધુનો વધારો
નોંધનીય છે કે યુપી-હિમાચલ પ્રદેશ અને દિલ્હી-મુંબઈ અને કેરળ સહિત અન્ય ઉત્તરીય રાજ્યોમાં છેલ્લા કેટલાક દિવસોમાં તીવ્ર ઉછાળો જોવા મળ્યો છે અને દૈનિક કોવિડ ડેટામાં 20% થી વધુનો વધારો જોવા મળ્યો છે. સપ્ટેમ્બર 2022માં આ આંકડો 5000ને પાર પંહોચ્યો હતો. ભારતમાં કોરોનાના વધતા જતા કહેરને જોતા સરકાર એલર્ટ મોડમાં આવી ગઈ છે.

આજે છેલ્લા 24 કલાકમાં દેશમાં કોરોના વાયરસના 6050 નવા કેસ નોંધાયા છે, જે ગઈકાલની સરખામણીમાં 13 ટકા વધુ છે. જણાવી દઈએ કે ગુરુવારે ભારતમાં એક દિવસમાં કોરોના વાયરસના 5,335 નવા કેસ નોંધાયા હતા, જેના કારણે દેશમાં અત્યાર સુધીમાં સંક્રમિત લોકોની સંખ્યા વધીને 4,47,39,054 થઈ ગઈ છે.  આ સાથે જ ગુરુવારે કર્ણાટક અને મહારાષ્ટ્રમાં બે-બે દર્દી અને કેરળ અને પંજાબમાં એક-એક દર્દીના સંક્રમણને કારણે મૃત્યુ થયા બાદ દેશમાં મૃત્યુઆંક વધીને 5,30,929 થયો છે.