- આખા ધાણાનું પાણી પીવાથી શરીરને ફાયદો
- એસિડિટી અને પાચન સંબંધિત સમસ્યાઓ માટે લાભકારી
- ખાલી પેટે દરરોજ સેવન કરવાથી મળી શકે છે રાહત
કોથમીર તો સ્વાસ્થ્ય માટે ઉત્તમ છે જ પણ શું તમે મસાલાઓમાં ધાણાનું નામ સાંભળ્યું છે? આખા ધાણા ભોજનનો સ્વાદ તો વધારે જ છે સાથે સ્વાસ્થ્યને પણ ફાયદો પહોંચાડે છે. ખાલી પેટ ધાણાનાં પાણીનું સેવન કરવાથી અનેક બીમારીઓને પણ દૂર કરી શકાય છે.
દરરોજ સવારે ધાણાનું પાણી પીવું
જો તમે દરરોજ સવારે ખાલી પેટે ધાણાનાં પાણીનું સેવન કરો છો તો તે અત્યંત લાભદાયી છે. કોથમીર એક સુપરફૂડ છે જેમાં અનેક પોષકતત્વો હોય છે. ધાણાનાં પાન અને બીજ બંને શરીર માટે લાભકારી હોય છે. જો તમે સવારે ખાલી પેટે ધાણાનાં પાણીનું સેવન કરો છો તો તેનાથી તમારી પાચનશક્તિ વધે છે. સાથે જ વજન પણ ઘટવા માંડે છે.
એસિડિટીમાં રાહત
જે લોકોને એસિડિટીની સમસ્યા રહે છે તેમણે ધાણાનું પાણી પીવું જોઈએ. ધાણામાં રહેલ ગુણ પેટને ઠંડક આપે છે. પરિણામે એસિડિટીની સમસ્યા ઓછી થઈ જશે. ધાણાનું પાણી પીવાથી તમારા પેટમાં પેદા થનાર એસિડનું સ્તર પણ ઓછું થઈ જાય છે અને બળતરાં કે પીડા દૂર થાય છે. ધાણા એન્ટી-ઈન્ફ્લેમેટરી ગુણોવાળા હોય છે તેથી પેટ સંબંધિત તમામ સમસ્યાઓને તે દૂર રાખે છે.
વજન ઘટે છે
જો તમે ધાણાનું પાણી પીવો છો તો તે વજન ઘટાડવામાં મદદરૂપ થાય છે. વેઈટ લૉસનો આ એક અસરકારક ઉપાય માનવામાં આવે છે. કોથમીરનાં પાન અને બીજ (ધાણા)માં ભરપૂર ફાઈબર હોય છે. જેનાથી પેટ લાંબા સમય સુધી ભરેલું લાગે છે. ધાણાનાં બીજ ફેટ બર્ન કરવામાં પણ મદદગાર રહે છે.
સ્કિન માટે ફાયદાકારક
ધાણાનું પાણી સ્કિન માટે શ્રેષ્ઠ માનવામાં આવે છે. તેથી સવારે ખાલી પેટે ધાણાનાં પાણીનું સેવન કરવું જોઈએ. તેનાથી તમારા ચહેરાનાં દાગ-ધબ્બા અને પિમ્પલ્સ દૂર થાય છે.
