Amarnath Yatra 2023: અમરનાથ યાત્રામાં વધુ એક ગુજરાતી શ્રદ્ધાળુનું મૃત્યુ, પહેલગાવમાં વડોદરાના 33 વર્ષીય યુવકનું હોર્ટ એટેકથી મૃત્યુ થતાં પરિવારમાં શોક.
Share
અમરનાથ યાત્રામાં વધુ એક શ્રદ્ધાળુનું મૃત્યુ
ફતેહપુરા પીતાંબર પોળના યુવકનું મૃત્યુ
હાર્ટ એટેક આવતા ખસેડાયા હતા હોસ્પિટલમાં
અમરનાથ યાત્રા દરમિયાન વધુ એક ગુજરાતી શ્રદ્ધાળુના મૃત્યુના સમાચાર સામે આવી રહ્યા છે. પહેલગાવની હોસ્પિટલમાં વડોદરાના યુવકનું હાર્ટ એટેકથી મૃત્યુ નિપજ્યું છે. હાલ યુવકના મૃતદેહને વડોદરા લાવવાની તજવીજ હાથ ધરવામાં આવી છે. મહત્વનું છે કે, અમરનાથની યાત્રા હવે ગુજરાતીઓ માટે જીવલેણ સાબિત થઈ રહી છે. છેલ્લા 10 દિવસમાં ચોથા ગુજરાતી શ્રદ્ધાળુનું યાત્રા દરમિયાન મોત નિપજ્યું છે.
બે દિવસમાં આવ્યા ત્રણ હાર્ટ એટેક
મળતી માહિતી અનુસાર, વડોદરાના ફતેહપુરા ખાતે આવેલી પીતાંબરની પોળમાં રહેતા 33 વર્ષીય ગણેશ કદમ વડોદરાથી 10 મિત્રો સાથે અમરનાથ યાત્રાએ ગયા હતા. તેઓ પહેલગામ ખાતે આવેલી એક હોટલમાં રોકાયા હતા. જ્યાં તેમને બે દિવસ પહેલા ઉલટી થતાં મિત્રો સ્થાનિક હોસ્પિટલ ખાતે સારવાર અર્થે લઈ ગયા હતા. જ્યાં તેમને બે વખત હાર્ટ એટેક આવ્યા હતા, પરંતુ તેઓ બચી ગયા હતા, પરંતુ આજે આવેલો ત્રીજો હાર્ટ એટેક જીવલેણ સાબિત થયો હતો.
મૃતક ગણેશ કદમ
પરિવારમાં ફરી વળ્યું શોકનું મોજું
તેમનું હોસ્પિયલમાં હાર્ટ એટેકથી મૃત્યુ થયું હતું. આ સમાચાર મળતાની સાથે પરિવારમાં માતમ છવાયું છે. તો ગણેશ કદમના આકસ્મિત અવસાનથી તેમના પત્નીને અને બાળકો નિરાધાર બન્યા છે. હાલ તેમના મૃતદેહને વડોદરા લાવવા માટે પ્રયાસ હાથ ધરવામાં આવ્યો છે.
ઊર્મિલાબેન મોદી મૃત્યુ
ગતરોજ મહિલાનું નિપજ્યું હતું મોત
આપને જણાવી દઈએ કે, ગઈકાલે પણ એક શ્રદ્ધાળુનું મૃત્યુ થયું હતું, મૂળ સુરતના અને છેલ્લા 10 વર્ષથી પરિવાર સાથે અમેરિકા રહેતા ઊર્મિલાબેન મોદીનું જમ્મુ-કાશ્મીરના અનંતનાગમાં માથા પર પથ્થર પડતા મૃત્યુ નિપજ્યું હતું. જ્યારે બે જવાનો ઈજાગ્રસ્ત થયા હતા. મૃતક ઊર્મિલાબેનના પરિવારજનોએ જણાવ્યું છે કે, દોઢ મહિલા પહેલા જ પાંચથી છ મહિના માટે ગીરીશભાઇ મોદી અને તેમના પત્ની ઊર્મિલાબેન મોદી વતન સુરતના કામરેજ ખાતે આવ્યા હતા. આ દરમિયાન તેમણે અમરનાથ યાત્રાએ જવાનું નક્કી કર્યું હતું. ઊર્મિલાબેન એક ટુર ટ્રાવેલ્સ દ્વારા પતિ સાથે ગત 5 જુલાઇના રોજ કામરેજથી અમરનાથ યાત્રા માટે રવાના થયા હતા. બે દિવસ અગાઉ જમ્મુ-કાશ્મીરના અનંતનાગમાં ભૂસ્ખલન થતાં ઊર્મિલાબેનના માથામાં પથ્થર વાગ્યો હતો અને ગંભીર ઈજાઓ પહોંચતા તેઓનું મોત નિપજ્યું છે.
10 દિવસમાં આ ચોથા ગુજરાતી અમરનાથ યાત્રીનું મૃત્યુ
1. ગણેશભાઈ કદમ (ફતેહપુરા, વડોદરા)
2. ઊર્મિલાબેન ગિરિશભાઇ મોદી (કામરેજ, સુરત)
3. શિલ્પાબેન નરેશભાઈ ડાંખરા (સિદસર, ભાવનગર)
4. રાજેન્દ્રભાઇ ભાટીયા (વેમાલી, વડોદરા)
